زامان ـ زامان هر فرصت ده آذربایجان تورک میللتی نین وارلیقین چئشیدلی شیوه لرله اینکار اتمئک ایسته ینلر بیلمه لی دیرلرکی : بیزآذربایجان تورک میللتییک ، وطنیمیزین گئنیش اراضی لری و تاریخی آدی ، عنوانی آذربایجان تورپاقلاری دیر، مین ایللیک لره دایانان زنگین تاریخیمیز و گوجلو آنا دیلیمیز تورک دیلی دیر . بیز آذربایجان تورک میللتییک بو حقیقتی هئچ بیر تفرقه چیلر ، غرضلی " دوُستا "بئنزر دوشمانلار دئیشه بیلمز

.

گونئی آذربایجاندا میللی اوُیانیش پروسئسی باشلاندیقی چاقدان ، هرگون و هر فرصت ده فارس راسیست حاکیمییت لری و اونون رنگارنگ عامیللری جور به جور شیوه لرله تلاش ائدیرلر، آذربایجان و تورک حقیقتین تاپدالییب اینکار اتسینلر، آنجاق اوُنلارین بوتون مذبوحانه تلاشلاری بیزیم میللتیمیزین اینکار اوُلونماز وارلیقی قارشی سیندا مغلوبییته اوغرامیشدیر، اوُیانیش پروسئسی نین حوُکمو ایله چوُخدان دیرکی میللتیمیز اوُز تاریخی وارلیقی ، آذربایجانچیلیق و تورکلوک کیملیگی مفکوره سی ایله هارای لارلا بیرلیکده آددیملار آتیب و یئنی گئنج نئسلیمیزین شعوروندا ودوشونجه سینده اوُزونه لایق اولان یئرین آلیب و یوُلون آچماقدا دیر.

چاقیمیز میللت لرین اویانیش چاقی اوُلدوقونا گوره ، هرگون دوُنیادا اسارت ده اوُلان میللت لرین مستعمره چیلر و یا دیکتاتور رژیم لرین علیهینه باشلادیقلاری عصیانلارا شاهید اوُلوروق آردیجیل باش وئرن سیاسی ، ایجتماعی ، فرهنگی حادیثه لر ، ایسترایسته مز گونئی آذربایجان میللتینین دوشونجه سینده و شعوروندا موثبت تأثیرلر بوراخیر و طبیعی اوُلاراق گئت گئده اوُزمیللی کیملیگی نین نه اولدوقون درک ائدیب اونو منیمسه یب میللی حرکت و قورتولوش جبهه سینین سیرالاریندا اوُزونه لایق اوُلان یئرلرین آلیب و حرکتین تکامول مرحله سی ایله بیرلیکده آددیم لار آتماقدا دیرلار اوزون ایللردیرکی گونئی آذربایجان خالقین میللت آدلاندیردیقدا ، فارس راسیسمی نین شیددت له قانینا توخونور. ائله بونا ق فارس شوینیسمی کئچمیش 90 ایلدن بئری ایران ممالیک محروسه سینده بیر آزینلیق قوم اولاراق تورک حاکیمییت لری داخیلینده یاشادیقلاری حالدا ، حاکیمییتی أله کئچیرمئک اوچون داعمن موذیانه تلاشلارا أل آتیردیلار کی بونا تاریخ ده شاهید دیر، نهایت انگیلیس استعمارینین یاردیمی ایله سید ضیاء ـ ریضاخان کودتاسی نتیجه سینده ساختا کارلیقلا ممالیک محروسه نی « ایران » آدلاندیریب وبیردن بیره فارس قومونا میللت لقبی وئرمئکله ، باشقا خالقلاری تحقیراتمئک هدفی ایله ، اوُنلاری آلچاقلاماق اوچون ایراندا یاشایان قوملار دئیئرئک ، تورکلره قارشی دوشمانچیلقلارین آچیقجاسینا گوُسترمکله آذربایجان تورکلرین هر جهت دن گوُزون چیخدییا محکوم اتدیلر . بیرحالداکی آذرابایجان تورکلرینین فارس شوینیست قورقوسو یارانان گونه قدر بو گون ایران آدلانان یئرده مین ایللیک حاکیمییت تاریخلری وار ایدی .

آوروپادا چوخدان میللت لئشمه پروسئسی باشلانارکن ، گوُنئی آذربایجاندا بو پروسئسینین ایلکین قیغیلجیم لاری مشروطه اینقلابی چاقیندان یارانیر ، آنجاق همان چاقدا دیسپوتیزمین و ایرتیجانین حوکم سوردویو دووراندا ، بیرطرفدن فئودالیسم قورقوسو ، دیگر طرفدن شریعت چیلیک چوُماقیندان ایستفاده ائدن شوینیسم ، اوزآقالیق سیستمین قورویوب ساخلاماق اوچون بوتون حیله لره و جینایت لره أل آتاراق بو پروسئسین تکامولونون قارشی سین آلماقا چالیشمیشدیر . فئودالیسم و شریعت چیلیک باخیمیندان جامعه ده یاشییان اینسان توپلومو هرهانسی طایفادان ، ائلدن ، قومدان اولدوقلارینا باخمییاراق ، یوخسول و ضعیف اوُلدوقلارینا گوُره " رعیت " آدلانیردیلار، علاوه اوُلاراق ممالیک محروسه ایراندا خالقین بوُیوک اکثرییتی موسلمان همده شیعه اوُلدوقلارینا گوُره یوخسول و زحمتکش طبقه نی تحقیر و تسلیم اتمئک هـدفی ایله اوُنلاری " امت موسلمان " آدلاندیریب ، شاها ، سولطانا ، اربابا ، شریعته تابع اوُلماقا حوُکم وئریب فیتوا صادیر ائدیردیلر . اساسن قوم ، قبیله ، رعیت ، امت دئیم لری دین منشألی اورتا چاقین فئودالیسم قورقوسونا عاید اوُلان دئیم لردیرلر. خصوصی ایله "امت" دئیمی ایسلام دینی نین مشخصه لریندن اوُلدوقونا گوُره یوخسول کوتله لری داها آرتیق آشاغیلایب أزیب تابع اتمئگ اوچون اوُنلاری اوُز کوله لری حئساب اتمئک معناسیندا ایشله نیردی ، آنجاق میللت دئیمی ماشینیسم له بیرلیکده یارانان گوندن ، دین شریعت چیلری و فئوداللار هر زامان میللت کلمه سیندن قورخاراق ، اونون داشیدیغی مفهوما قارشی اوُلموشدورلار . « ائله بوگونون اوزونده " ایران " آدلانان یئرده راسیست ایسلام رژیمی میللت کلمه سین دیله گئتیرمئکدن قورخوب قاچیناراق ، زحمت کش اینسانلاری کیچیک ساییب أزمئک هدفی ایله ، آلدادیجی شیوه لرله یوموشاق لیقلا اوُنلاری امت موسلمان خیطاب ائدیب و زوراکیلیقا دایاناراق اوُزلرین میلیونلارلا اینسانلارین صاحیبی حئساب ائدیرلر. ! » « بوگونون اوزونده ده " ایران دئیلن" یئرده حوکم سورن ایسلام رژیمی ایسه هئچ اوتانمادان زحمتکش اینسانلاری کوله حئساب ائدیباوُنلارموسلمان آدلاندیریرلار»

بوُلونموش وطنیمیزین قوزئی آذربایجانیندا یاشییان میللتیمیز ایسه روس هئگئمونیسی نین تأثیرلری آلتیندا اوُلدوقلارینا باخمییاراق ، گُونئیدن فرقلی اوُلارق بیر دفعه لیک قاطعییت له میللت لئشمه پروسئسین محمد امین رسول زاده نین یاراددیقی دمکراتیک آذربایجان جمهورییتی دوولتی نین یاراندیقی چاقیندان باشلادی و اونون طبیعی داوامی اوُلان ، دوُشمانلارین بوتون فیتنه کارلیقلارینا باخمییاراق ، دونیا اعتباری قازانمیش بوگوُنکو موستقیل دوُولتیمیز آذربایجان جمهورییتی دیرکی هم میللت دیر و همده چاقداش دوولتی وار.

بیلدییمیز کیمی تاریخده چئشیدلی ایجتماعی دوُورانلار اوُلموشدور. طبیعت ده دائمن وار اوُلان حقیقت لرین سببین کشف اتمئک اوچون اینسانلار دائمن تلاش اتمیشلر، بئله لیکله مین ایللیک لرین خبر سیزلیک وجهالت چاقیندا اینسان شعورو احتیاج اوزریندن تکامول تاپاراق ، گئلیشمئکده اوُلموشدور، بعضن ائله نادیر و شعورلو اینسانلاردا اوُلوب لار کی ایستر طبیعت ده ، ایستر جامعه ده اوُلان پدیده لرحاققیندا دوُشونرئک ، هر پدیده نین وار اوُلدوقونون سببین بیلمئگ اوچون آختاریش لار ائدیب و نهایت اوُنلارین تلاش و فعالییت لری نتیجه سینده بشر جامعه سی نین سیماسی گئت گئده بو گونوموزه قدرمختلیف جهت لرده دئیشمیشدیر، اوجومله دن : یارانیشدا ، حئیاتدا ، طبیعت ده اوُلان نعمت لردن باشقا ، جامعه لرده ظالیم لرین ظولمو، گوُجلولرین گوُجسوزلری اسارت ده ساخلاماسینین ایقتصادی ، سیاسی ، فرهنگی ، دینی سببلرین و سایره ایجتیماعی موضوع لارحاققیندا دوشونوب ، اوُزهم فیکیرلری آراسیندا مطرح ائدیب ، جهالتین حوکم سوردویو چاقدا اینسانلاری نئجه ظولمدن عدالت سیزلیکلردن قورتارماق اوچون گئت ـ گئده آراشدیرماقا و دوشونمئگه باشلایرلار ، پروسئس داوام ائدرکن آردینجل اولاراق کوله لیک چاقی ، سرواژ(1) ، فئودالیسم ، خیلافت ، ونهایت ماشینیسم دورانی یارانیر، ماشینیسم له بیرلیکده بورژوازی ، کاپیتالیسم ، کمونیسم ، ونهایت کاپیتالسمین زیروه سی اولان فاشیسم یارانیر، تکامول مرحله سی حرکت ائدرکن ، چاقیمیزا قدر یئنی ایجتماعی سیستم لر بیربیرلرین دئیشیر و یئنی دوشونجه لر اسکی دوشونجه لرین یئرین آلیر بو هرجهتلی پروسئس و تکامول هئله ده داوام اتمئکده دیر . بو اوزون بحثه گیریشمه دن گوره ده " ایراندا یاشییان میللتلر" بحثی نین   ونهایت 17 ینجی عصردن آوروپادا یارانان صنعت اینقلابی باش وئریر و دوُنیادا بوُیوک دئیشیکلیک لره سبب اوُلور، آنجاق مالشینیسمین گئتیردیگی یئنی لیکلر تکجه آوروپادا محدودلاشیب قالمادان ، گئت گئده آوروپانین سینیرلارین آشیب ، باشقا قونشو اوُلکه لره و بوتون دونیایا یوُل آچیر ، ماشینیسم و اونون یاراددیقی تحول نتیجه سینده آوروپادا کیچیک ، بوُیوک کارخانالارین" فرمالارین" آچیلیب فعالییته باشلاماسی ایله طبیعی اوُلاراق کندچیلر شهرلره آخین ائدیب بوُیوک ایشچیلراوردولاری هر یئرده یارانیر، گئت ـ گئده ایستحصالین «تولیدین» سیماسی دئیشیلیر و بازارلاردا ، تیجارت مدرن لئشیب ، توسعه تاپیر ، بئله لیکله ماشینیسم چاقی نین اینسان جامعه سینه بخش اتدیگی ایمتیازلاری عصرلرین موثبت حادیثه لریندن حئساب اتمئک اوُلار ، ماشینیسم چاقی نین اساسی شرطلریندن بیری ده جامعه ده یاشییان اینسانلارین ساوادلانماسی ایدی ، اوخویوب دوشونن اینسان ، کئچمیشده کی حئیات سویه سیندن اوزاقلاشیب چاقا اویغون اولان حئیاتا سوییه سینه باشلییر، یئنی چاقدا اوُز طبیعی حاق و حقوق لارین ألده اتمئگ اوچون دورمادان تلاشلار ائدیر. بونا گوره ده گئت گئده جامعه ده چئشیدلی سیاسی ، ایجتماعی ، علمی دوشونجه لره و موقع لره صاحیب اوُلان عالیم اینسانلار یارانیرلار، اوُ زامانلاردا هئله دوُنیانین اوزاق یاخین اوُلکه لرینده بو گونکوندن داها وحشی جئسینه دیسپوت شاهلار ، سلطانلار و حاکیملر فئودالیسم و دین قایدالارینا دایاناراق چوخ قدارجاسینا فیتوالار وئریب حوکم سوروردولر ، ظولمدن جانا گئلمیش رعیت لر چوروموش دیسپوت فئودالیسم قورقولاری علیهینه کوتله وی شئکیلده عصیانلارا باشلایرلار. ایشچیلرین و کندچیلرین یاراددیقلاری اینقلابلار ماشینیسم چاقی نین طلبی اولدوقو حالدا ، همان اینقلاب لارین دالغالاری ایستر ایسته مز بوتون دوُنیانی بورویوردو ، فئودالیسم علیهینه باشلانان بیرچوخ ایجتماعی و سیاسی اینقلاب لارموفقییت قازاندیقدا ، گئت ـ گئده میللت و میللت لئشمه مفهومودا اوُنونلا بیرلیکده یارانیر و اینکیشاف تاپماقا باشلییر. سونوندا ایمپریالار میللتلرین یئنی فیکرینین قارشی سیندا عاجیرغالیب ، دیزه چوکوب سقوط ائدیرلر.

ممالیک محروسه ایراندا ایسه فئودالیسم ، خان خانلیق ، شریعت قورقوسو قان توکوب ، اوُد یاندیریردی . آنجاق بوتون محدودییت لره و باسقیلارا باخمییاراق جامعه ده یاشییان اینسانلار دونیادا باش وئرن حادیثه لردن و دئیشیکلیکلردن تأثیرسیز قالا بیلمزدیلر . آذربایجان اراضی لری جغرافی باخیمیندان بیر طرفدن آوروپا و آسیا آراسیندا و عثمانلی دوولتی ایله سینیرلاری اوُلدوقونا گوره قونشودور، بو نئدنله آسیا بازارلارینا گئدن اوُنئملی کئچید یولو ایدی ، باشقا طرفدن روسیه ایمپریاسیندا آردیجیل باش وئرن سیاسی ، ایجتیماعی حادیثه لر، ایسترایسته مز، گوُنئی آذربایجان جغرافیاسیندا و بوتونلوکله ایران ممالیک محروسه سینده یاشییان اینسانلارین دوُشونجه لرینده آیدینلیقا دوُغرو تأثیرلر بوراخیردی ، بونا گوُره ده ممالیک محروسه ده یارانان مشروطه اینقلابی همان یئنی چاقین تأثیرلریندن و میللت لئشمه یه دوغرو گئدن یولون ایلک آددیملاری ایدی ، آردینجا پیشه وری نین قوردوقو میللی حاکیمییت گونئی آذربایجان توپلومونا هرجهت دن یئنیلیک گئتیرن و میللت لئشمئگ قایدا لارین ایفاده ائدن مفهوم داشییردی . بونا گوُره ده گوُنئی آذربایجاندا قورولان میللی دوولت فارس شوینیسمین غضب لئندیرسه ده ، آنجاق میللت دئیمی و میللت لئشمه پروسئسینه گئدن یولون طبیعی اینکیشاف مرحله سی اوُلدوقونا اینانیریق.

جامعه شیناس عالیم لرینین علمی ، ایجتماعی ، سیاسی ، فرهنگی ، دینی تحقیقات لارینا گوره میللت اوُلماقین شرط لری عیبارت دیر: مشترک تاریخه ، مشترک جغرافی اراضی لره ، مشترک ایقتصادیا تا ، واحید و مشترک دیله و اوُ دیلین چئشیدلی لهجه لرینده دانیشانلارین   مشترک فرهنگ ، کولتور ، عادت عنعنه لرینه ، دینه صاحیب اوُلان توپلوم میللت ساییلار . بئله بیر توپلوم میللت اوُلاراق بیرلیکده میللی ایراده یه دایاناراق ایراده اتدیگی زامان اوُز میللی دوولتین یارادا بیلر. و نتیجه ده میللت ـ دوُولت دئیمی عملده یارانیب ، اوُزحقیقی معناسین آشکار ائدیب ،اثبات ائدر.   یاشاسین آذربایجان تورک میللتی

« 1 ـ سرواژ» فئودالیسم چاقیندا ، فئوداللار کندچیلری " رعیت لری " یئرین اوستونده أشیاء کیمی ساتیلاردیلار.

گونئی آذربایجان سوسیال دمکرات پارتیسی طرفیندن ــ آذرخش ــ 2012 / 6 /12