یاشیل حرکاتی و بیز- اؤیرنجی
سیاستده دیل و اوسلوب چوخ اؤنملیدیر. فیکیرلریمیزی دوغرو و آنلاشیلیر شکیلده ایفاده ائتمسک حاق‌لی اولدوغوموز حالدا حاق‌سیز گؤرسنه بیلریک.
یاشیل حرکاتی و گونئی آذربایجان میللی حرکاتی آراسینداکی موناسبتی دوغرو، توتارلی و قاپساییجی شکیلده فورموله ائتمه‌میز گرکیر. اؤیرنجی نین بو هفته کی سیاسی یادداشتیندا بونو ائله مه یه چالیشاجاییق.
2009-دان گونوموزه قدر یاشیل حرکاتی جیدییه آلینماسی گرکن سیاسی حرکت اولدوغونو ثابیت ائله دی. بو حرکت راحاتجا بسیج اولدوغونو، گئنیش اجتماعی پایگاهی اولدوغونو، خاریجده چوخ گئنش و چشیدلی قوه‌لر طرفین‌دن ده دستکلندیگینی گؤرستدی. یاشیل حرکاتی مرکزگرا/مرکزیتچی بوتون قوه‌لرین چاتی/چتری حرکاتی حالینا دؤنوشدوگو چوخ آچیدیر. یاشیل حرکاتی چوخ قاتمانلی/لایه‌لی حرکت‌دیر. نئجه کی، هم دؤولت ایچینده هم ده میللت ایچینده کؤک‌لری اولدوغو گؤرسنیر.
یاشیل حرکاتی مرکزیتچی بوتون موخالیف قوه‌لرین بیرلیشدیگی نوقطه اولسا دا ایران رژیمینی دئییشدیربیله‌جک گوجه و ایمکانا چاتابیلمیر. 2009-دان گونوموزه قدر یاشیل حرکاتی ایستدیگی نتیجه نی آلابیلمه دیگی چوخ آچیقخا گؤرسنیر. یاشیل حرکاتی ایرانین بوتون پروبلئم و مسئله‌لرینی قاپسایان و ایرانداکی فرق‌لی صینیف و میللت‌لرین پروبلئم‌لرین حلینی ده ایچینه آلان اینسیجام‌لی، توتارلی و چوخ طرف‌لی سؤیلم/گوفتمان‌دان چوخ اوزاقدیر. نئجه کی، میر حسین موسوی و مهدی کروبی‌نین ایمضاسی‌نین داشییان منشور/بیلدیرگه یاشیل حرکاتی‌نین اؤز ایچینده جیدی تنقیدلر آلدی. اصلینده بو موشکول یاشیل حرکاتی‌نین لیدئر و بدنه سی آراسینداکی سیاسی هدف‌لرین فرقلیلیگین‌دن قایناق‌لانیر. یاشیل حرکاتین لیدئرلری رفورم آختاریرکن یاشیل حرکاتین بدنه‌سی رژیم دئییش‌دیرمک ایسته ییر. یاشیل حرکاتی‌نین سؤیلمی/گوفتمانی ایرانداکی بیر-چوخ موشکولو حل ائده‌جک نوقطه‌ده دئییل. یاشیل حرکاتی ایشچی، کارمند، گلنکسل اورتا صینیف (طبقه متوسط سنتی) و دیگر بیر چوخ توپلومسال طبقه نی یانینا چکه بیلمه میش. یاشیل حرکاتی ایرانداکی فارس اولمایان میللت‌لر اوچون ده اومود قاپی‌سی دئییل. چونکو اونلار اوچون نه ائدجه یی بلیرسیزدیر. یاشیل حرکاتی ایرانداکی فارس اولمایان دیگر میللت‌لرین پروبلئم‌لری‌نین اساسی پروبلئم و اساسی تضاد اولا‌راق گؤرمور. آنجاق فارس اولمایان دیگر میللت‌لرین گؤزونده میللی ستم اساسی مسئله لردن و اساسی تضادلاردان بیری‌دیر. یاشیل حرکاتی فارس میللیتچی‌لیگی‌نین ایفلاس ائتدیگینی و ایرانداکی فارس اولمایان دیگر میللت‌لرین چوخ فرق‌لی طلب‌لر و ایستک‌لره صاحب اولدوغونو گؤرمور ویا گؤرمک ایسته میر.
یاشیل حرکاتی‌نین قاپساییجی سؤیلم/گوفتمانا صاحب اولماماسی ندنی ایله ایرانداکی بوتون موخالیف قوه‌لری بسیج ائده‌جک گوجو یوخ‌دور. رژیمین سرکوب/باسدیرما مکانیزماسی‌نین قارشی‌سیندا شیکست یئییر. یاشیل حرکاتی ایران رژیمینی شیکست وئره بیلمه‌سه ده رژیم ده اونو بیتیره بیلمیر. 2009-دان گونوموزه قدر اؤز وارلیغینی سوردورمه یی باشرمیش‌دیر. بو دوروم چوخ اؤنملیدیر.
گونئی آذربایجان میللی حرکاتی‌نین یاشیل حرکاتینا باخیشی مورکب‌دیر. مشهور میللی فعال عباس لسانی “بیز یاشیل حرکاتینی معنوی و عاطیفی اولا‌راق حمایه ائدیریک، آنجاق عملی اولا‌راق بو پروسه‌سین ایچینده دئییلیک” سؤزو میللی حرکاتی‌نین باخیشی‌نین مورککب‌لیگی‌نین گؤستریجی‌سی‌دیر. گونئی آذربایجان میللی حرکاتی دموکراسی و اینسان حاق‌لاری‌نین طرفداری‌دیر. اونا گؤره ایران رژیمی‌نین یاشیل حرکاتینا یؤنه‌لیک سرت، باسقیجی و وحشی سیاستینی تایید ائتمه‌سی مومکون دئییل. یاشیل حرکاتی، خامنه ای نی و احمدی نژادی و ایرانداکی رژیمی ایستدیگی شکیلده تنقید ائده بیلر و اونون علیهینده میتینگ و گؤستری دوزنلییه بیلر. بوتون بون‌لار اونون دموکراتیک حاققی‌دیر. بو دموکراتیک حاقی اونلارین الین‌دن آلماق دوغرو دئییل. دموکراتیک حاققینی ایستیفاده ائدن‌لره قارشی گولله، باتوم، زین‌دان وب. شکیلده سرکوب وسیله لریله جواب وئرمک دوغرو دئییل و بونو قبول ائتمک ده مومکون دئییل. ایران‌لی‌لاری ایلک اولا‌راق دموکراسی ایله تانیش ائدن آذربایجانین بئله اولغون/بالیغ و اصیل بیر نوقطه‌ده دوردوغونون بیلینمه‌سی لازیم‌دیر.
هم گونئی آذربایجان میللی حرکاتی و هم ده آذربایجان –تورک میللتی‌نین هارداسا هامیسی ساییلا‌جاق بؤیوک حیسه‌سی‌نین عملی اولا‌راق بو ایشین ایچینده اولماق ایستمه مکده دیرلر. آذربایجان‌لی‌لارا گؤره یاشیل حرکاتی فارس میللیتچی ایدولوژی‌سی‌نین یئنی شکلی‌دیر. آذربایجان‌لی‌لارا گؤره تاریخی تجروبه‌لرین ده گؤستردیگی کیمین فارس میللیتچی‌لیک ایدولوژیسیله ایراندا دموکراتیک بیر دوزن/نیظام قورماق مومکون دئییل. آذربایجان‌لی‌لارا گؤره گئرچک/حقیقی، ساغ‌لیق‌لی، سوردورله بیلیر، باریشچیل و قاپسایاجی/جامع دموکراسی ایرانداکی فارس اولمایان دیگر میللت‌لرین وارلیق‌لاری‌نین قبولو ایله مومکون‌دور. گونوموزه قدر تجروبه ائتدیگیمیز ایران‌دان فرق‌لی بیر ایران ایسته ییریکسه اوندا گرک ایرانداکی میللت‌لر آراسیندا یعنی، عدالت‌لی و هر تور شؤونیست مئیل‌لردن اوزاق یئنی پیمان/سؤزلشمه ایمضالانما‌لی‌دیر. یاشیل حرکاتی، آزربایجانین بو لیبرال/دموکراتیک طلبینی آنالایاجاق قدر دموکراتیک اولغونلوغا مالیک دئییل. آذربایجان‌لی‌لارا گؤره یاشیل حرکاتی‌نین بو تجروبه‌سیزلیگی چوخ خطرناکدیر.
یاشیل حرکاتی‌نین طرفدارلاری آذربایجان-ین بو دوروشونو جیدییه آلماق ایسته میرلر. چونکو فارس اولمایان باشقا میللت‌لرین بوگون هانسی نوقطه‌ده اولدوغونون بیلمیرلر. بوگون ایران-ین هر یئرینده تورک-فارس آیریمی(تبعیضی) واردیر. تورک‌لرین بؤیوک حیسه‌سی داها فارس‌لاری اؤزون‌دن حساب ائتمیر. یاشیل حرکاتی تورک‌لرین فارس‌لاردان یاواش یاواش بیگانلشدیگینی آنالامیرلار. تورک‌لر فارس‌لاری دوشمن اولا‌راق گؤرمه‌سه‌لر ده اونلاردان اوزاقلاشیرلار. دویغو، دوشونجه و هوویت بیرلیکده‌لیگی یاواش یاواش داغیلیر. یاشیل حرکاتی بوتون بو جامعه شناختی گئرچک‌لری گؤربیلمه جسارتی گؤسترمک یئرینه گونئی آذربایجان میللی حرکاتینی تحقیر ائتمکله مشغول‌دور. تحقیر ائتمک مسئله نی حل ائتمه دیگی کیمین بیگانه‌لیگی داها دا درینلشدیریر.
آذربایجان-تورک میللتی فارس‌لاری دوشمن اولا‌راق گؤرمور آنجاق اؤزون‌دن ده گؤرمور. آذربایجان-تورک میللتی شوونیست و فاشیست فارس میللیتچی‌لیگی ایله دوشمن‌دیر. فارس میللیتچی‌لیگی ایله فارس عینی شئی دئییل. نئجه کی فارس میللیتچی‌لیگی‌نین ایلک بؤیوک تئورئیسیین‌لری تورک اولوب‌لار. گونئی آذربایجان میللی حرکاتی‌نین ایرقچی گؤرستمک اوچون اونو فارس دوشمنی شکلینده گؤرستمک ایسته ییرلر. بیزلر فارس دوشمن دئییلیک آما فارس‌لارلا دا عینی میللت‌دن دئییلیک. فرق‌لی میللت‌دن اولماق دوشمن‌لیک آنلامینا گلمز. ایرانداکی آذربایجان-تورک میللتی بئله اولغون و ساغلام نوقطه‌ده دوروب‌لار. تورک‌لر و فارس‌لار آراسینداکی بو بیگانلشمه یوز ایل-ه یاخین آسیمیلاسیون سیاستی‌نین نتیجه‌سی‌دیر. یاشیل حرکاتی یوز ایللیک آسیمیلاسیون سیاستی چوخ فرق‌لی نتیجه‌لر وئردیگینی گؤربیلمیر.
یاشیل حرکاتی ایرانداکی جامعه شناختی دئییشیمی گؤرمک ایسته ییرسه گونئی آذربایجان میللی حرکاتینا باخماسین، 2009-دان گونوموزه آذربایجانین بوتؤولوکده سس‌سیزلیگینه باخسین. آذربایجانین سس‌سیزلیگی چوخ آنلام‌لی‌دیر. یاشیل حرکاتی بو مسئله ده جدی تناقض/چئلیشگی‌لرله قارشی قارشی یا‌دیر. بیر طرف‌دن دئییرلر کی آذربایجان-ین عصیانینی گونئی آذربایجان میللی حرکاتی انگلله ییر. دیگر طرف‌دن ده گونئی آذربایجان میللی حرکاتینی کؤک‌سوز، ریشه‌سیز و آذربایجان‌لی‌لار طرفین‌دن دستک گؤرمه‌ین حرکت اولا‌راق گؤرسه دیرلر. دونیانین هاراسیندا کؤک‌سوز و ریشه‌سیز بیر حرکت 30 میلیون اینسانین عصیانینی انگلله یه بیلر؟. یاشیل حرکاتی بو تناقض لاری آنالماق ایسته میر. آما حقیقت باشقا یئردیر. 30 میلیون آذربایجان تورکونون سس‌سیزلیگی فقط گونئی آذربایجان میللی حرکاتی‌نین ایشی دئییل. بو سس‌سیزلیک آذربایجان-تورک میللتی‌نین عمومی فیکریدیر. یاشیل حرکاتی بو عمومی فیکرین آخاسیندا یاتان سبب‌لری اؤیرنمک ایسته میرلر.
2009-دان گونوموزه یاشیل حرکاتی‌نین سؤیلمینده هر هانسی بیر دئییشیک‌لیک اولمادی. گؤرونن او کی بوگون‌دن بئله اولماسی چتین‌دیر ویا اولسا بئله میللتی اینان‌دیرماق چتین اولا‌جاق. گلیدیگیمیز نوقطه‌ده آچیق دئیه بیلریک کی یول‌لاریمیز آیریلمیش. یول‌لاریمیز آیریلسا دا برگ برنده بیزیم الیمیزده‌دیر. چونکو یاشیل حرکاتی ایران رژیمینی دئویره بیلمیر و عینی زاماندا ایران رژیمی ده یاشیل حرکاتینی بیتیره بیلمیر. وار اولان پات دورومو بیزم اوچون تاریخی فورصت‌دیر. یاخین گله‌جکده الیمیزه تاریخی فورصت دوشه جگی چوخ آچیق‌دیر. باشقا بیر ایفاده ایله ایران رژیمینی آخیرته گؤندرمک یئنه ده بیزیم بوینوموزا دوشه‌جک. گلدیگیمیز نوقطه‌ده میللی حرکاتیمیز یاواش یاواش حاضیرلانما‌لی‌دیر. ایراندا و بؤلگه‌ده شرط‌لر دئییشمیش و یئنی بیر صحیفه آچیلمیش‌دیر. ایندی بیزیم ده یئنی صحیفه آچمامیز تاریخی بیر ضرورتدیر.
گلجک بیزیمدیر.
