Avacıq kəndinin adı dəyişdirilir
AZOH: Fars şovinist rejiminin anti-türk siyasətinin tərkib hissəsi olaraq Güney Azərbaycanda coğrafi adların dəyişdirilməsi davam etdirilir. Belə ki, Güney Azərbaycanın Maku şəhərinin 30 kilometrliyində yerləşən Avacıq kəndinin adı Dəştək olaraq dəyişdirilir. Bu barədə ilk addım Bəxşdari (Maku şəhər İcra Hakimiyyətinə bağlı idarədir) tərəfindən atılıb. Artıq Bəxşdarinin qapısı önündə Avacıq deyil, Dəştək sözü yazılıb. Avacıq sözü iki hissədən ibarətdir. «Ava» və ya «ova» türk dilində abadanlıq və ya yaşayış yeri kimi mənasını verir. «Cıq» isə kiçiltmə şəkilçisidir. Maku şəhərində buna oxşar adlara bir neçə yerdə rast gəlmək mümkündür. Məsələn, Baxçacıq, Qalacıq, Bəbəcik və s. Qeyd edək ki, şəhər əhalisi Bəxşdarinin bu əməlindən olduqca narahatdır və coğrafi adın heç bir izahı olmadan dəyişdirməsini hörmətsizlik kimi qəbul edirlər.