گوناسکام-ین میللی بیرلیک ایلی و 13 فروردین ایله باغلی آیلیق یازیسی
1390 اینجی ایلین باشلاماسی گونئی آذربایجان میللی حرکتی آچی‌سین‌دان 2 اؤنم‌لی اولای ایله ایچ ایچه اولموش‌دور. بیرینجی اولای، بیر قروپ اؤیرنجی طرفین‌دن 1390 اینجی ایلین میللی بیرلیک ایلی اولا‌راق اعلان ائدیلمه‌سی، ایکینجی اولای ایسه 13 فروردین اورمو گؤلونون قوروماسی ایله باغلی آذربایجان شهرلرین‌دکی گرچک‌لش‌دیریلن اعتراضلار اولموش‌دور. گوناسکام’ین بو آیکی یازی‌سیندا بو ایکی اولای حاققینداکی فیکیر‌لریمیزی اورتایا قویاجاییق.
1. هر بیر حرکتین باشارییا چاتماسی و سونوچ الده ائتمه‌سی اوچون بیرلیک روحونون اولوشماسی ان اؤنم‌لی مسئله‌لری‌دن بیری‌سی‌دیر. بو بیرلیک اورتاق هدفه گئدن یعنی؛ آذربایجان اینسانی‌نین میللی رفاهینی تامین ائله مک اولا‌راق گؤرولدوگونده، داها آچیق بیر شکیلده اؤزونو گؤرستمکده‌دیر. میللی حرکت بل‌لی بیر حزب، تشکیلات و قروبا باغلی اولمادیغی اوچون اونون ایچری‌سینده فرق‌لی دوشونجه‌لرین اولماسی طبیعی‌دیر. آما بو فرق‌لی دوشونجه‌لرین اؤته‌سینده آذربایجان میللی حرکتی آذربایجان اینسانینا گؤزل بیر گله‌جک وعد ائتمکده‌دیر. بو بوتون قروپ‌لارین اورتاق گؤروشودور. بیرلیگین یارانماسی اوچون بیز فرق‌لی‌لیک‌لریمیزدن داها چوخ اورتاق یان‌لاریمیزی اورتایا چیخاردیب میللی حرکته بیر یول خریته‌سی اولوشدورمامیز لازیم‌دیر. البته کی هر موضوع حاقیندا بیرلشمک رئال بیر مسئله دئییل‌دیر. آما گونئی آذربایجان’ین میللی مسئله‌لرینی ماراقلان‌دیران موضولار اوستونده بیرلشدیک‌دن سونرا، آرامیزداکی ایختیلاف‌لاری دا ان آزا ائندیربیلریک. بیز بیرلیک مسئله‌سینده ایکی نوقطه‌یه دقت ائتمه لیگیک. بیرینجی‌سی بیرلیگین یارانماسی ایله آرامیزداکی ایختیلاف‌لار آزالا‌جاق. ایکینجی‌سی ایسه بیرلیک ایله گوجوموزو داها دا آرتیریب و هدفه دوغرو داها دا گولجو بیر شکیلده ایلری گئدبیلریک. گوناسکام اولا‌راق هر زامان بیرلیک چابا‌لارینی دستکلدیک و اؤیرنجی‌لرین بو چاباسینا دستک وئریریک.
2. 13 فروردین 1390 گونو گونئی آذربایجان’ین باشدا تبریز و اورمو اولماق اوزره بیر نئچه شهرلرین‌دکی اورمو گؤلونون قوروماسینا اعتراض آکسیا‌لارینی بیر نئچه آچی‌دان آنالیز ائتمک مومکون‌دور. بو اعتراض آکسیا‌لاری ایله بیرلیکده آذربایجان اینسانی و آذربایجان میللی حرکتی اؤز مسئله‌لرینه لاقئید قالمادیغینی آچیق بیر شکیلده گؤسترمیش‌دیر. آرتیق آذربایجان توپلومو میللی حرکتین ایستک‌لرینی دقته آلا‌راق اونا دستک وئرمکده‌دیر. بو اعتراضلارا بیر باشقا آچی‌دان دیرلندیریسک آذربایجان’ی سس‌سیزلیک ایله سوچلایان‌لارا دا جاواب اولموش‌دور. آما بو اعتراضلار البته کی آذربایجان توپلومونو سوچلایان‌لارا جواب اولسون دئیه اولوشمامیش‌دیر. آذربایجان توپلومو و میللی حرکتین اؤزونه گؤره حرکت طرزی واردیر. شرایطی دقته آلا‌راق اونا گؤره اؤزونه نئجه حرکت ائدبیلمه یول‌لارینی سئچمکده‌دیر. اونون اوچون آذربایجان’داکی سیاسی فضانی آنلاماق اوچون، او توپلومون تاریخسل آرخا پلانینا و یاپی‌سینا (ساختارینا) باخماق لازیم‌دیر. 13 فروردین آکسیا‌لاری رئژیم قارشیدی حرکت اولماسا دا یئنه 70’دن چوخ آذربایجان تورک اینسانی توتوقلانمیش‌دیر. بو دا مرکزی حکومتین آذربایجان’داکی اولای‌لار قارشی‌سیندا نه قدر حسساس اولدوغونو گؤرستمکده‌دیر.
گوناسکام اولا‌راق، 1390 ایلین میللی بیرلیک ایلی اولماسینی دستکله‌ییب، 13 فروردین گونونده توتوق‌لانان سویداش‌لاریمیزین تئزلیکله آزاد ائدیلمه‌سینی طلب ائدیریک.
