AZOH: İranda tanınmış azərbaycanlı fəal Vahid Rastqu azadlığa buraxılıb. Soydaşımız İran İnformasiya, Təhlükəsizlik və Kəşfiyyat Nazirliyinin («Ettelaat») əməkdaşları tərəfindən iyunun 27-də atasının evində həbs olunub. Azərbaycanlı fəal 23 gün «Ettelaat»ın təkdamlıq kamerasında saxlanıldıqdan sonra Təbrizin mərkəzi həbsxanasından köçürülüb. Sonradan Vahid Rastqu Təbriz İnqilab Məhkəməsinin birinci şöbəsində hakim Rəhim Həmlbərin sədrliyilə keçirilən iclasda hakimiyyətin əleyhinə təbliğat aparmaq, ölkənin milli təhlükəsizliyini pozmağa cəhd göstərmək və İranın ali dini liderini təhqir etməkdə günahlandırılaraq 6 ayı şərti olmaqla bir il həbs cəzasına məhkum edilib.

Qeyd edək ki, İran qanunlarına görə, həbs müddətinin yarısını çəkən məhbuslar cəzasının çəkilməmiş hissəsindən azad olunurlar. Bəzi hallarda onların təcridxanada saxlanıldıqları müddət də nəzərə alınır.