گونئی آذربایجان سوسیال دئموکرات پارتی‌سی: ۲۱ آذر حرکاتی‌نین ۶۷-جی ایلدؤنومو ایله باغلی بیل‌دیری
۲۱ آذر حرکاتی‌نین ۶۷-جی ایلدؤنومو ایله باغلی بیل‌دیری!
سایقی‌لی وطنداش‌لار!
بؤیوک ۲۱ آذر حرکاتی‌نین قلبه‌سی و میللی حکومتیمیزین یارادیلماسین‌دان ۶۷ ایل کئچیر. آذربایجانین تاریخ بویو قهرمان‌لیقلا دولو اولان زنگین تاریخی‌نین ان پارلاق صحیفه‌لرین‌دن بیری اولان و قیزیل حرف‌لرله یازیلان بو تاریخی حرکات و اونون یاراتدیغی میللی حکومتی‌نین اؤمرو آز اولسادا،اونون گونئی آذربایجانین اجتماعی، سیاسی و مدنی حیاتیندا اوینادیغی رول،بوراخدیغی ائتگی و قویدوغو ایز اولدوقجا بؤیوک اولموش‌دور.۲۱ آذر حرکاتی،فارس فاشیزمی و ایران آدلانان دؤولتین گونئی آذربایجاندا موستملکچی‌لیک سیاستی اساسیندا تورک میللتیمیزی یوخ ائتمه پلان‌لارینا و اونون تؤرتدیگی بوتون جینایت‌لرینه قارشی سرت جاواب اولا‌راق گؤرکم‌لی اجتماعی-سیاسی خادیم میر جعفر پیشه وری باشدا اولماق اوزره آذربایجان دئموکرات فیرقه‌سی‌نین اؤندرلیگینده،میللی قورتولوش موجادیله‌سینی باشلاتمیش و اونون سیمگه‌سینه چئوریلمیش‌دیر.گونئی آذربایجاندا یورودولن بو قئیری اینسانی سیاست‌دن دولایی، میللتلشمه سورجی‌نین قارشی‌سی آلینیب و اونون بیر میللت کیمی فورمالاشماسیندا جدی مانه‌لر و انگل‌لر یارادیلمیش‌دیر.۲۱ آذر حرکاتی‌نین اؤز اونودولماز تاریخی نایلیت‌لریله یاناشی،ان بؤیوک و اؤنم‌لی خیدمت‌لرین‌دن بیری میللتلشمه سورجی‌نین قارشی‌سیندا دوران انگل‌لری آرا‌دان قال‌دیرماقلا، اونون ایلک و اساسی تملینی قویموش و آذربایجان سورونونو “بیرلشمیش میللت‌لر تشکیلاتینا” چیخارماقلا، آذربایجان تورک‌لری‌نین بیر موستقیل میللت کیمی وار اولدوغونو دویایا اعلان ائتمیش‌دیر.
بیز بورادا ۲۱ آذر حرکاتی و اونون الده ائتدیگی بؤیوک و اینانیلماز نایلیت‌لری حاقیندا یازماق نیتیمیز یوخ‌دور چونکی،ایندییه قدر بو حاقدا کیفایت قدر یازی و ده یرلی اثرلر یازیلمیش‌دیر، باخمایا‌راق کی،فارس شووینیزمی و بوتون ساغچی،سولچو و دینچی پانیرانیست‌لر هر زامان اونا قارشی نیفرت دولو یازی‌لارلا چیخیش ائدیب و بوتون گرچک‌لری تحریف ائتمکله اونو ساختالاشدیرماغا چالیشمیش‌لار.
آذربایجان میللی حکومتی ساده‌جه بیر ایل یاشاییب،آنجاق میللتیمیز اونون قیسا حاکمیتی دؤورونده آزاد و قورورلو بیر میللت کیمی یاشامانین دادی و لذتینی آنلاییب و اونودولماز بیر گونده،جینایتکار پهلوی رئژیمی باشدا اولماق اوزره قددار پهلوی رئژیمی و ایران آدلانان دؤولتین اسارتی و اونون بویوندوروغو آلتیندا یاشاماق‌دان قورتارماغی باجارمیشدی.
۲۱ آذر حرکاتینی یارا‌دان و اونو بؤیوک قلبه‌لره دوغرو آپاران اساسی ندن‌لر دییشیلمه‌دن،اونون تام وحشیجه‌سینه قان قؤلونده بوغولماسین‌دان ۶۶ ایل کئچمه‌سینه رغمن یئنی ندن‌لرده علاوه اولا‌راق قالماقدا‌دیرلار.آنجاق،گونئی آذربایجاندا بیزی ایران چرچیوه‌سینده موختاریت اوغروندا موجادیله‌یه آپاران او گونکو سیاسی شرط‌لر و سیاسی دوروم بو گون تامامیله دییشمیش‌دیر.سون ۶۷ ایلده هم ایران آدلانان اؤلکه‌دکی سیاسی شرط‌لر و سیاسی دوروم،ائله‌جه‌ده بؤلگه‌میزدکی و دونیا چاپیندا اولان بؤیوک دئییشیک‌لیک‌لر،او زامانکی سیاسی دورومو تامامیله آلتوست ائتمیش‌دیر.دوننکی ندن‌لری و سیاسی شرط‌لری گونئی آذربایجانین بو گونکو شرایطینه اویقولاماغا چالیشان و اؤزلرینی تامامیله حاق‌لی بیلن بو مکزیتچی آذربایجان‌لی فئدئرالچی سولچولار، تاریخ‌دن، الده ائدیلن بؤیوک و ده یرلی تاریخی تجروبه‌لردن، همده دونیادا باش وئرن بو اؤنم‌لی دئییشیک‌لیک‌لردن هئچ نه اؤیرنمه‌دن و تاسفله اؤیرنمه‌یه‌ده مئییل‌لی اولمایان،بوتون بون‌لاری گؤرممزلیک‌دن گلیب و بو گون اعتبارینی تامامیله ایتیرن ۲۱ آذر حرکاتی‌نین ایستک‌لرینی و اونون ائتدیگی تاریخی ختا‌لاری بو گون بیر داها تکرار ائتمک ایسته ییرلر.اونلار بیلمیرلر کی،تاریخ بیر دفعه تراژئدی بیر دفعه‌ده کومئدی شکلینده تکرار اولور.۲۱ آذر حرکاتی‌نین ائتدیگی ختا و تاریخی سهو‌لرین‌دن درس آلیب و اونون تجروبه‌لرین‌دن فایدالانماقلا اوندان چوخ اؤیرنه‌جک‌لریمیز وار،لاکین اونون سهو و ختا‌لارینی تکرار ائتمه‌یه اصلا و اصلا حاقیمیز یوخ‌دور.۲۱ آذر حرکاتی‌نین ان اؤنم‌لی و هر زامان‌دان هاهادا چوخ زروری و واجیب اولان درس‌لرین‌دن بیری میللی بیرلیگیمیزله بیرگه سیاسی بیرلیگیمیزین ساغلانماسی و جدی بیر گوج مرکزینه چئوریلمه‌میزدیر.باشدا میر جعفر پیشه وری اولماق اوزره ۲۱ آذر حرکاتی آدیندا حماسنی یارا‌دان بوتون اؤندرلریمیز و فدایی‌لریمیزین،اؤزل‌لیکله ده یرلی جان‌لارینی هئچ ترددود ائتمه‌دن قوتسال وطن اوغروندا،ائله‌جه‌ده بو حرکاتین بؤیوک و اینسانی آما‌لی اوچون فدا ائدن بوتون بو اینسان‌لاریمیزین قارشی‌سیندا باش اییب، اولو خاطره‌لرینی عزیز توتوب و دؤولتچیلیگیمیزین تاریخینده دؤنوش نقطه‌سی اولان ۲۱ آذر گونونو قورورلا یاد ائدیریک.
یاشاسین ۲۱ آذر حرکاتی‌نین ابه‌دی خاطره‌سی!
عشق اولسون بو یولدا جان‌لارینی فدا ائدن بوتون فدایی‌لریمیزه!
یاشاسین ایستیقلالیت یولوندا بیرلیگیمیز و برابرلیگیمیز!
گونئی آذربایجان سوسیال دئموکرات پارتی‌سی
