NATO və üsyançılar Qəzzafinin sülh təklifini rədd etdilər
AZOH: Liviya lideri Müəmmər Qəzzafi havadan zərbələrin dayandırlması üçün NATO ilə danışıqlara hazır olduğunu bəyan edib
NATO və Liviya üsyançıları Polkovnik Qəzzafinin atəşkəsə dair danışıqlara başlamaq təklifini rədd ediblər.
NATO bildirib ki, Qəzzafinin hökumət qüvvələri mülki əhali üzərinə hücumlarını dayandırmayanadək heç bir danışıqdan söhbət gedə bilməz.
Üsyançılar əsas şəhərləri olan Benqazidə bəyan ediblər ki, polkovnikin bu təklifi də etibarsızdır və əvvəllər işlətdiyi fəndin növbətisidir.
Bundan bir qədər əvvəl Liviya lideri Müəmmər Qəzzafi havadan zərbələrin dayandırlması üçün NATO ilə danışıqlara hazır olduğunu bəyan etmişdi.
Ötən gecə televiziya ilə yayınlanan çıxışında Qəzzafi deyib ki, o, atəşkəsə hazırdır, bir şərtlə ki, ona bütün tərəflər əməl etsin.
Bununla belə, özünün 80 dəqiqəlik çıxışında o vurğulayıb ki, qiyamçıların və Liviya üzərinə hava reydlərini dəstəkləyən ölkələrin tələblərinə uyğun olaraq vəzifəsindən getmək fikrində deyil.
Elə onun danışdığı dəqiqələrdə NATO Tripoliyə, inzibati binalara ən azı üç raket zərbəsi endirib.
Liviya rəsmiləri NATO-nu birbaşa polkovnik Qəzzafini vurmağa cəhd etməkdə ittiham edirlər.
Qəzzafinin bu çıxışı da etiraf və inadkarlığın qarışığı olub.
Hərçənd, bu dəfə o, qiyamçılar barədə yumşaq dillə danışmağa çalışıb.
O quyamçıları silahı yerə qoymağa çağırıb və “muzdlu” adlandırdığı xarici qüvvələri ittiham edib.
Bununla belə, cəbhə xəttində hökumət qüvvələrinin hərəkətlərində yumşalma hiss olunmur.
Qiyamçıların nəzarətində olan məntəqələr atəşə tutulur, Misrata şəhərinin müdafiəçilərinə isə Çərşənbə Axşamınadək ya təslim olmaq, ya da hökumətin dediyi kimi “odda yanmaq” təklif olunub.
Polkovnik Qəzzafi isə deyib ki, indi hər bir Liviyalı üçün iki yol qalır: “Ya azadlıq, ya ölüm”.
O deyib ki, təslim olmayacaq, qorxmayacaq və heç yerə getməyəcək.
BBC