دونیا آنادیلی گونو ایله باغلی اورتاق بیلدیری
آذربایجان تورکجه سی رسمی دوولت دیلی اولمالی دیر.
۲۱ فئورال دونیا آنادیلی گونو ، دیللری یوخ اولما تهلوکهسی ایله قارشی قارشیدا اولان میللتلر اوچون سئچیلمیشدیر. 1999 ایلدن اعتیبارا بيرلشميش میللتلر تشكيلاتینین آلدیغی قرار اوزره ۲۱ فئورال دونیا آنادیلی گونو آدلانمیش و بوتون اؤلکهلرده بایرام کیمی قئید اولونور و نه یازیق کی، بونونلا بئله آنادیلی بایرامینا جان و دیلدن قاتیلان میللتیمیز هله ده دیل حاقلارینا مالیک اولمامیش، هله ده تاپداقلار آلتیندا ازیلمکدهدیر.
بیر میللتین وارلیقی توپراق، تاریخ و هر بیر وارلیقدان اونجه اونون دیلی حئساب اولونور. اونون اوچون ده استعمار بیر میللتی اوز مستعمره سینه چئویرمک اوچون ایلک اونون دیلینی الیندن آلماقا چالیشیر و آذربایجان میللی حرکتینین موباریزهسینین مرکزینده دیلیمیزین یاساق اولماسی یاتماقدادیر. اونا گؤره ده 21 فئورال گونونده آذربایجان میللی حرکتی فعاللاری بوگونو آذربایجانین هر طرفینده چئشیدلی شکیللرده قوتلاماقلاری لازیمدیر و اؤز دیلیمیزه صاحب چیخاراق و تورک دیلینده مدرسه شعاری ایله هر یئرده بو گونو عزیزله مه لییک..
دونیا آنادیلی گونو عرفهسینده بو بایرامی، دیل حاقلاریندان یوخسون قالان بوتون اینسانلارا، خصوصیله ده آذربایجان تورک میللتینه تبریک ائدیب، هامینی اؤلکهده دیل قاداغاسی علئیهینه اعتیراض سسلرینی اوجالتماغا و بو یاساقلارین آرادان قالدیریلماسیندا باشلانان حرکتلره یاردیمجی اولماغا چاغیریریق.
دؤلت اورقانلاري بیلرکدن، آذربایجان تورکلرینی سسسیزجه اریدیب، ایتیرمگه چالیشیر.ایران اسلام جمهوریتی رئژیمی نین اؤلکه ده فارس اولمایان میللت لرین دیللرینه قویدوغو قانونسوز قاداغانی محکوم ائدیب، بو سیاستی غئیری اینسانی و غئیری مدنی اولدوغوندان قیناییب، ایراندا تورک نوفوسونون سایی سینا اساسلاناراق، آذربایجان تورکجه سینین رسمی دوولت دیلی اولماسینی ایسته ییریک.
گوج، بیرلیکده دیر...
آذربایجان اویرنجی حرکاتی- آذوح
گونئی آذربایجان دئموکرات پارتیاسی- گادپ
گونئی آذربایجان لیبرال دئموکرات پارتیاسی- گالدپ
گونئی آذربایجان میللی دئموکراتیک بیرلییی- بیرلیک
گونئی آذربایجان قورتولوش پارتیاسی- گاقپ
18-02-2013