عزیزو دئیئرلی آذربایجانلی وطنداشلار!

دونیا " آنا دیلی" گوُنونون عرفه سینده یک . فئورال آیی نین 21 ـ ( اسفند آیی نین 2 سی)

اولوسلار آراسی " آنا دیلی گوُنو" کیمی تانینان بوگوُن ، 1999 ینجی ایلین نویابیریندا بنگلادش دوُولتی طرفیندن یونسکوویا تکلیف ائدیلرئک ، اوُنون 30 اونجو عمومی یغینجاغیندا تصدیق ائدیلمیشدیر. دیل هئر میللتین مین ایللردن بئری نئسیللردن ـ نئسیللره قالان أن بوُیوک ثروت وتاریخی ایرثی کیمی ، بیرمیللتین أن دئیئرلی وارلیغی سایلیراوُز تاریخی گئلیشمه سی ودوُلغونلاشماسی ایله اوزون بیرتاریخی سوُره جین محصولودور. بوجهتدن ده دیل ، هئر میللتین وارلیغی نین تئمئلی اوُلوب وهئربیر میللت آنجاق اوُزآنا دیلی ایله تانینیب و تمثیل اوُلونور.

دیل وارسا میللت ده وار، دیل اوُلورسه میللت ده اوُلور، نئجه کی بشرییت تاریخینده یوزلرومینلرله میللت ـ خالق واتنیکلر، حتی بوُیوک دوولت لر یارادیب اوزون ایللراوُزحاکیمییت لرینی سوردوره ن میللت لرچئشیتلی سبب لردن دولایی ، آنا دیللرینی قورویوب ساخلییا بیلمه دیکلری اوچون باشقا و داها دوغروسوگوجلو میللت و خالق لارا یئم اوُلاراق اوُنلارین ایچینده أرییب ، تاریخ صحنه سیندن یوُخ اوُلوب تامامیله سیلین میشلروبو گوُن بیرچوخونون ساده جه آدلاری بیزه گئلیب چاتمیشدیر.

آنا دیلی ، هئراینسانین گئلیشیب واوُنون شخصییتی نین شئکیللنمه سینده بوُیوک و اساسی رول اوُینایر. بو نئدنله ده هئر بیر اینسانین ایلک اوُخولدان اونیورسیته یه قدراوُزآنا دیلینده تحصیل آلماسی أن واجیب وضروری مسئله اوُلسادا ، عینی حالدا اوُنون أن کیچیک و أن ایلکین طبیعی حاق لاریندان ساییلیر. بو باخیمدان هئر بیراینسانین و بوُیوک اوُلچوده هئربیرمیللتین اوُز آنا دیلینده یازیب اوُخوماسی وتحصیل آلماسی نین یاساقلانماسی، یالنیز اوُ اینسان و میللته قارشی یوُخ ، بئلکه بوتون بشرییته قارشی اوُلان بوُیوک جینایت ساییلار.

دیل اینسانلار آراسیندا بیراوُنسییت واسیطه سی اوُلسادا ، آنجاق بو گوُن دوُنیانین بیرچوخ اوُلکه لرینده توتالیتر رژیم لرین آپاردیغی ایرقچی و شوینیستی سیاست لریندن دولایی ، دیل داها بیراوُنسییت واسیطه سی یوُخ ، بئلکه بیرمیللتین یا خود حاکیم میللت لرین باشقا میللت لره قارشی اوُزهئگئمونلوک لارینی تأمین اتمئک اوچون أن کئسرلی سیلاح و اوُنئملی بیروسیله ساییلیر. بونا آیدین اوُرنک ، ایران آدلانان اوُلکه ده سوُن 90 ایلده فارس فاشیزمینین تمثیلچیلری اوُلان قددارپهلوی و جینایتکارایسلام رژیم لری دیر.

بوگوُن ایران آدلانا اوُلکه ده 35 میلیونلوق تورک میللتی ، ائله جه ده 20 میلیونا یاخین عرب ، تورکمن ، کوُرد ، بلوچ ، لرُ ، گیلئک ، تالیش ، و باشقا آزلیقلارین اوُز آنا دیللرینده تحصیل آلماسینا قاداغا قویولوب ، یازیب اوُخوماقدان تامامیله محروم ائدیلمه سی فارس فاشیزمی نین بو میللت لره قارشی باغیشلانمازدهشتلی جینایت لریندن ساده جه کیچیک بیر اوُرنک دیر. ایران ایسلام رژیمی بو حاقدا حتی اوُز یازدیغی و قوندارما مجلیسینده تصدیق اتدیی آنا یاساسینی آیاق آلتینا قوُیاراق ، اوُنون 15 ینجی ماده سینده  فارس اوُلمییان میللت لرین اوُز آنا دیللرینده تحصیل آلمالاری نین تصدیق ائدیلمه سینه رغمن اوُنون حئیاتا کئچیریلمه سی 34 ایلدن سوُنرا هئله ده اوُزحللینی تاپمامیشدیر.

بو گوُن ایران آدلانان اوُلکه ده ، آنا دیلینده تحصیل بوتون غیرفارس میللت لرین اوُزللیکله ده آذربایجان تورک میللتی نین گوُنده مینده اوُلان بیرینجی ایستکلریندن بیری اوُلوب و اوُن مینلرجه آذربایجانلی نین ایران ـ فارس رژیمینه قارشی اعتراض لاریندا ، ائله جه ده گوُنئی آذربایجانین ایدمان ساحه سینده فخری و اوُنون غرور قایناقی اوُلان تراختور کومانداسی نین فوتبال یاریشلاریندا " تورک دیلینده مدرسه ، اوُلمالی دیرهئر کئسه " شعاری میلیون لارلا اینسانین اوُرتاق ایسته یینه چئوریلمیشدیر. لاکین آنا دیلینده تحصیلین ألده ائدیلمه سی ، میللی قورتولوش مجادیله میزین اساسی آماجی یوُخ ، بئلکه تورک میللتیمیزین اوُز ایستیقلالییتی اوغروندا آپاردیغی مجادیله نین قیسا وعده لی هدف لریندن ساییلیر.

ایرقچی ایران ایسلام رژیمی نین ، میللی فعاللاریمیز باشدا اوُلماق اوزره میللتیمیزین  بو ایلکین و طبیعی ایستک لرینه قارشی آغیر باسغی لار، دهشتلی ایشکنجه لرواوزون حبس جزالاری نین اویغولاماسی ، بو مسئله نین هئر میللتین یاشاماسیندا نه قئدرحئیاتی و اوُنئملی اوُلماسیندان خبر وئرمئکده دیر.

حاضیردا آذربایجانین بوُیوک قهرمانلاریندان ساییلان سعید متین پور و چوُخ سایدا میللی فعاللاریمیز ، ساده جه تورک دیلی وبو دیلده تحصیل آلماق حاققینی مدافعه اتدیکلری اوچون حاقسیزجاسینا غیر اینسانی ایشکنجه لروآغیر جزالارا محکوم ائدیلمیشلر.

گونئی آذربایجان سوسیال دموکرات پارتیسی وطنیمیزآذربایجانین ایستقلالییتی اوغروندا فارس ایران مستعملئکه چیلینه قارشی موجادیله وئردیی حالدا ، میللی حرکاتیمیزین ایچینده یئرآلان بوتون سیاسی دوشونجه ، عقیده وسلیقه لره اوُرنئیین تکجه آنا دیلینده  تحصیل آلماق ایسته ین لره سایغی ایلا یاناشاراق ، هئر بیر اینسانین و هئر میللتین اوُز آنا دیلینده یازیب اوُخوما و تحصیل آلماقی اوُنون وازکئچیلمز حاققی بیلیر .  بیز فاشیست ایران ایسلام رژیمینی آنا دیلیمیزه قویدوقو قاداغادان دولایی ، ائله جه ده میللی فعاللاریمیزا قارشی حاقسیزجاسینا آغیرحبس جزالارینین وئریلمه سینی واتدیی آغلاسیغمایان جینایت لرینی شیدّت له قینایر ، اوُنون دهشتلی زیندانلاریندا ساخلانیلان بوُتون محبوسلاریمیزین قئید شرط سیز و درحال آزادلیغا  بوراخیلمالارینی ایسته یریک .

یاشاسین آنا دیلیمیز ، آذربایجان تورکجه سی ! یاشاسین بیرلییمیزو برابرلییمیز !

18 / 2 / 2013