نئچه گوندور یولداشلاردان  بیرنئچه سی (بلکه ده نه بیلک یاشیل لارا باغلی اولان و بیزلرله دولاشان بیری لری و یا هله ده گئچمیش ده باغلی اولدوقلاری فدایی وسول مرکزلرده ن هله ده قوپابیلمه یه نلر) یازیلاریندا و یا تلویزیون دا (گونازدا) آذربایجان میللی حرکتی نین، میرحسین-ین یاشیل حرکیتینه قوشولوب ویا قوشولماماسینا گوره اوز فیکیرلرین بیلدیریر و فرصتیی ال ده ن چیخارماماق آدینا اؤرتولوده اولسا بعضی شرط لر اساسیندا (مثلا یاشیل حرکاتین یوموشالماسی و میللی حاق لاردان حیمایه ائتمه سی و...) بیزیم بو حرکته قاتیلمامیزین یانلیسی و طرفداری کیمی چیخیش ائله ییرلر. بونلارچالیشییرلار مسئله یه قول – قاناد وئرمک له و اونو کمپلکس گوسترمک له، بیزی زاماندان دالی قالماماق آدینا قورخودوب و ته لسدیرسین لر.

منجه مسئله اصلینده بیر او قدرده مرکب دئییل. اونو بعضی سیاسی ترم لر و سوزلرله مرکب لشدیرمک اونون حللینی داهادا چتین لشدیره بیلر. اونا دون بیچیب قارماقاریشیق بیر شکیل وئرمک لازم دئییل .ایشی بوروشدورماغا گرک یوخ دور. معاصیر تاریخیمیزی بیر داها واراقلاماق بونو باشادوشوب حل ائتمه یه یئترآرتاردا بئله.

مشروطه انقلابیندان آذربایجانین سهمی نه ایدی؟ (مشروطه سئودالیسی ایدیق، قیام ائله دیک، قانلار وئردیک هم ده چوخ ایگیت ائولادلارین وئردی تبریز. تهرانی دا آلدیق. آما بو ایش ده رئال پلانیمیز اولمادیغینا گوره مییللی قهرمانلاریمیزدا اولدو.ستارخان دا اولدو. اونا ایرانین میللی سرداری آدینی دا وئردیلر آما قبری بوگون شهرری ده آیاق لار آلتیندا. بو قیامین بیزه ان بویوک ضرری حاکمیتین تورک لرده ن فارس لارا گئچمه سی اولدو. قاجارلار یئربنه پالانی لر شاهلیغا گئچدی.

دموکرات فرقه سی نیه ونده ن آرزولاریمیزی بیزه قازاندیرابیلمه دی؟ چون هدفیمیز آیدین دئییل دی .چون زامانا گوره هدف تعیین ائدیب و شعار وئریردیک. بیر گون آزادلیغی بوتون ایرانا قازاندیرماق ایسته دییمیزده ن دانیشیردیق و ایرانین اراضی بوتولویون دستک له ییردیک صاباحی سی گون استقلال دان سوز ائدیردیک. و بو آرادا میللتین لیدرلرینه و حرکته اولان اینامی آزالیب هامی سست لاشیردی. سونوندادا اون مین لر ایتگی وئریب و ایسته مه دییمیز بلالار  باشیمیزا گلدی. هامیسیندان دا بتر میللت ده اولان اوز گووه ن (اعتماد به نفس) بویوک بیر ضربه آلدی.

شریعتمداری حرکتی نین نده ن هئچ بیر فایداسی اولمادی؟ چون هر کسین آغزیندان بیر سوز چیخیردی. شریعتمداری ایران -  ایران دئییردی، خودمختارلیغی بئله پیسله ییردی، انجمن ایالتی و ولایتی ده ن دانیشیردی و رژیمین فشاری بیراز چوخالان کیمی مذاکره یه اوتوروب اونودا ایسته میردی. حتی حزب خلق مسلمان و آذربایجان حرکتی ایله علاقه سی  اولمادیغین دئییردی. طرفدارلاری جان وئرمه یه حاضیرکن او ایشین اولینده ن بئله تسلیم اولموشدو. نتیجه یئنه همان ایدی و آذربایجان یئنه اویونو اوتوزدو.هدف یئنه بللی دئییل دی.

بیر سؤزله دئسک نده ن بیز بوتون بو آیاغا قالخما لاردا و بو جریان لارین هامیسیندا اوتوزموشوق؟ بو مسئله نی دوغرو – دوزگون آراشدیردینیز می هئچ دوسلار؟! بیز بو حرکتلرین هئچ بیرینده هدفیمیزی آچیق -  آشکار معین ائتمه میشیک وسؤزوموزو واضح و آیدین دئمه میشیک ومنجه دئیه بیلمه میشیک. مصطفی دئمک یئرینه فقط میصیلدامیشیق. منه قالیرسا بیزبم میللت مصطفی دئمه یه قادیر اولماییب. قورخوب و اونا گوره میصیلدلییب.

سئوگیلی یولداشلار بلی بیز بوتون بو حرکت لرده اوتوزوب و بویوک ایتگی لروئرمیشیک . هم ده او قدر بویوک ایتگی لرکی بیر داها آیاغا قالخماق چون گاهدان 30 ایل ده ن چوخ منتظر قالیب یئنی ده ن قالخیب و یئنه اوتوزموشوق. بو ییخلمالار و یئنلمه لربیلدیینیز کیمی بیزه چوخا باشا گلیب. جانی و مالی ایتگی لری بیر طرفه عصیرلرجه بیلیم، صنعت و تکنولوژی آچیسیندان دونیادان دالی قالیب بیرمیللت اولاراق انرژی و زامانیمیزی علمی – فنی ایره لیلمه یه صرف ائتمک یئرینه انقلاب لارلا مشغول اولوب و همیشه فارس لارا آلت اولموشوق. بیزقالخیب قان وئرمیشیک اونلار بونون فایدالارین توپلاییبلار. ساواش اولویب یئنه همان آش همان کاسا. دوزون ایسته سک اوز آرامیزدی بیزی چوخ گوزه ل قوروب دمله ییب  و آلدادیبلار.ایش باشا چاتدیغیندا ایسه آذربایجانلی اجنبی اولوب . حقین ایسته دیی زامان پان تورک آلداندیریلیب و بیگانه اویونجاغی دئییبلر اونا.

آه آزادلیق ، آزادلیق! سنین هوسین و سئودان باشیمیزا نه لر گتیرمه ییب کی؟! میللتجه سنه ائله سئودالییق کی سنه چاتماق چون همیشه تله سیب و ترسه دوشموشوک. آزادلیق دوشمن لرین و اولارین کیرلی و کثافت لی ال لرین و عامیل لرین و یانداشلارین و اوز ایچیمیزده اولان جاسوسلارین گورمه ده ن و بوتون بونلاری دوشونمه ده ن بیر کپنک کیمی اوزوموزو آلووا چالیب و هپ یانمیشیق...

دوسلار 15 -20 ایل بوندان اونجه نی بیر خاطیرلارسانیز گوره جک سینیز کی میللتچی لرین ساییسی نین آز اولدوغوندان دئمک اولارکی هامی بیر – بیریمیزی تانیردیق .20 ایل بیر انسان عوموروایله  قیاس دا چوخ اولا بیلر آما بیر میللتین تاریخی عوموروایله قیاس دا اولدوخجا آزدبر. بو 20 ایل ده سوسیال و کولتوره ل چالیشمالاریمیزین نتیجه سینده  ساییمیز یوزمین لره و حتی میلیونلارا چاتیب وبو منجه چوخ آما چوخ بویوک بیر قازانج وظفر دیر . بیز هامیمیز البته کی آزادلیق سئودالیسیق. هله یوردوموزو آزاد گورمک ان بویوک خبالیمیزدیر. بوندان کیمسه نین ذره چه شکی یوخ دور. آما دوسلار هئچ بیر کیمسه نین بو بویوک اوغورو، ظفری و قازانجی قماردا اویناماغا حاققی یوخ دور . بونو هامی بیلمه لیدیر، هامیمیز آییق اولمالی ییق. بو گوجو بو میللت مفته سینه قازانماییب ، بو مییللت بو انرژی نی یولدان گئچرکن ده تاپماییب. بونو قازانماقچون آغلا سیغماز زامان لار، قان لار و انرژی وئریب بو میللت .وبلکه ده بو بیزیم توفنگیمیزده اولان سون گوله و سون مرمی میز دیز. چوخ دقتلی اولمالییخ یولدلاشلار.

بیزیم یاشیل حرکتینه قوشولمانین زامانی گلیب چاتماییب و بیز بونا آصلا تلسمه مه لییک.چون:

1.یاشیسل حرکتی نین هدفی و داها دوغروسو اونون  لیدرلرینین هدفی بیزیم میللی حاقلار و هدف لریمیز له اویوشماماسی بیرطرف ده قالسین حتی انسانی و غیر میللی آزادلیق لار و حقوقلارلادا بئله اویوشمور. اونلار ساده جه قدرت باشینا گئچیب اوز جناح و حزب لرین قدرته چاتدیرماغا چالشیرلار.اونلار چوخ آیدین جاسینا آمال لاری نین خمینی چیلیک اولدوغونو دفعه لرله باغیرا – باغیرا دئییب لر. و بو لیدر لر بو رژیمی ییخماغا دئییل عکسینه قوروماغا چالیشبرلار.آدلاری اوست لرینده دیر،اصلاحاتچی دیراونلار.و بورژیمین ایچینده ساغ وسول داواسی دیر. هئچ نه ای ده بیلمه سک بونو بیلیریک کی آزادلیق هارا بو رژیم هارا؟؟

2.بلکه بئله بیر اومود بیزلرده وارکی بو حرکت نهایت ده رژیمی ییخیلیب – داغیلماسینی گتیریب چیخاردا بیلر.بو البته بیزیم آرزو ائتدییمیز شرایط دی .آما بونودا بیلمه لیک کی آذربایجان میللی حرکتی نین بو حرکته اوز آدیلا و اوز شعارلاری ایله قاتیلماسی ،بو یاشیل آدلانان حرکتی اونون لیدرلری وبوتون فارسلارین طرفینده ن دوندورولماسینا سبب اولاجاق . بونو تهران دا فارسلارلا بیر آرادا یاشان لارداها یاخجی بیلیر لر. فارسلارآذربایجان میللی حرکتی نین نه یین دالیجا اودوغونو باشادوشورلر آرتیق.وبئله دوروم دا ظلم آلتدایاشاماغی سئچجک لر.(تاسوفله مشروطه زامانی تورک لر بونو باشادوشمه ییب و مشروطیتی تورک لرین حاکمیتینده ن اوستون توتموشلار!!)

3.بلکه بیریلری دوروب دئیه بیلر بیز یاشیل آدلانان بو حرکته بیر یاشیلچی کیمی و اونلارین شعارلاری ایله قاتیلیب و ایشین سونون دا ماسکامیزی چیخاردابیلریک.بو جنابلارادا دئمه لیک کی اوست سطیر لرده سایدیغیم معاصیر حرکتلریمیزده ائله بو ساده لیین نتیجه سین ده مغلوب اولوب لار .و بوگون بو حال لارا دوشمه میزین سببی ده ائله بوجور ساده لیک و صاف لیق لار اولوب. ستارخان دا، خیابانی ده، پیشه وری ده  و شریعتمداری ده ائله بو اوزده ن اوتوزدولار. دوشمنین نئجه غدار، فیریلداق و اویون باز اولدوغون باشا دوشمه ییب اونا ایناندیلار. بونو آرتیق قبول ائله مه لییک کی فارسلارین بیزه اولان فاشیستی و نوخوش فیکیرلری هئچ بیر زامان ده ییشمه یه جک دیر. بونو بئینیمیزه سوخمالییق.

دوسلار حاق بوتون و کامیل دی. بونو دوغرو – دوزگون اویرنمه لییک حق واردیرسا بوتون وکامیل دی. حق یاریمچیلیق دئییل و اولامازدا .بیزده یا بیر میللتیک یادا دئییلیک. میللتیک سه بوتون میللت لرکیمی حقیمیزده بوتون دور. یوخ میللت دئییلسک اوندا اوزوموزوده بو خالقی دا اذیت ائله مه یه گلمز. دئمک ایسته دییم بودورکی اوسته سایدیغیمیز معاصیر حرکتلریمزکیمی سوزو آغزیمیزدا چئینه مه مه لییک. آغزیمیزدا اولان قاوودو چیخاردیب سوزوموزو آچیق و آشکار بیان ائتمه لییک. هدفیمیزی آشکارجاسینا دیله گتیرمه لییک .قوی اوزوموزون ده میللتیمیزینده قولاغیمیز ائشیتسین و تکلیفیمیز بللی و معین اولسون. بیر میللتین حقی تام آزادلیق وتام اسقلال دان باشقا بیر شئی دئییل دوسلار. یاشیل آدلانان بو حرکت سیزجه بیزی بوهدفه چاتدیرا بیلرمی؟!

یئتر بیگ لر! یئتر بو آلت اولماق! اوزگه لره آلدانماق و دوشمنه قازاندیرماق بس دیر! آذربایجان ایسته دیی هدفه چاتماق چون مستقل حرکت ائتمه لی دیر.بیزیم میللی حرکتیمیز سرعتله و قدرتله ایره لی گئدیر و اونون یئتیشکین حالا چاتماسینا هله ده زامانا احتیاجیمیز وار. یاشیل لار اولمادان دا بیزهرایش گورمه یه قادیریک و زامانین آخیشی بیزیم علیهیمیزه یوخ بلکه بیزیم لهیمیزه دیر.آما البته کی هر زامان دان داها آرتیق آییق اولمالییق .متحد و تک بیریوموروق اولوب و زامانی گلنده دوشمنین بئینین نشان توتمالییق.