گاموح گنل باشقان یاردیمجیسی و یؤنتیم قورولو اویهسی نین(جواد عباسی بئی) آچیقلاماسی
باشی اوجا آذربایجان تورک میللتی، سایگی دیر مئدیا منسیبلارینین دقتینه
بیلدیگینیز کیمی 12.14.2012 تاریخینده گاموح تشکیلاتیندان آیریلما قراریمی آچیقلادیم. بو اولایین آردیندان سایین گاموح باشقانی دؤکتور چؤهرقانلی بللی شخصلرین واسطهسی ایله اورتادا اولان سورونلارین حل ائدیلمهسینه یؤنهلیک موذاکیرهلر آپاریلدی. موذاکیرهلر سونوجوندا مووافیق شخصلره ییغجام شکیلده باشقانلیق طرفیندن تشکیلاتین نیزامنامه و ایستراتئژیک ختتینه عمل اولونماماسینی بیلدیرمیشدیم. بو اولایدا سایین گاموح باشقانی منه مراجعت ائدهرک تشکیلاتین داها دیسیپلینلی و تام نیزامنایهیه دایالی چالیشاجاغینا سؤز وئردیلر. تأسفله بیلدیرملیمکی او، گوندن بری نسه موسبته دوغرو هئچ بیر دییشیم گرچکلشممیش و تام ترسینه چوخ اوزوجو اولایلارا شاهید اولماقداییق.
بو قبول ائدیلمز اوزوجو دورومو نظره آلاراق اولو میللتیمیز قارشیسیندا اوزریمه دوشن میللی و ویجدانی وظیفمی یئرینه یئتیرمک مقصدی ایله تام سایگیلاریملا قیساجا بعضی ایستیفا سببلریمی آچیقلایاراق. بو گونودک بو یولدا امکلری اولان فیکیرداشلایمیزادان تشککور ائدیب گاموح-دا قالان سویداشلاریمیزا باشاریلار دیلهیهرک گاموح تشکیلاتیندان آیریلدیغیمی بیلدیریرم.
باشلیجا ایستیفا سببلریم
1. نیزامنامهنین اؤنمسنیلمهیهرک هئچه ساییلماسی؛
ایراندان تورکییهیه گلدیگیم مای 2010 تاریخیندن بری اولدوقجا پاسسیو دورومدا اولان گاموح تشکیلاتینی گئجه-گوندوز دئمهدن آیاقدا توتماق، ایشلره چکی-دوزن وئرمک مقصدی ایله بؤیوک امک صرف ائتدیک و سونوچدا میللی حرکت و تشکیلاتین تاریخینده بؤیوک باشاریلارا ایمضا آتدیق. تشکیلاتی آیاغا قالدیردیق و ان گوجلو سویهیه قالدیردیق. 04 فئورال 2012 تاریخینده تشکیلاتین آنکارادا چوخ باشاریلی قورولتایینی کئچیردیک. او تاریخدن بری هر زامان باشقان طرفیندن یؤنتیم قورولوندا آلینان قرارلا بو سببهلره گؤره تنقید ائدیلیر و آنلاشیلمازلیقلارین یارانماسینا ندن اولوردو. مسئله آیدینلاشسین دئیه قئید ائتمییم یئرینه دوشرکی کئچیردیگیمیز سون قورولتایدا یئک دیللیکله قبول ائدیلمیشدیرکی یؤنتیم قورولوندا سس چوخلوغو ایله آلینان قرارلار تشکیلاتین ان یوکسک حقوقی قوهیه صاحب قرارلاردیر و آچیقجا باشقانین وئتو حاقی اورتادان قالدیریلمیشدیر. آنجاق سایین باشقان نیمازنامهنین گرکجهلرینی نظره آلمایاراق رازیلاشمادیغی مسئلهلر اوزرینه یؤنتیم قورولو طرفیندن سس چوخونلوغو ایله چیخاریلان قرارلاری رد ائدیر و یؤنتیم قورولو اویهلرینی دایم حسابا قویموردو.
2. بو گونه کیمی دفعهلرجه ایستکلریمیزه باخمایاراق هله ده تشکیلاتین اساس حقوقی وارلیغینی تثبیت ائدن سون قورولتایدا تیید اولونان نیزامنامهسینی آناسیتهده یئرلئشدیریلممهسی؛
3. گاموح باشقانلیغی طرفیندن تشکیلاتین مسئوللارینی خبردار ائتمهدن گؤروشلر کئچیرمک و یؤنتیم قرارلارینی هئچه سایماق؛
4. باشقانلیق طرفیندن تشکیلاتا عایید اولان بوتون وئبسیتهلر و اونپو نمایندهلیگینین مانیپولیایا (انحصارا) آلینماسی.
5- تشکیلاتدا شوبههلی بیلینن شخصلری جزالاندیرماق و تشکیلاتدان اوزاقلاشدیرماق یئرینه دویارسیز قالماق. بیر سؤزله باشقانلیق گاموح-اون گئرچک سیستئملشمیش بیر تشکیلات کیمی چیخیش ائتمهسینه دئییل، عکسینه باشقانی تبلیغ ائدن بیر قروپ اولماسینا اؤزن گؤسترمهسی؛
6. باشقانین تنقیدلره دؤزومسوز و سرت قارشی قویان و اؤنریلری قبول ائتمز بیر خوسوسیته صاحب اولماسی. بو آچیدان باشقان طرفیندن بیر چوخ زامان سرت تپکیلره معروض قالمیشام. تشکیلاتدا اویهلر آراسیندا اولان پروبلئمری، شیکایتلری حل ائدیلمهسی اوچون باشقانا سؤیلدیگیمده آراشدیرماق یئرینه بو قونولاری منه قارشی سو قوللانماسی و بیر باشا و دولایلی یوللارلا بللی شخصلری منه قارشی تهریک ائتمهیه چالیشماسینی نومونه اولاراق گؤستره بیلرم؛
7. ایستئفایا گئدن اویهلری چئشیتلی یوللارلا تهدید ائتمهسی.
8. تشکیلاتین نیزامنامهسینده آسلا یئری اولمایان و آدی بئله کئچمهین و تشکیلاتین مووافیق ایستروکتورلارینین خبری اولمادان اؤز باشینا “گاموح باشقانلیق اوفیسی” دئیه بیر اورقان تسیس ائتمک و همین اورقانین سوروملولوغونو ایسه بللی شخصه بوراخماسی و حتی قونو ایله ایلگیلی تانیتیم کارتلاری باسدیراراق هر کسه یایماسی؛
9. سون اولاراق تشکیلاتین یؤنتیم قورولو اویهلرینین اوزون سورهلی توپلانتیلاریا قاتیلمامالاری، اوچون بیر سیرا جدی سورونلار یارانمیشدیر. یؤنتیم اویهلرینین حاقیندا وارولان سورونلار ندنی ایله بیر سیرا تشکیلات منسوبلاری او جملهدن باشقانین سیاسی موشاویری آیدین بی قاراخانلینین و بیر سیرا باشقا یؤنتیم قورولو هابئله تشکیلات منسوبلارینین ایستیی اوزرینه و باشقا یئتئرسیزلیکلر ندنیله یؤنتیم قورولو یئنیدن سئچیمه گئتمهسی ایستنیلدی و قبول ائدیلدی. ائینی زاماندا دؤکتور چؤهرقانلی بی یؤنتیم توپلانتیسینا بیر باشا قاتیلاراق سئچیمین گرکلی اولدوغونو اورتایا قویدو. بونون آردیندان یؤنتیم قورولو اولاراق توپلاندیق و اویهلرین هامیسینین موسبت سسی ایله سئچیمه گئدیلمهسی اوچون گرکن حاضرلیقلار آپاریلدی. سئچیم مسئلهسی بوتون اویهلره آچیقلاندی. یؤنتیمه آدای اولماق ایستهین اویهلر آدایلیقلارین بیلدیردیلر. سئچیمه ایکی گون قالان هلهده بللی اولمایان سببلردن دولایی سایین دؤکتور چؤهرقانلی طرفیندن سئچیم دوردورولدو. بو ایش یئنه تامامی ایله نیزامنامهیه ضید بیر آددیمدیر.
ایستراتئژیک ندنلر:
- هر زامان سایین دؤکتور چؤهرقانلینین دونیا، بؤلگه و اؤزللیکله حرکتیمیزین آماجلارینی دوشونمهدن پوبلوسیست چیخیشلاری اولموشدور. بو چیخیشلار تشکیلاتی و اویهلرینین تحقیر اولماسینا و ایللرجه ائنئرژیلرینین بوشونا گئتمهسینه سسب اولموشدور. اؤرنیین آپادانا تو-دکی چیخیشلاری ویا اوکراینا دا کئچیریلن داک توپلانتیسینداکی چیخیشلاری؛
- تشکیلات اولاراق سیستئملی فالیتیمیزی انگللمهسی و بوتون ایلیشگیلرده فردیتچی داورانماسی؛
- تشکیلاتین هئچ زامان دیک دوروشو سرگیلنممیشدیر. سادهجه زامان-زامان بیریلرینه یانداش کیمی داورانیشلار سرگیلنمیشدیر. بللی شخصلره وار اولان ایختیلافلاردا یانداشی اولاراق رول آلینمیشدیر. حالا گاموح تشکیلاتی اولاراق ایستر قوزئی آذربایجان ایسترسهده تورکییهیه یؤنهلیک دوغرو-دوزگون بلیرلنمیش و اوزاغا هئسابلانمیش سیاستیمیز بللی دئییلدیر.
- سیاسی دوزئیی دوشونمهدن قوزئی آذربایجان هاکیمیتینه قارشی، آشیری درجهده سالدیرقان سیاست و بیر آندا ایسئ تام یوموشالمیش و تابع سیاست سرگیلمهسی و چوخ راحتلیقلا ایللرجه تشکیلاتا امک وئرنلری اوزاقلاشدیرماسی و اوزولمهسینه یول وئرمهسی .
- گونئی آذربایجان تورکچولوک ساواشینی دویارسیز قالاراق، تورکییهده گونئی حرکتینه یئترلی دستک و پلانلاری اولمایانلارین رئکلام ماشینینا چئوریلمک، بیر سؤزله گونئی آذربایجان مرکزیتیندان اوزاقلاشماسی؛
ایستئفایا گدنلر حاقدا:
گاموح طرفیندن ایسستیفایا گئدنلر حاقدا یایینلانان بیلدیریده بعضی بوش اتهاملارین یئر آلماسینی گاموح آدینا اوزوجو حرکت حساب ائدیرم. هر شخص بیر تشکیلاتا اویه اولابیلر و اویهلیکدن آیریلادا بیلر. بو اولای و باشقا مسئلهلر حاقدا بیلدیکلریمدن تام اولماسا دا، بیر نئچهسینی آچیقلاماق ایستردیم. میللی حرکاتیمیزین دورومونو دوشونهرک بیر سیرا مسئلهلرین آچیلماسینی دوغرو بیلمیرم.
1. هاتم شاهسئون : من تشکیلاتین اوست دوزئیینین تاپشیریقلاری اساسیندا هاتم بی شاهسئونله گاموح-اون قوزئی آذربایجان تمسلچیسی اولماسی یؤنونده 2012-جی ایلده موذاکیرهلر آپاردیم، آنجاق هاتم بی تشکیلاتین تمسیلچیلیگینی قبول ائتمهدیلر. گاموح تشکیلاتینین یایینلادیغی بیلدیریده هاتم بیین تشکیلاتا اویه اولماماسی ایرهلی سورولموشدور! بو شخص اویه دئییلدیرسه ندن، هاتم بیدن بللی میقداردا اویهلیک اولاراق پارا آلینمیشدیر؟!
2. آیدین بی قاراخانلی : اؤمرونو بو تشکیلاتین اوغروندا وئرن، میللی ایدئیامیزا وار-یوخونو فدا ائدن سلاحداشیمیزدیر. قورولتایا قاتیلمیش و سس وئرمیش ، تدبیرلره،گنل توپلانتیلارا قاتیلمیش تشکیلاتا ان بؤیوک مادی منوی دستک و امکلری اولموشدور.
3. لئیلا خانیم مولا: منیم حیات یولداشیم اولاراق 1998-جی ایلدن اعتباراً منیمله چیگین-چیگینه بو قوتسال یولدا وار گوجو ایله چالیشمیشدیر. ، بیر مدت گاموح-اون خبر آژانسی اولان Sananews سیتهسینی چالیشدیرمیشدیر. قورولتایا قاتیلمیش و سس وئرمیش ،اویهلیک حاقی اؤدمیش، تدبیرلره،گنل توپلانتیلارا قاتیلمیشدیر.
4. عرصهلان بی کامرانی: تورکییهده گاموح-آ اویه اولموش، بیر مدت گاموح-اون خبر آژانسی اولان Sananews سیتهسینی چالیشدیرمیشدیر. قورولتایا قاتیلمیش و سس وئرمیش ، تدبیرلره،گنل توپلانتیلارا قاتیلاراق چالیشمالارینی دوام ائتمیشدیر.
5. حسین بی تبریزلی: منیم یورد دیشینا چیخمامدان اؤنجه او زامانکی شرطلرده گاموح-آ اویه اولموشدور. قورولتایا قاتیلمیش و سس وئرمیش،اویهلیک حاقی اؤدمیش، تدبیرلره،گنل توپلانتیلارا قاتیلاراق فالیتینی سوردورن اویهلریمیزدن اولموشدور.
6. نوید بی سولتانی : تشکیلاتین اویهسیدیر، قورولتایا قاتیلمیش و سس وئرمیش، تدبیرلره،گنل توپلانتیلارا قاتیلاراق فالیتینی سوردورن اویهلریمیزدن اولموشدور.
7. زامان بی الیوغلو: تشکیلاتین، قورولتایینا قاتیلمیش و سس وئرمیش، تدبرده ایشتیراک ائدهرک فالیتینی سوردورموشدور.
8. ائلیار بی تبریزلی : چوخ اسکیدن سایین دؤکتور چغهرئقانلی ایله برابر اولموش، قورولتایا قاتیلمیش و سس وئرمیش، اویهلیک حاقی اؤدمیش دیرلی فالیتینی سوردورموشدور. ائلیار بی چوخ سایگین و دویارلی فیکیرداشیمیزدیر.
سون اولاراق بیر داها سایین گاموح باشقانینا توم سایگیلاریملا باشاریلار دیلییرم.
سایغیلاریملا
جاواد ابباسی
سؤزده گاموح گنل باشقان یاردیمجیسی و
یؤنتیم قورولو اویهسی
03/27/2013