سیما دیدار تبریز حبس‌خاناسیندا علاوه اتهام‌لارلا اوزلشه بیلر
آذوح: تبریزده آذربایجان‌لی خانیم فعال 26 یاشلی سیما دیدارین عائله‌سی اونون حبسخاندا یئنی اتهام‌لارلا اوزلشه بیلجییندین ناراحات‌دیر.
اونون حیات یولداشی علیرضا فرشی بیلدیریر کی، آذربایجان‌لی‌لارین میللی حقوق‌لاری‌نین سسلندیریلمه‌سی اوستونده بو ایلین مارتیندا توتولان خانیمی آغیر جینایت‌لر تؤره‌دن، نارکوتیک مادده‌لر اوستونده توتولان قادین محبوس‌لارلا بیرلیکده ساخ‌لانیر. او، قئید ائدیر کی، اصلینده خانیمی‌نین حبس مدتی بو یاخین‌لاردا باشا چاتیر، اما عادتن آذربایجان‌لی سیاسی محبوس‌لارین حبس مدتینی اوزاتماق اوچون اونلاری ایچریده موختلیف شر-بؤهتانلا داها چوخ ساخلاییرلار:
- ایراندا زین‌دان‌لار چوخ تهلوکه‌لی‌دیر، سیاسی محبوس‌لاری آیریجا ساخلامیرلار. اونلاری قاتیل‌لرین، نارکوتیک مادده‌لر ایستیفاده ائدن‌لرین یانیندا ساخلاییرلار. چوخ‌لو قادین عینی یئرده قالیر. ایستمدیک‌لری آدام‌لارین حبس مدتینی اوزاتماق اوچون اونلارین اشیا‌لارینی قاریشیدیریر، موختلیف بؤهتان‌لار قورور، بئله‌لیکله ده سیاسی محبوس‌لاری اؤز موباریزه‌لرین‌دن آییرماق اوچون اونلاری داها چوخ حبس‌خانادا ساخلاییرلار. ایندی سیما دا بئله بیر شرایطده ساخ‌لانیر. ائله آدام وار کی، بیر-ایکی آیلیق حبسله جزالاندیریلیب، اما ایکی، اوچ ایلدیر هله حبسده قالیر.
علیرضا فرشی اؤزو ده 2009-جو ایلین ماییندا تبریز بلدیه‌سی‌نین کئچیردیگی ایجتیماعی تدبیرلردن بیرینده "تورک دیلینده مدرسه" شوعارلاری سسلن‌دیرمک اوستونده ساخلانمیشدی. خانیمی اونا باش چکمه‌یه گئدرکن اونو دا توتوب‌لار. بیر نئچه آی حبسده قالان‌دان سونرا هر ایکی‌سینی آزاد ائدیب‌لر اما اونلارا قارشی “خاریجی تشکیلات‌لارلا ایشبیرلیگی و حاکمیت علیهینه تبلیغات” اتهامی ایله جینایت ایشچی آچیلیب. محکمه ده همین ایتیتهاملا اونلاری بیر ایله قدر آزادلیق‌دان محروم ائدیب. شیکایت‌لرین‌دن سونرا بو جزا آلتی آیا ائندیریلیب، اما فرشی و خانیمی حبس‌خانایا گئتمک‌دن ایمتینا ائده‌رک بو حؤکم‌دن ده شیکایت وئرمه‌یه چالیشیب‌لار.
2011-جی ایل مارتین 8-ده ایسه سیما دیدار باشقا بیر آذربایجان‌لی فعال سعید متین پور ون حبس‌خانادا اولان خانیمی عطیه طاهرینی زیارت ائتمک اوچون زنجانا گئتمک ایستییر. اما یولدا اونو ساخلاییب، سندلرینی علین‌دن آلیب‌لار. آپرئلین 16-دا ایسه سندلری اوچون پروکورورلوغا گئدرکن اونو توتوب‌لار. ایندی اگر حبسخاندا باشقا بیر ایشله باغلی اونو اتهام ائتمه‌سه‌لر سیما دیدار یاخین آیلاردا آزادلیغا بوراخیلما‌لی‌دیر. چونکی اونون اوولکی حبس مدتی ده حئسابلانما‌لی‌دیر.
علیرضا فرشی قئید ائدیر کی، حبسخاندا اولان خانیمی ایله علاقه ساخلایا بیلمیر و شر-بؤهتانلا اونون حبس مدتی‌نین اوزادیلاجاغین‌دان ناراحات‌دیر.
بو یاخین‌لاردا مرند شهری‌نین کوچه‌لرینده دیوارلارا “یاردیم ائدین سیما دیدار تبریز زیندانین‌دان آزاد اولسون!” شوعارلارا یازیلان اعلان‌لار وورولوب. بون‌دان اول تئهران و تبریزده ده بونا اوخشار اعلان‌لار یاییلیب.
سیما دیدارین وضعیتینی دقتده ساخلاماق اوچون بیر قروپ آذربایجان‌لی فعال بیرلشمیش میللتلر تشکیلاتینا مراجعت گؤندریب.
اویرنجی
