İranda dar ağacından asılan 16 yaşlı Atifə Sahalenin fotoşəkilləri yayılıb. 13 yaşında bir kişi ilə eyni maşında getdiyi üçün həbs olunan Atifə həbsdən çıxdıqdan sonra 51 yaşlı taksi sürücüsü tərəfindən təcavüzə uğrayıb.

Daha sonra imzasız bir şikayət məktubu ilə ikinci dəfə həbs edilən Atifə həbsxanada işgəncələrə məruz qalıb. Maraqlıdır ki, məhkəmədə hakim və prokuror eyni şəxs olub.

Barəsində edam qərarı verildiyi zaman Atifə 16 yaşında olduğu üçün Ali Məhkəmə qərarı təsdiqləməli idi. Başqa işlərdə Ali Məhkəmənin qərarı təsdiqləməsi uzun müddət tələb etdiyi halda Atifə ilə bağlı qərar 2 gün ərzində təsdiqlənib.

Edamdan əvvəl ailəsi ilə son görüşünə icazə verilməyən Atifə xalqın gözü qarşısında edam edilib və 40 dəqiqə boyunca cəsədi ağacdan sallandırılıb. Dəfn edildikdən bir gün sonra naməlum şəxslər cəsədini məzardan çıxararaq, təcavüz edib. // AzNews.az