English            Latin   

برای دریافت مطالب جدید به این آدرس www.azoh.net  مراجعه فرمایید

Yeni Adresimiz www.azoh.net

New Address www.azoh.net 

گفتنی است این سایت آرشیو مطالب منتشر شده از اسفند 89 تا دی 92 و همچنین از مهر 94 تا شهریور 95 را شامل می شود
 

هارای ــ د. لطیف

قارا  بیر لشکر  ایستر دیکتاتور  ایللر  سوار  اولسون

پالان قویسون بوتون مخلوقه اؤلکه بیرده زار اولسون

گؤرونمز چون شرف ذاتیندا یوخدور همده اینسانلیق

سالاروحشت بوتون خلقه کی دوران تیره تاراولسون

ساتانلار  خلقی  دوشمانه   دوشوبلر  خلقدن  آیری

باخیرلار  مللته  آلچاق کی  آلچاقلیق  عیار  اولسون

بولونماز  چون  صداقت  بیرده  ناکسده   تعجب  یوخ

بئله  نامردلره  حؤرمت  و  ایسانلیقدا   عار  اولسون

فدا   اولموش  نگؤر  مللت  عجب   بیگانه   اوغروندا

هارای ایسترگینه دوشمان کی اؤلکه تارو ماراوسون

قودورموش مستبد شیطان ائدرکن داد  ائوین   ویران

سالیب خلقی نگؤرظولمه کی بو اؤلکه مزار اولسون

بو خصلت بیرناخوشلوقدور ساغالمازعقده لی ظالیم

سالار ظولمات بوتون شهره که ائللر آه و زار اولسون

اؤزوندن   باشقا  بیر   خلقی  طراز   ائتمز    تبار یله

توتار اوستون اؤزون ائلدن کی  مللت برکنار  اولسون

نگؤر  شددت  توتوب  ظالیم  بیلرکن  کندینی  عالیم

یالانچی  تاریخین ایستر که  خلقه  ایفتخار  اولسون

دولار فخره  یالان  سؤزله  دؤنرکن  سانکی بیر  رذله

ائدیر قان اؤلکه نی ایللر کی عیشی برقرار  اولسون

نه   وئردی  مللته  بیگانه   اوغروندا   بو    جانبازلیق

مبادا جمله فرصتله کی دوشمان بیرده هار اولسون

یئتر بسدیر بو فرصتلر  کی ناکس  آنلاماز  دوستلوق

مبادا  ایشتباهیله  کی  اؤلکه  بیرده  خوار  اولسون

فغان حلقومدا  عصیاندیر توتوب دوران  نگؤر  وحشت

اویاقدیر گؤرنه اهریمن کی قورخو دیلده جار اولسون

اسیر  یارپاق کیمی قلبی پناهسیزدیر  نگؤر  خلقیم

هارای قاندیرسوزور دیلدن کی آزادلیق شعاراولسون

خبر  یوخدور داها  گولدن  صفالی  عطر  سومبولدن

اولوب  حایل  قارانلیقلار  کی  گؤزلر  انتظار  اولسون

توتوب  بولبول  نگؤر  ماتم  عزا دیر  لاله لر   سرسم

چکیب خنجر خزان عشقه مبادا  کی باهار  اولسون

تلاطم دیر نگؤر دوران  اولوب سانکی   حیات   ویران

چؤنوب گؤرنه گمی بختی کی هیجرانه نثار اولسون

سعادت  بحر  توفان دیر  خبر  یوخ   وصل   جاناندان

قضا و  قهر اولوب اؤلکه کی شادلیقدا مهار اولسون

قدر  غدّار  اولوب  خلقه  یاراتمیش گؤر نه مین فتنه

مبادا   کی   صبا   عطری   نثار   گولعذار    اولسون

نسیم خوش نفس اسمیر داها وحشت توتوب یئللر

اجل قورخو سالیب شهره کی بحرانه دچار اولسون

نشاط   قافله  گئتمیش  خبر   یوخ  سرو   دوراندان

سینیب پیمانه وصلت کی  هیجران  پایدار  اولسون

قیامت قووزانیب یوخدور داها رندی  و  سرمستلیک

سالیب قیرقین اجل خلقه کی ذللت اختیار اولسون

اولوب  ویرانه لر  همدم  آخیر  گؤز یاشلاریندان  غم

هارای یوخدورداها خلقه کی مظلوم سربداراولسون

کول اولسا حتی بو اؤلکه بیتر ققنوس کیمی اوددان

توتار عصیان گینه خلقیم مبادا  بیرده  خوار  اولسون

بلشمیش چون وطن قانه  دوشوب ائللرده  نیسیانه

دوشون اؤز دردینه بیرده کی اؤلکه بئله  وار اولسون

عدالت  دیر  شعاری  هر   ائلین   آزادلیق    افکاری

صلابت ایستیقامتلر  بو خلقه خوش  ویقار  اولسون

باهارین یولدا دیر دویدوم آچان  گوندن  سحر  واقتی

گلر بیر گون  نسیم جان  کی  اؤلکه  پایدار  اولسون

اوفقلار مژده دیر توتموش شفق گؤر نه تب  حسرت

مبادا  کی  غم  هیجران  اوره کلرده  غبار   اولسون

دوشوبدو  محفل  جانان  اوزاق  ائلدن نه  سرگردان

کی حسرتلر اوزون ایللر  کی میثاق  نیگار  اولسون

آییلمیر بیخبر  یاتمیش  اوزون  ایللر   زامان  کئچدی

سنه سندن داهایوخ باشقا یاردیم بیرده یار اولسون

قارانلیقدیر  دوشوب گرداب  جهله  گؤر  مسلمانلیق

خطر حایل هارای یوخدور کی جانلار  بیقرار اولسون

ایتیرمیش کیملیگین ایللر  نگؤر  یالنیز  دوشن ائلدن

ائدیر  بیگانیه  مننت  اونا  بلکم   کی   یار   اولسون

یالان  ساتدی  بتون  خلقه  یالانچی  جنت  قدسی

ائدیر   مینلر  نگؤر  آرزو   خورافاته    هاوار   اولسون

آچیل  ای  صبح اندیشه  اویانسین  او  یاتان   گؤزلر

مبارک   مژده   جانان   نصیب   بو    دیار    اولسون

Share/Save/Bookmark
 
آدرسهای ما - Follow us

YouTube

 -----

Facebook

----- 

Twitter