AZOH: ABŞ senatorları prezident Barak Obamanı Irana qarşı sanksiyaları gücləndirməyə çağırıblar. Bununla bağlı 76 senator ABŞ prezidentinə məktub göndərib. Məktub Iranın yeni prezidenti Həsən Ruhaninin avqustun 4-də ölkə parlamentində keçirilmiş inauqurasiya mərasimi ilə eyni günə təsadüf edib.

ABŞ senatorları Iranın nüvə fəaliyyətlərindən əl çəkməyənədək bu ölkəyə qarşı sanksiyaların sərtləşdirilməsini tələb ediblər. Məktubda B.Obamadan Iranla dialoq yolunun açıq olmasına baxmayaraq, hərbi variantın da mütləq masanın üzərində olması istənilib. Məktub müəllifləri hesab edirlər ki, Iran bu gün sentrifuqaların sayını artırmaqda davam edir: “Bu ölkənin uranı zənginləşdirməsinə icazə verilməməlidir. Çünki bu addım Irana nüvə silahı istehsal etmək imkanı verir”.