هر نه ایچیمه تؤکولور- رامین جهانگیرزاده
Mahnıların qabağını alan yox
Beynimə düşür sakit səhralar
Ağac qabığından olan körpünün
üstündən keçir gözlərim
o tayda Dəniz dalğalanmadan
Dəniz Quldurlarının gəmisi üzür
Saçı pırpızaqlı uşaq
Divar dibində əyləşib
Başmaqları üşüyür
Sol tərəfdə Akvaryomdakı balıqlar
Sarı, qırmızı, qara
Çınqıl-çınqıl daşlar
Balıq qulaqlarına
Bir söz demək istəyirəm
Susuram, hər nə səslənir
Hər yerdən
-hoy oğlan, nəyin var tök çölə
Heç nəyi tökə bilmirəm
Hər nə içimdə qalır
İçimdə bir deprem baş verir
Hər nə içimə tökülür
Bütün dünyanın ağrılarını çəkirəm
Kimsə deyir:
- nə çəkirsiz Ağa!
- heç nə! Bir istəkan çay verin lütfən!
ماهنيلارين قاباغيني آلان يوخ
بئينيمه دوشور ساکيت صحرالار
آغاج قابيغيندان اولان کؤرپونون
اوستوندن کئچير گؤزلريم
او تايدا دنيز دالغالانمادان
دنيز قولدورلاري نين گميسي اوزور
ساچي پيرپيزاقلي اوشاق
ديوار ديبينده اَيله شيب
باشماقلاري اوشويور
سول طرفده آکواريومداکي باليقلار
ساري، قيرميزي، قارا
چينقيل-چينقيل داشلار
باليق قولاقلارينا
بير سؤز دئمک ايسته ييرم
سوسورام، هر نه سسله نير
هر يئردن
- هوي اوغلان، نه يين وار تؤک چؤله
هئچ نه يي تؤکه بيلميرم
هر نه ايچيمده قالير
ايچيمده بير دئپرئم باش وئرير
هر نه ايچيمه تؤکولور
بوتون دونيانين آغريلاريني چکيرم
کيمسه دئيير:
- نه چکيرسيز آغا!
- هئچ نه! بير ايستکان چاي وئرين لوطفن
Ramin Jahangirzadeh