توْزلی قبیر- محمود دالغا
بیری واری ایدی بیری یوخودو. پائیز یولدان چوخ تلسمه ائله یئتیشمیشدی.یارپاقلار گوده فیرلانا فیرلانا اؤلوم گونلرین توی توتموشدولار.اورگیم چوخ سیخنتی حالیندایدی،اسیر اولموش بیر قوش اورگی کیمی تاپپیلدیردی.اؤوه دن چیخدیم، هارا ؟ بیلمیرم.
آز یا چوخ گئتمیشدیم،خارابا و شونامیش بیر دووارا یئتشدیم،دوواردان ایکی تای قاپی گیریش یولو ایچون آسلانمیشدی.قاپی سینیق و دئشیک دئشیک ایدی،آز مات قالدیم من بوردا نه ائلیرم؟کیم منی بورایا گتیردی، بورا هارادی؟
چوخ قاباقلار گلمیشدیم،آمما آتام ائله، آتام دئیردی هر واخت سیخینتییا دوشدون چاراسیز و بیلینمز بیر فیکیر اورگینده آغیرلیق سالدی بو یئره باش وور،آدام یونگوللشر.
سینیق قاپی نین یانینان ایچری باخدیم،ساکیت و کمسه سیز بیر یئری ایدی.
- دوز گلمیشم؟
- آتام دئین یئر بورادی؟
گیردیم ایچه ری، سئرچه لر منی گؤرجک تعجوبله‌نیب اوچدولار، کنارداکی سؤویت آغاجینین اوستونه قونوب قونشماقا باشلادیلار:
- اؤلوسی وار گلیب قبیر قازا.
- یوخ یولون آزیبدی.
- نه معلوم شاید گلیب بیزه تئله قورا.
- ....
یارپاقلاری ایاقلییا ایاقلییا گزمگه باشلادیم، گؤزوم هردن بیر داشلارین اوستونده یازیلمیش آدلارا توخونوب اونلار منیم دقتیمی اؤزلرینه چکیردی.
- محمد.. تاریخ فوت ...
- کوبرا ... تاریخ فوت ...
- ...
چوخ اوزاق زامانلار کی آتام ائله گلردیم، بو آدالارین چوخون گؤرمه میشدیم،گؤره سن یئنی اؤلودولر،تاریخ اؤلوملرینه باخدیم، یوخ چوخدانکیدیلار آمما من اونلاری گؤرمه میشدیم.آز بیر یئرده دوردم،اؤزوم ائله فیکیرلشمگه باشلادیم:
- آتام ایله گلنده هانسی طرفه گئدردیک؟
- گیمی گؤرردیگ؟
بیلیرسن اوغول بو اینسان چوخ گنج واختیندا اؤلونوب، اونی دارا چکدیلر، اؤزوم گؤردوم، بیزیم بو ساعات قاباقیندایدی داری قوردولار. ائله بیله سن همین آلاندی.بونلار آتام دیین سؤزلری ایدی، بیر بیر یادیما دوشوب منی او دئین جاوانین قبیرینه طرفینه چکیردی.
بیلیرسن اوغول آدام گرک یولداشلارین آغیر گونلرده تانیسین. هامیمیز ال بیر اولموشدوق، آزادلیقا ایتیشمیشدیک، ایستقلال واریمیزایدی. دوشمان بیزیم شنلیک و آزادلیقمیزی گؤرنمه دی، هوجوم گتیردی، بیزه غلبه گلدی، چوخ ال بیر اولانلار اؤز باشیلارین گؤتور چاقدیلار، بیزده دوردوق دار آغاجینین آلتیندا دارباشنداکی لارا باخدیق...
سئرچه لر اوچدی. فیکیرلرده منیم بئینمنن اوچوردو، ایاقلاریم قووت تاپمیشدی بورایا چکیلیب گلمگین سببین بیلمیشدیم،منیم چوخ اوشالیغیمندان وطن شهیدلری نین آدی گلنده اورگیم چیرپیناردی،اونلارین برابرینده باش ایمه گی اؤزومه بیر فخر بیلردیم.
یئتیشدیم فبیرین باشینا،فبیرداشنین رنگی سولموشدو، چورویوب دئشیک دئشیک اولموشدو، چوخ جتنیلیک ائله داشین اوسته گنج شهیدین آدین اوخودوم:
"فریدون ابراهیمی"
بیلیرسن اوغول، بو جاوان بیزیم موستقیل دولتیمیز اوستانداری ایدی. اونلارین بیزیم بویونموزدا چوخ حققلری وار، اونلار اؤز جان لارین قوربان ائله دیلر کی بیز اؤز آنا دیلیمیزده دانیشیب، یازماق بیلک، ایستقلال هززین داداق، اؤزگه بایراقین آلتیندا یاشامییاق، اونلار بیزه دئدیلر کی بو جور اؤلمک زیلتلی یاشاماقدان اؤنملی دیر.
قبیرین توزون سیلدیم.ایسته دیم آغلییام،اورگیم چوخ دولموشدو، من بورایا هئچ واخت تکجه گلمه میشدیم،آدامسیزلیق یامان دردیمیش، بودرد ائله درد دی کی بیزیم شهیدین قبیرداشیندا پارتدادیب.
الیم یوموروق ائلیب باسدیم آغزیما،آغلاماغی ایچمده بوغدوم، آغلاماق دوشمانی شنلیکدیرر.
بیلیرسن اوغلول بیزیم دردیمیزده و علاجمیزدا اؤز الیمیزده دی،آتامیم سسی قولاغیما یئنی دن دیدی اؤزرریک دنه سی اود اوستن آتیلان کیمین یئردن قالخدیم.
