آذوح: ایبراهیم جعفرزاده 1353-جو ایلی­نین شهریور آیی­نین ایلک گونونده، خوی شهری نین بیله­وار کندینده اکینچی بیر عاییله ده دونیایا گؤز آچدی. بئشینجی صینیفی کند ده بیتیریب، خوی­دا اورتا اوخولو و دیپلومانی اوخودو. آردیندا خوی آزاد بیلیم­یوردوندا فارس دیل و ادبیاتیندا لیسانس آلدی.

اونون یاشاییشینی قیساجا بئله دییه بیلمک اولار:

1378- خوی شهری نین مجلیس سئچگی­لرینده ، سئچگی سورجینده اولان حق­سیزلیک­لره اعتیراض ائتدیگی اوچون بیر نئچه یولداشی ایله بیرلیک ده توتوقلانیب، 12 گون زینداندا ساخلاناندان سونرا 3 آی تعزیری دوستاغا محکوم اولوب. دئمک اولار او گون ایبراهیم بی سئچگی لرده آذربایجان ایستک­لرینی توپلوما گئنیش یایماقلا جزالاندی.

1381- ساوالان گونونه گؤره مئشکین ده یاخالانیب5 گون قالاندان سونرا بوراخیلیب، اینقیلاب محکمه سینده تبرئه اولوندو.

1383- جی اردیبهشت آییندا تئهراندا یاخالانیب، بیر چوخ یولداشلاری ایله بیرلیک ده آذربایجان اوچون بیر شورا یاراتماق ایتیهامی ایله توتوقلانیب 21 گون زینداندا ساخلاندی.

1383- خویدا یولداشلاری ایله بیرلیکده آذربایجان کیملیگینی ساوونا بیلن بیردرنگ قورماغا قرار وئریلدی. بئله­لیکله اورین درنگی قورولدو.

1384- بابک قالاسیندا توتولوب، 10 گون اهر زیندانیندا قالاندان سونرا وثیقه قویوب، بوراخیلدی. سونرالار 5 آی زیندانا محکوم اولدو.

1384- عاییله قورماق اوچون مینا خانیم کهروبایی ایله ائولنیب، گله­جکلرینی بیربیرلرینه دویونله­دیلر.

1385- ایران گونده­لیگی­نین تورکلره توخونماسیندا، ایلک اولاراق آذربایجانین باشا باشیندا شهره چکمگی پلانلادی. البته اعتیراضین ایلک ساعاتیندا ن اؤنجه توتوقلاندی.

1385- ایسفند آیی­نین ایکینجی­سی دونیالیق آنادیلی موناسیبتی ایله توتوقلاندی. او توتوقلانمادا ایسه اینقیلاب محکمه­سی اونا بیر ایل زیندان، ایکی

ایل برازجانا سورگون و 3 ایل ایجتیماعی حاقلاردان و مجلیس سئچگی­لرینه آدایلیغا یاساقلانمایا محکوم اولدو.

1386- مورداد آییندا توی­لارینی توتدولار.

1387- تیر آیین بیرینده زیندانا گئتدی، بیر ایل سونرا 1388-جی ایلین اوردیبهشت سونوندا باشقا فعاللارلا بیرلیک ده بوراخیلدی.

1389- ایبراهیم بی و مینا خانیم­ین سئوگی میوه­سی آیلا دوغولدو.

1390- سه شنبه گونو شهریورین 29-و سعید متین پورون آد گونو و آذربایجانلی سیاسی محبوس­لارین گونونو آدلاندیردیلار.

1390- اورمو گؤلونون قوروتماق سیاستینه قارشی اعتیراضلاردا، امنیتی قووه­لر طرفیندن چاغیریلدی.

1390- مهر آیی­نین دؤردونجو گونو حایات یولداشی مینا خانیم و کیچیک قیزی آیلا ایله بیرلیکده بیر ترافیک قضاسیندا حایاتلارینی دئییشدیلر.

مینا کهروبایی

30 شهریور 1359-جی ایلده نمین شهری­نین کندلری­نین بیرینده دوغولدو. هله بیر یاشی اولمامیشدی کی عاییله­سی ایله بیرلیک ده کرج شهرینه کؤچدولر.

مینا خانیم ایلک مکتب، اورتا و دیپلومانی کرج ده بیتیرندن سونرا، زنگان شهری­نین آزاد بیلیم یوردوندا بیلگی­سایار (کامپیوتر) موهندیس­لیگینده قبول اولدو، او اورادا آذربایجان میلی حرکتی ایله تانیش اولدو. بودا اونون یاشاییشیندا دؤنوم نوقطه­سی اولدو، ائله کی او آذربایجان اوغرونا چالیشمانی اؤزونه گؤره­و بیله­رک ، شهریار درنگینه اویه اولوب، بیر میلتچی کیمی چالیشماسینا سبب اولدو. ائله کی یولداشلاری ایله بیرلیکده شهریار درگیسی­نی یولا سالیب اونون سوروملو مودورو اولدو. دئمک اولار مینا خانیم او ایللرده زنگان شهرینده چوخلو تؤرن و سمینار دا آپاریجی­لیق ائتدی. مینا خانیم درسینی بیتیرندن سونرا ایبراهیم بی له آداخلاندی.

مینا خانیم حایات یولداشینا تؤردیلن چتینلیکلره باخمایاراق، اونون او چتین گونلرینده هر زامان یانیندا اولدو و بیر آن اونو یالنیز بوراخمادی. 1389 ایلی­نین آبان آیی­نین اوتوزوندا سئوگیلری­نین مئیوه­سی آیلانین دوغولماسی، حایاتلاریندا، آذربایجان، سئوگیلی و اوشاق سئوگیلرینی اوچلشدیردی. نه یازیق کی 1390-جی ایلین مهر آیی­نین دؤردونده سحر چاغی ساعات 6-­دا خوی جاداسی، قاپیلیق کندینه یاخین بیر یئرده بالاسی آیلا و حایات یولداشی ایبراهیم ایله بیرلیکده دونیادان کؤچدولر.

مینا خانیم دان بیر شعر

آجیخدیم، آغلادیم

منه لایلای چالدیلار

سوسوز قالدیم، باغیردیم

منه لایلای چالدیلار

خسته­لیکله چیغیردیم

منه لایلای چالدیلار

اونلار- لایلای چالارکن

یوخلادیم، یوخلادیم

آغلامادیم، باغیرمادیم

چیغیرمادیم، یوخلادیم

ایندیسه

اویانماق ایسته سم ده اگر

یوخو گؤزلریمی باسیر

اونلار لایلای چالدیلار

آیلا جعفر زاده

1389 ایلی­نین آبان آیی­نین اوتوزوندا آذربایجان سئور بیر عاییله ده آنادان دوغولدو، ائشیتدیگی ایلک سؤزلرده، آنا، آنا وطن، آتا و آذربایجانی هر زامان بیرگه ائشیتدی، هله دانیشا بیلمیردی، آما آذربایجان و تورک سؤزونو دئمگی چوخ ایسته ییردی. بیلیردی بونلاری دئمک له نه قدر آتا و آناسینی سئویندیره بیلردی. آنجاق نه بیلیردی یاشام وفاسیزدیر، یازیلان قورقودا چوخ سئودیگی آتا و آناسی ایله بیرگه قالماغی سئچیب، اونلارلا گئتدی.

بو يازي 1390 - مهر آينين بئشينجي گونو قمر بني هاشيم خسته خاناسينسن قاباغيندا ميللي فعاللار و هابئله خويلو وطنداشلارين آراسيندا يايينلانيب