احمد شهید: اورمییه گؤلو بحرانی اوزون‌دن 600 مین نفر کؤچوب، قالان اها‌لی ایسه یوخسوللاشیر
آذوح: بیرلشمیش میللت‌لر تشکیلاتی‌نین ایراندا اینسان حاق‌لاری عذره خصوصی نماینده‌سی احمد شهیدین یایدیغی یئنی هئساباتدا اورمییه گؤلو اطرافیندا جریان ائدن ائکولوژی فلاکته خصوصی دقت وئریلیب. سندده 600 مین اها‌لی‌نین بؤلگه‌دن کؤچدوگو و قالان‌لار آراسیندا یوخسوللوغون آرتدیغی اؤنه چکیلیب.
احمد شهیدین بو هئساباتی اینسان حاق‌لاری شوراسی‌نین بمت باش آسسامبلئیاسی‌نین 69-جو سئسسیاسینا تقدیم ائتدیگی قتنامه‌یه مووافیق اولا‌راق یاییلیب.
سندده اورمییه گؤلو بحرانی‌نین چؤزوم یول‌لارینی معین‌لش‌دیرمک اوچون موسبت تشببوس‌لرین حیاتا کئچیریلدیگینه باخمایا‌راق “گئرچک بیر آددیمین گئچیکدیگیینه” ایشاره ائدیلیب.
هئساباتدا یئرلی مسئول‌لارین دیله گتیردیگی ناراحات‌لیق‌لارا دا یئر وئریلیب:
“2014-جو ایلین آپرئل آییندا رسمی‌لر گؤلون 93 فایزی‌نین قورودوغونو و دوز سویه‌سی‌نین ایکی قات آرتدیغینی بیلدیریب. بو خرچنگ و تنففوس اورقان‌لاری خسته‌لیک‌لری‌نین سرعتله آرتماسینا سبب اولوب. یئرلی مسئول‌لار ایسه گرک‌لی آددیم‌لارین اوکتیابر آیینا قدر آتیلمادیغی تق‌دیرده گؤلون گونئی حیسه‌سی‌نین یوخ اولوب و بونون 5 میلیون نفری کؤچمه‌یه مجبور ائدجیینی وورغولاییب‌لار.”
مطبوعاتا آچیق‌لانان هئساباتدا اورمییه گؤلو بحرانی‌نین “جدی اجتماعی، اقتصادی و ساغ‌لیق” مسئله‌سی اولدوغو وورغولانیب.
