بیزلر دائمن دوُزگونلوکلۀ دئمیشیک ؤ یئنۀ دۀ دئییریک : بیز گئرئک کئچمیشیمیزدن ، تاریخیمیزدن ، اوُلو آتا بابا لاریمیزین اینجی کیمی سوُزلریندن ؤ تجروُبۀ لریندن یارارلانیب ، دئییرلی درس لرآلمالییق ، بوگوُنکو حساس موُقعۀ دۀ سهولردن ، خطا لاردان اوُزاق دوُرمالییق .

لاکین تأسوُفلۀ ندنسۀ هئلۀ دۀ درس آلمیریق کی هئچ ! کئچمیشین همان یالنیشلیق لارین بو گونکو چاقدا کی میللتیمیز، وطنیمیز راسیست فارس رژیمی نین چئنگۀ سیندۀ قانی توُکولوب ، وارلیغی اینکار اوُلماقدا دیر، یئنۀ تیکرارائدیریک !

                              ******************************

      اوُلمز اینسان ، بوُیوک رهبریمیز جعفرپیشۀ وری نئلر دئمیشدیر؟ اوُ دئیر:

خالقیمیزی ایجتیماعی ایشلردن اوُزاق قالماقا مجبور ائدن سببلردن بیری دۀ ایراد گیرلیک ، آدقوُیماق ، عیبجولوق ؤ بهتان دئمئک دیر. بونون ریشۀ سی خود پرستلیک ؤ خودخواهلیق ؤ خصوصییتۀ چالیشماقدیر.

هئرکئس ایستۀ یر باتمان اوُلسون ، یاریم باتمان اوُلماق ایستۀ ین چوُخ آزدیر. اوُنا گوُرۀ بو وقـتۀ قئدرآلوئرباش توتمامیشدیر. جماعت ایجتیماعدان قاچمیش ، چوُخ بوُیوک فیکیرلر ؤ عالی نقشۀ لرؤ جیددی فداکارلیقلارنتیجۀ سیز قالیب ، اوُنودولموشدور.

بیزیم عقیدۀ میزۀ گوُرۀ ایراد گیرلر ، عیب جولار، خالقا تهمت آتان آداملار ، هئر سیمادا ؤ هئر آد ایلۀ تظاهرائسۀ لر بئلۀ ، أن غدار مستبدلردن ضررلی دیرلر. بوُنلاراوُز خصوصی ؤ موهوم شخصییت لری اوُچون آزادلیغا بوُیوک ضربۀ لر وُورموش ؤ گئلۀ جئک داها بوُیوک ضررلر بوُنلاردان گوُزلۀ نیلیر.

فرقۀ میز أن بیر ینجی قدم دۀ بو خطرناک عنصرلر ایلۀ موباریزۀ آپارمالی ، اوُز عضولریندن سوُز دئیگیل ، ایش طلب اتمئلی دیر. ( بونون بوراسی بئلۀ ، اوُنون اوُراسی ائلۀ ) بهانۀ لرلۀ خالقی تشکیلات دان مأیوس ائدنلرۀ ، فرقۀ میزدۀ یوُل اوُلا بیلمز.

بیزیم گیزلی ایشیمیز ، مخفی سیاستیمیز یوُخدور. فرقۀ میز علنی ؤ رسمی فرقۀ دیر. اوُنون اساسلارینی مراجعت نامۀ میزدۀ آیدین بیر دیل ایلۀ یازمیشیق . هئرکئس قئید شرط سیزبیر صورت دۀ مقصدیمیزی قبول ائدیرسۀ ، تشکیلاتیمیزا یازمالی دیر.

هئرکیمین آیری مقصدی وارسا خوش گئلدی . بیزیم اوُنون نازینی چئکمئگۀ ، اوُنا یالواریب ـ یاخارماغا وقتیمیز یوُخدور. بیز وار قوُوۀ میز ایلۀ موباریزۀ مئیدانینا گیرمیشیک ، بو یوُلدا هئچ کئسۀ میننت قوُیماق فیکریندۀ دئگیلیک . کیمسۀ دن دۀ میننت چئکمئگۀ احتیاجیمیز یوُخدور. هئرکیم بیزیم لۀ بو بوُیوک ایش ؤ عالی مقصد یوُلوندا یوُلداش اوُلماق چالیشماق ایسترسۀ بوُیورا بیلر. اوُنا فرقۀ میزین قاپی سی آچیقدیر.

مسئولییت سیز آغیزلار، ایش ؤ فعالییتی فقط شیرین سوُزلرؤ حرارتلی دانیشیق لاردان عیبارت بیلن آداملارأصلا بیزیم احتیاجیمیز یوُخدور. اوُنلار مادامیکۀ فرقۀ میزین ضیدینۀ بیرسوُزدانیشمایبلار، اوُنلار ایلۀ هئچ بیرایشیمیز اوُلمییاجاق ، أما أگربوردا اوُردا اوُتوروب علیهیمیزۀ بوُش بوُغازلیق ؤ یاراشمییان سوُزلر دانیشیب خالقی موباریزۀ دن ساخلاماغا چالیشماق ایستۀ سۀ لر، بیز اوُنلاری آزادلیق جبهۀ سی نین فراری سربازلاری تانییب ، قاباغینی آلماغا اقدام ائدۀ جئییک .

بیز بونون لا بوُتون آزادیخواهلارا ؤ دوُستلاریمیزا اعلان ائدیریک کی ، أگربیزیم حئرکاتیمیزدا ، سوُزوموزدۀ ، ایشیمیزدۀ بیر سهو ؤ خطا گوُرسۀ لر، گئلیب دوُستانۀ بیر صورت دۀ بیزیم اوُزوموزۀ دئسینلر. بیز کمال ممنونییت لۀ اوُنلارین حق سوُزلرینۀ قولاق آسیب ، فایدالی گوُستریشلرینی قبول ائدۀ ریک ، بو هئچ دۀ بیزیم آجیغیمیزا گئلمز. بئلکۀ چوُخ شاد اوُلاریق کی ، دوُستلاریمیزبیزۀ علاقۀ مند اوُلدوقلاری اوُچون ایشیمیزین ایصلاحینا چالیشیرلار.

لاکلن ، بوُش بوُغازلیق ، یالان ، تهمت ، ایفتراء ، دالدان بوُغما چیخارماق ، ، بیزیم خوُشوموزا گئلن ایشلردن دئگیلدیر. بوُنو بیز خائین لیک ؤ آزادلیغا أنگل توُرتمئک ، مستبد لرؤ مرُتجع لرین دئگیرمانینا سو آچماق حئساب ائدریک . اوُنا گوُرۀ بو کیمی عنصرلرلۀ چوُخ جیددی مباریزۀ ائدیب ، وارقوُوۀ مزایلۀ بو مهلک ؤ خطرناک بلانین قارشیسینی آلاجاییق .

آذربایجان غزه تی ـ 17 شهریور 1324 شمسی ـ نمرۀ 2 ـ

( میرجعفر پیشۀ وری ، سئچیلمیش أثرلری) ترتیب چیسی : آذرخش 1 /11 / 2014