فارس‌لارین هامیسی ناسیونالیست دیر ــ حسن راشدی
۱۳۸۱جی ایل تبریز مجلیس وکیلی علی اصغر شعردوست پیشنهادی “شورای عالی انقلاب فرهنگی ” و ” ارشاد اسلامی ” اداره‌سی تصویبی ایله شهریورین ۲۷سی و اوستاد شهریارین وفات گونو ” روز ملّی شعر و ادب ایران ” (ایرانین ملّی شعر و ادب گونو) اعلان اولدو .
بو اعلاندان سونرا فارس آشیری ناسیونالیست‌لری اَل- آیاغا دوشه‌رک شهریارین اؤلوم گونونون “شعر و ادب گونو” اولماغینا اعتراض ائدیب اوستاد شهریارین اوچ جیلد و ۱۷۲۰صحیفه لیک وزیری قطع‌ده سؤیله دیگی فارسجا شعرلری (۱) و اونون بوتون ایراندا دیللر ازبری اولان: علی ای همای رحمت، آمدی جانم بقربانت ولی حالا چرا، جوانی شمع ره کردم که جویم زندگانی را، ای وای مادرم، پیام به انیشتین و اورَکلری اوخشایان باشقا فارس شعرلری نین هئچ بیریسی فارس ناسیونالیست‌لرینی راضی ائتمه ییب اونون یالنیز ۳۲۷صحیفه آنا دیلده یعنی آزربایجان تورکجه‌سینده سؤیله دیگی شعرلری اونلاری عصبی لشدیریب شهریار آدینا آدلانان گونه اعتراض ائدیب دونیا شهرتلی شاعیری تحقیر یاغمیرینا توتدولار؛ سونوجدا ” روز ملی شعر و ادب ایرا ن” ” روز شعر و ادب فارسی ” آدی ایله تقویملرده یئر آلدی !
یعنی آشیری فارس ناسیونالیست‌لری حتی ایران آدی ایله شعر و ادب گونونو بئله هضم ائده بیلمه دیلر، چونکو هر بیر شعر و ادب یالنیز فارس دیلی، فارس ادبیاتی و فارس آدی ایله اولمالی دیر؛ ایران آدی ایله اولورسا بلکه ایراندا یاشایان و فارس اولمایان ملّت‌لرده اؤز دیل و ادبیاتلارینی او چرچیوه‌ده گؤرسون‌لر و اونلارین‌دا بو گونده پایلاری اولسون !
ایندی هر ایل شهریورین ۲۷سینده و اوستاد شهریارین اؤلوم گونو بیر عده گلیب رادیو – تلویزیون‌دا شهریارین فارسجا شعرلری باره‌ده تحلیل‌لر وئریرلر، سانکی شهریارین دونیا شهرتلی “حیدر بابایا سلام ” و باشقا تورکجه سؤیله دیگی شعرلری تجزیه تحلیل اولورسا ایرانین تجزیه سینه سبب اولاجاق !
طبیعی کی، اونلارین باخیمیندان تورک دیلی و ادبیاتی‌نین ایران چرچیوه‌سینده یئری یوخدور، آخی اؤلکه نین بوتون امکانلاری یالنیز فارس دیلی و ادبیاتی اختیاریندا اولمالی دیر و اونلارین گؤزونده ایران یعنی فارس دئمکدیر !
ائله همان گؤنلرده یعنی ۱۳۸۱جی ایلین مهر آیی نین ۲۷سینده باشقا دوستلارلا بیرلیکده وارلیق دفترینده و دوکتور هئیتین حضوروندا اولارکن من دئدیم:
آقای دوکتور گؤرورسونوز شهریارین وفات گونو “روز ملّی شعر و ادب ایران” آدی اولدوقدا فارس‌لار نئجه های -کوی سالیبلار ؟
و آرتیردیم: شهریار بو قَدَر بو فارس‌لارا خدمت ائدیب و دؤرد جیلدلیگ دیوانی‌نین اوچ قالین جیلدینی فارسجا و یالنیز بیر کیچیک جیلدینی تورکجه یازیب دیر، آنجاف بونلار بو های-کویو اونون تورکجه سؤیله دیگی شعره گؤره سالیبلار و دئییرلر بو مسئله پان تورکیسمی گوجلندیریر !
دوکتور هئیت دئدی:
“هله بوجور مسئله‌لر قاباغا گلنده من ائوده‌ده درگیرم (حیات یولداشی نین فارس اولدوغونا اشاره ائتدی) .”
من دئدیم: آقای دوکتور فارس‌لارین هامیسی ناسیونالیست دیر .
دوکتور هئیت تحکّم له دئدی:
” فارس‌لارین ان آلچاق طبقه سیندن توتدو ان یوکسک طبقه سینه قَدَر هامیسی ناسیونالیست دیر ائرمنی لر کیمی، آمما بیزلرین هره‌سی بیر هاوا چالیر !” (۲)
دوکتور هئیت بو سؤزلرین داوامیندا دئدی:
” یاخشی اولدو فارس‌لار شعر دوست بو پیشنهادی ائتدیگینه گؤره اونادا پان تورکیست دئدیلر، چونکو شعردوست اؤزو بیزلره پان تورکیست دئییردی، ایندی فارس‌لار اونون اؤزونه‌ده پان تورکیست آدی قویدولار ! ”
سؤیله نیلن تاریخ: ۲۷مهر ۱۳۸۱
مکان: دوکتور هئیت مطّبی (وارلیق دفتری)، آخشام اوستو
بو مکاندا حاضیر اولانلار: حسن راشدی، حسین گونئیلی، ابراهیم رفرف، رحمتلیک میر هدایت حصاری، حسن بگ هادی …
…………………………………………………………………………….
(۱) تهران انتشارات نگاه ، انتشارات زرین ” دیوان شهریار ” چاپ تاریخی ۱۳۷۴
(۲) دوکتور هئیت بو جمله نی چوخ اؤزل کلمه لردن استفاده ائده رک دئدی کی ، آنلامی بو ایدی
۲۱ / ۸ / ۱۳۹۳
