آذربایجان تورکجه‌سی سؤزلوگو" یایینلاندی
آذوح: شبهه‌سیز اسماعیل جعفرزاده‌نین ایکی جیلدلیک سؤزلوگو، ایراندا تورکجه‌نین سؤزلوکچولوک آلانینداکی بوشلوغو اؤنملی اؤلچوده دولدوراجاق و سونراکی سؤزلوکلر اوچون دگرلی بیر قایناق اولاجاقدیر
اسماعیل جعفرزاده‌نین حاضیریلادیغی، قیساجا "ارک سؤزلوگو" آدی وئریلن "آذربایجان تورکجه‌سی سؤزلوگو" تبریزین احرار یایینلاری طرفیندن نشر ائدیلدی.
ایکی جیلددن اولوشان بو اثرده، ۱۱٥ میندن چوخ تورکجه آنا سؤزجوک؛ دئییم؛ یئر و شخص آدلاری، سؤزجوکلرین فارسجا و بعضاً اینگیلیزجه قارشیلیقلاری و بعضی کلمه‌لرین کؤکو ایله ایلگیلی مؤلیفین گؤروشلری یئر آلماقدادیر
اسماعیل جعفرزاده کیتابا یازدیغی گیریشده، "دیوان لغات‌الترک، سنگلاخ، صحاح‌العجم، اورخون کتیبه‌لری، سومر، دده‌قورقود، تاراما سؤزلوگو و درله‌مه سؤزلوگو"ندن یارارلاندیغینی قید ائدرک، سؤزلوکده ایشله‌دیلن یازی قوراللاری، تورک عرب الیفباسیندا حرفلرین سیرالاماسی، تورکجه و یابانجی کلمه‌لرین (عرب-فارس و آورپا دیلرین آلینمیش کلمه‌لرین) یازیلیشی و تورکجه‌نین دیل‌بیلگیسل اؤزللیکلری ایله ایلگیلی قیسا بیلگی وئرمکده‌دیر.
کیتابین ۳۳-جو صحیفه‌سینده‌کی بیلگیلردن، مولیفین ۱۹٥۷ (۱۳۳٦) ایلینده خوی شهری‌نین قره‌ضیاالدین ماحالیندا آنادان اولدوغونو، سولاما و آغاجلاما بؤلوموندن لیسانس و عینی بؤلومدن یوکسک لیسانس دیپلوماسی ایله مأذون اولدوغونو، ایش حیاتی ایله بیرلیکده "روشهای کنترل رسوب" و "کاربرد کامپیوتر در مهندسی رودخانه" آدلی کیتابلاری یایینلادیغینی اؤیرنیریک.
اسماعیل جعفرزاده کیتابین ۳۱-جی صحیفه‌سینده وئردیگی قایناقلار قیسمیندا، یایقین و استاندارد قایناق گؤسترمه یؤنتمیندن فرقلی اولاراق، اؤنجه آد و داها سونرا سوی‌آدی وئرمیش؛ بعضی مولیفلرین آدینی، بعضی اثرلرین یایین‌ائوی و یایین تاریخینی یازماغی اونوتموشدور.
چوخ دقتله و اوزون بیر چابا سونوجوندا حاضیرلانان بو سؤزلوک، داها اؤنجه یایینلانمیش اولان سؤزلوکلرله مقایسه‌ده داها چوخ سؤزجوک ایچرمکله بیرلیکده، تورک دیلی‌نین گئنیش بیر آلانینی احاطه ائتمکده و دوغو تورکجه‌سیندن باتی تورکجه‌سینه قدر، یعنی چاغاتای تورک یازی دیلی، آذربایجان تورکجه‌سی و آنادولو تورکجه‌سینه عاید کلمه‌لری احتیوا ائتمکده‌دیر. بو آچیدان باخیلدیغیندا کیتابین آدی‌نین "آذربایجان تورکجه‌سی سؤزلوگو" دئییل، "تورکجه سؤزلوک" اولسایدی داها قاپساییجی و داها اویغون اولابیلردی.
شبهه‌سیز اسماعیل جعفرزاده‌نین ایکی جیلدلیک سؤزلوگو، ایراندا تورکجه‌نین سؤزلوکچولوک آلانینداکی بوشلوغو اؤنملی اؤلچوده دولدوراجاق و سونراکی سؤزلوکلر اوچون دگرلی بیر قایناق اولاجاقدیر.
سانا
