سیزه بوگون بیر سیردان و سئحیرلی بیر کؤیولدن سؤز آچماق ایستیرم. حتتا او سئحیرلی کؤیولون تام اولاراق آدرئسینی ده وئره جه یم.

عئینالی داغینین، کهلیک بولاغیندادی منیم بحث ائتدیگیم او کؤیول. ائشیدیگیمه گؤره، اوچ یولداش گئجه نین بیرینده اورایا گئدیب و سحره دک او کؤیولده قالیرلار.

اوچ یولداشدان ایکیسی اورادا، گؤزه گؤرونمه ین بیر یارادیغین، وار اولدوغونا اینانیردیلار. بیلریدیلرکی، او یارادیق هر یوز ایلدن بیر اؤزونو گؤستریب و بعضی اینسانلارا، اؤزل بیر گوج وئریردی. یارادیق او اینسانلارا  یئر چکیمینه قالیب گلمه قودرتینی باغیشلاییردی. هیندوستان مورتاضلاری کیمی، اؤزلرینی یئردن گؤی اوزونه قالدیرا بیلیردیلر.

بیرینجی یولداش، ایچدن و بؤیوک بیر هوسله، او گوجه صاحاب اولماق ایستیردی. ایکینجی یولداش، او یارادیغین و اونا وئره جه یی گوجو بیلیردی، آمما گؤیده اوچماق هئچ ده اونو ایلگیلندیرمیردی. اوچونجوسو ایسه کؤکدن ائله بیر یارادیغین، او کؤیولده یاشادیغیندان بئله خبری یوخودو. بو اوچ یولداشدان فقط بیرینجی یولداش، او یارادیقلا ایلگیلی اولان، اؤنملی بیر حقیقتدن خبری واریدی و اودا بو ایدی:

" یارادیق اوچماق گوجونو ساده جه او اینسانا باغیشلاییردی کی، ایلک اؤنجه اونا اینانسین، سونرا دا او گوجه صاحاب اولماغی، وار گوجی ایله ایسته سین"

ائله بونا گؤره ده بوتون گئجه نی، دیگر ایکی یولداشلاری باشلارینی قویوب یاتدیقلاریندا، یالنیز بیرینجی یولداش سحره دک اویاق قالدی.

سحر چاغی یوخودان دوروب و عئینالی داغیندان قاییداندا، گئجه نی یوخلایان او ایکی یولداش اؤز دوستلارینین گؤیده اوچدوغونو گورونجه، نئیی الدن وئردیکلرینی آنلادیلار. آمما نه یازیق کی آرتیق گئج اولموشدو. تاسسوفله کؤیولده کی یارادیغین بیر داها اورتایا چیخیب و اونلارا دا اوچماغی اؤیرتمه سینه، یوز ایل داها دؤزمکلری گرکیردی و او ایکی یولداشین عؤمولری، بونو گؤرمک اوچون قیسا ایدی تاسسوفله.

عزیزلر! منه گولمه یین. بو یازدیقلاریم هامیسی حقیقتدیر. سیزه آدرسینی گؤستردیگیم او کؤیول، بیزیم آذربایجانیمیزدی. گؤرونمز یارادیق، مدرسه لریمیز و اوچماق گوجو ده آنا دیلیمیزدیر. بیزلردن گؤی اوزونده اوچان آدام چیخمیر. اوچماغی اینانان اینسانیمیزدا آزدیر. آمما ایشین دردلی یئری بیلیرسینیزمی ندیر.

اینسانلاریمیزین بیر چوخو، نه  بئله بیر یارادیغین وار اولدوغوندان خبرلری  وار، نه ده دیگر میللتلرکیمی، گؤیلرده اوچماغین نئجه ده اؤنملی اولدوغونو بیلیرلر. سانکی اوشاقلاریمیزین بیگانه دیلده ائییتیم آلماقلاری، نورمال بیر اینانج کیمی، بیزیم بئینیمیزه سوخموشلار. تورکو دیلده مدرسه نین اولماسی، او سئحیرلی کؤیولده کی یارادیغین وار اولماسی کیمی،  گولمه لی گلیر بیزیم میللته.

بیر خالقی، حیاتدا ساخلایان و اونو دونیادا بیر خالق کیمی گؤسترن، او خالقین سئحیرلی گوجلریدی. بیزیم خالق بو باخیمدان، دونیانین ان گوجلو میللتلریندن بیریسی ساییلا بیلینر. بیزیم زنگین دیلیمیز و تاریخیمیز، آذربایجانا اؤزل اولان موسیقیمیز، اینانیلماز گوجلو شئیلریمیزدیلر و بونلارین ایچینده دیلیمیزین اؤزل بیر یئری وار. بیر خالقین آنا دیلی، او خالقین اینسانلاری ایچینده ان اؤنملی باغی ساییلیر و اونو باغیمسیز بیر خالق کیمی گؤستریر.

نه یازیق کی آجی بیر حقیقتی قبول ائتمه لیییک. بیزیم آذزبایجان خالقی، سنه لر بویونجا بیر بیگانه دیلده ائییتیم آلماقلاری، آنا دیلینده مدرسه نین نه قدر اؤنملی اولدوغونو دا اورتادان قالدیریبدی. جورئتله دئیه بیلیریک کی، اگر بوگون آذربایجان مدرسه لرینده، ائییتیم دیلنین فارسجا ویا تورکجه اولماسینی صاندیق باشیندا بیر سئچیمله بللی ائتمک ایسته سک، اؤز سئحیرلی گؤجلرینه اینانمایان بیزیم میللتین 80% فارسجایا قرار وئره جکلر.

بورادا اینسانین عاغلیندا بیر سورو ایشارتی یارانیر.

بو بؤیوکلوکده بیر گؤجون اؤنملی اولدوغونو دوشونمه ین بیر میللته، ایستیقلالدان بحث ائتمک منطیقلی میدیر؟  خالقیمیزا، ایستیقلال چاغریسیندا اولماغین زامانی میدیر؟

اؤزونو بیر خالق کیمی دوشونمه ین و ایچینده کی گوجلرینه اینانمایان بیر میللته، باغیمسیزلیقدان سؤز آچماق، بوش بوشونا زامان خرج ائتمک دیر. بیر بؤلگه ده یاشایان خالقا، توپراق ایستیقلالیندان اؤنجه، دوشونجه باغیمسیزلیغینی باغیشلامالیسینیز. اگر گونون بیر گونونده ایستقلال موجادله سینده، آذربایجان خالقینین دسته یینی، آرخامیزدا گؤرمک ایسته ییریک، بونون تمل داشلارینی، ایندیدن قویماق زورونداییق و بو تمل داشلارینین ان اؤنملیسی، آذربایجان مدرسه لرینین تورکجه دیلینده ائییتیم وئرمه حاققیمیزی آلمامیزدیر.