ديلده بير سيرا كلمه لر واردير كي اونلارين آنلامي هم چتين و هم چوخ معنالي دير.

حق كلمه سي بو كلمه لردن بيري دير. حق كلمه سي چوخ زامانلار "آد" يئرينده، چوخ زامانلار "صفت" و بعضي زامانلارایسه "فعل" يئرينده ايشله نير.

اؤرنك اوچون او زامان كي دئييلير: "حق آلمالي دير، وئرمه لي دئييل" بورادا "آد" يئرينه ايشله نير. "حق سؤزو آجي دير" بورادا "صفت" يئرينده ايشله نير. "ياشارين حقي او دئييل دي كي اؤيله ايشلر باشينا گلسين" بورادا "فعل" يئرينه ايشله نير.

حق نئچه يئره بؤلونور. اخلاقي، قانوني، ذاتي، قازانمالي و...

حق بعضاً ده تانري آدي نين يئرينه ايشله نير. او يئرده كي تانري دان آد آپاريلير حق كلمه سيندن ايستيفاده اولونور.

اينسان آدلاريندا دا حق كلمه سينين گلمه سينی گؤروروك. حق وئردي و... حق كلمه سينی اگر ايكي يئره بؤلسك، گره ك ذاتي و قانوني حق لردن آد آپاراق. ذاتي حقلر او حقلر دير كي اينسانين دوغوم گونوندن اؤلومونه قده ر باشلانيب و آردي وار و بونلاري هئچ طورله آلماق اولماز. مگر اينسانلارين يازيديقلاري قانونلار الي ايله بونلار ياسقلانسين. ياشاماق حقي، ائولنمك حقي، آزادليق حقي و... .

بير سيرا حق لر قانوني حق لردير. اينسانلار ياشاديقلاري توپلوم لاردا بير سيرا قانون لار ايله ذاتي حق لرين قوروماق ايسته يير لر. اونون اوچون قانون واسيطه سي ايله جيزيقلار بلله نيب و بير سيرا حقلر تؤره  نير.

بو طور حق لري اؤلكه لرين ياسالاريندا دا گؤرمك اولار.

حق لرين ان اؤنملي لري اؤلكه لرين آنا ياسالاريندا يئرله شيب. دئمك اولار بو حق لر  ده حاكميتلرين و اؤلكه ده اولان ميللتين جيزيقلاري و حقلري بلله نير و آنا ياسادان آشاغي ياسالار او حقلري آرادان آپارا بيلمزلر.

اؤرنك اوچون ايران اؤلكه سينين آنا ياساسيندا حق كلمه سينين نئجه گلمه سينی بير سيرا اصل لرده گؤروروك:

اوچونجو اصلين 14- جو بندينده " قادينلارين و كيشي لرين تام اطرافلي اولان حقلريندن " سؤز گئدير.

15، 19 و 20 – جي اصل لرده " ايجتماعي – سياسال – اقتصادي حقلر" دن سؤز آچيليب.

34- جو اصل بئله دئيير:"هر كيمسه نين حقي دير و هر كيمسه نين حقي وار كي صالح محكمه لره موراجيعت ائتسين. محكمه لرين اولماسي ميللتين حقي دير. هئچ كيمسه لره، بو محكمه لره گئتمك اوچون قارشی گلمک اولماز"

67- جي اصل دئيير: "ميللت وكيل لري گره ك ميللت اوچون چاليشیب ، ميللتين حقينی قوروماق اوچون" آند ايچه لر.

121- جي اصلده بئله اوخويوروق: پرئزدنت (رئيس جمهور) گره ك "ميللتين حقينی قوروماق اوچون" و "وطنداشلارين حؤرمتلري و آزادليق لارينی قوروماق اوچون" آند ايچيب ، سؤز وئره.

154 – جو اصلده گليب: "ايران ايسلام جومهوريتي، حق و عدالت حؤكومتينی، بوتون دونيا ميلترينين حقي بيلير".

40 – جي اصل: "هئچ كيمسه اؤز حقلرينی يئرينه گتيرمك اوچون، اؤزگه لرين حق لرينه زيان وئره بيلمز و اونلارين حقلرينه و عمومي حقلره تجاووز ائده بيلمز".

بوندان بئله "حق وئرمز" چاليشاجاق حق كلمه سي حاقدا داها آرتيق سيزلره بيلگي (معلومات) وئرسين. آما اساس ايشيميز بوندان بئله اوخوجولاريميزين سليقه سي اولاجاق.

حقوق قونولاري چوخ اولدوغو اوچون اونلارين هانسي سي حاقدا دانيشماغي سيز اوخوجولارين اؤنه ريسی(پیشنهاد) اساسدا قاباغا آپاراجاغيق. عائيله حقوقو، بشري حاقلار، دولت و ميلت حاقلاري، ايش حاقلاري و... بير سيرا حقوق بؤلوملري دير. بو قونولاردا چاليشاجاغيق يازيلار حاضيرلاياق و هابئله سورغولارينيزا گوجوموز قده ر جاواب وئره ك.