بیزیم ائوین ده، سلامی وار

بیزیم ائوین، ائوده ایشی وار، گله بیلمه دی

بیزیم ائو ناخوشدی

بیزیم ائو، بیزیم ائو....

بلکی ایندی کی اوشاقلار، و گئنجلر بونلاردان بیر شئی آنلامازلار، آمما یقین ائله ییرم کی، بیرآز یاشلانانلار بوردا ایشاره ائتدیگیم ائودن، نه دئدیگیمی بیلدیلر.

بیر زامانلار، بیر اَرکه یین بوغلاری اوزاناندا، قافاسینین ایچینده کی بئینی یوخ، شالوارینین ایچینده کیلر بؤیوینده، آتا آناسی تئز ال دبردیب اونا بیر ائو آلیب، یا دا  کیرالاردیلار. آردیندان دا ائولندیرردیلر ویا یاخشیسینی دئییم، اونا آرواد آلاردیلار. بو آلیش وئریشدن سونرا دا، او تازا بوغو چیخمیش ارکک، هر یئرده اوتوروب دوراندا آلدیغی آروادینی، بیزیم ائو دئیردی. گویا بئله لیکله هم آلدیغی آروادینا سایقیسینی گؤستررمیش، هم ده اؤزونو ناموسلو بیری تانیدارمیش. 

گئچمیشده هر کیشینین بیر خانیمی اولاردی. اوتوردوغو ائوین سندی اؤز آدینا دا اولماسایدی، آلدیغی او ائو آدیندا اولان آروادینین، سندی اونون آدینا اولاردی.

ایندی ایسه، ائولرین ساییسی چوخالیب. سندی اؤز آدینا اولان ائوین یانیندا، جمهوری اسلامینین "صیغه" سایه سینده، قولنامه لی ائولره ده صاحاب اولور بیزیم بوغسوز ارکه ییمیز. هله سن بوش وئر او سندلیلرینی و قولنامه لیلرینی، بیر گئجه لیک موسافیرخانالار و هوتئللر ده وار ایندیکی چاغیمیزدا.

سیزجه بیزیم کولتوروموز دئییشمیش می؟ میللتیمیزین دوشونجه سی آرتمیش می؟ آرتیق بیزیم خالقیمیزین ارکه یی، قادینین نه اولدوغونو آنلامیش می؟

 بیر حقیقته اینانمالی ییق کی، هر بیر میللتین گله جه یی، اونون قیزلارینین و قادینلارینین اللرینده دی. چونکو  گله جکده کی  نسیللرین دوشونجه لری،  بو گونکو آنالارین قوجاغیندا بؤیوین اوشاقلارا باغلیدی.

بیزیم بوغلو ویا بوغسوز ارکه ییمیز، آذربایجانیمیزین گله جه یینی دوشونورسه اگر، هر نه ایسترسه ده ائتسین. صیغه ائله سین ویا باشقا قادینلارین پئشینه توشسون. هوتئللرده و هر هانسی بیر یئرلرده سندسیز ائولره بیر گئجه سینه، صاحاب چیخسین و سحریسی ده آیاغا قالخیب آذربایجان آذربایجان دئیه باغیرسین. اوتوروب دوروب  ائی وای وطنیم الدن گئتدی فیلان بئهمان دئسین. اؤزونو و دوشونجه لرینی دئییشتیرمک ایسته میرسه، جهننمه گؤرا، آمما هئچ اولمازسا بیر آز دورومو آنلاسین. قادینینا ائو گؤزونده باخماسین. آرواد آلماق کولتورونو بئینیندن سیلسین.

ایرانین ایندی کی وضعیتینده، کی کولتوروموز، آنادیلیمیز محو اولماقدادی، تکجه اومیدیمیز ائولرین ایچینده کی آنالاریمز و بؤیوتدوکلری اوشاقلاریمیزدیلار. بونو دا اؤز اللریمیزله محو ائتمه یک. اونلارا ایمکان یاراداق، هم اؤزلرینی آنادیلیمیزده، موسیقیمیزده و تاریخیمیزده گلیشتیرسینلر، هم ده اوشاقلاریمیزی.

قیزلار، قادینلار و آنالار بیزیم آروادلاریمیز دئییللر. بیزیم ائولر دئییللر. اونلار بیزیم وارلیغیمیز و شوبهه سیز گله جک نسلیمیزین، بوگونکو موعللیملریدیلر.