شعر: «آنام اورمویا»- استاد اسماعیل مددی (اولکر)
: اوستاد اولکرین «سئودا یولدایمیش» کیتابیندان سئچیلمیش بیر گوزل و دیرلی شعر «آنام اورمویا» آدیلا
ائشیدیرسینیزمی سیزده؟
«اورمو»یا قولاق آسیرام
اورمویا!
او قومرولاری سس سسه وئرنمه میش
چیناری دینله ییرم!
سیز ده دالیرسینیزمی؟
اورمویا دالیرام من اورمویا!
فره لرینی قوروماغا
قانا گرَن
او ووقارلی «قو»یا
«زارتوشت» اوجاغی باشیندایام
ایستی و سیجاق
اودلار یوردونون چؤرک قاپیسیندایام
تندیر، برکت قوخویور تنیم
اون کیمی اوزوم آغ!
اوسکوک -اوسکوک سو داشییر
دییرمان دولاندیریرام…
اورمونو ایشله ییرم ، اورمونو!
«اولکر»م!
«آغزیندا یوین چاتلایان
اورمودان گلن بیر آت» اوستونده یم
هله ده گؤرورم!
سیزده گؤرورسونوز
گؤردونوز
دئییلمی…
قیرمانجلادی «سامان میدانی»ندا
بوغدا تیغیمی « قیزیل دیش قشه»
گؤزو گؤی گاوور قالدیردی بیر باش
مسجیدیمین دوز قاپیسیندا قان پیاله سینی
هله ده جینگیلده ییر بازاریمین باجاسیندا
– ائشیدیر سینیز دئییلمی؟-
… مالی عجم حلاله! سسینی…
«قاباغی دوموز»
«دالیسی دنیز» شهریم!
تانیغیمسان
محشرگونودور
شاهدیم اول!
مینلرجه داغیلدیق
یوزلرجه بوغولدوق
اونلار یول
اونلار یول…
یئنه سندن اومودوق چارامیزی!
ساده جه سنین قاپینا گلدیک.
اولوب – بیتنی
اؤولادینا سؤرمادین
سن سارمادین!
دوزونلا دیری ساخلادین یارامیزی
آیینلا
اولدوزونلا
آیازینلا دؤل له دین قبیرلریمیزی
«کاظیم خان»
«قورد اوصالی»
بوغازییلا بؤیله اولادین:
بو اؤلکه دن بیر چینقیل
یاد نالینا دریلمز!
جان- باشدان پای وئریلسه
تورپاقدان پای وئریلمز!
و قالخدیق قبیرلریمیزدن
آت دؤشوندن
ایت دیشیندن آلدیق سنی
سنی یئنی دن دوغدوق عزیز شهریم
سن
یئنی دن دوغولدون کیشی بطنیمیز دن
و سونرا ایلیکلریمیزه ایشله دین
بو یاسانی هایقیراراق:
– نه قدر وارسا گلسین
یوردوموزا گؤز تیکن
چاغریلمامیش قوناق!
تورکوک
قوناق سئوریک!
تورپاغیمیزین اوستونده ده اولماسا
آلتیندا یئر وئره بیلریک.
قایناق: نسیم آذربایجان
