AZOH: Livandakı Hizbullah hərəkatının lideri şeyx Həsən Nəsrullah lider olduğu qrupun iki üzvünün ABŞ Mərkəzi Kəşfiyyat İdarəsinə işlədiyini bildirib.

O, daha bir şübhəlinin casusluqla bağlı yoxlanıldığını qeyd edib.

Nəsrullah deyib ki, həbs olunan adamlar Hizbullahın hərbi strukturuna ciddi ziyan vurublar.

Televiziya çıxışında şiə hərəkatının lideri Amerika səfirliyini casus mərkəzi adlandırıb:

“İsrail Hizbullaha yaxın düşə bilmədiyi üçün Amerikaya üz tutmalı olub”.

Şiə hərəkatını terrorist qruplarına aid edən ABŞ, Hizbullah liderinin bəyanatını təkzib edib.

Səfirliyin nümayəndəsi deyib ki, "bəyanat bu qəbildən olan onlarla əsassız çıxışlardan" seçilmir.

Son zamanlar Hizbullahın siyasi çəkisi artmaqdadır.

Livanın yeni tərtib olunmuş kabinetində hərəkat iki nazirlə təmsil olunub.