(هر هانسي بير شکيلده بدل اؤدييه جگيگ سه، آنجاق آزربایجان يولوندا اؤدمه ليگيک)

بللي سببلر اوزوندن، دونيا، بؤلگه و مظلوم آنايوردوموزدا باش وئرن حاديثه لره چوخدان موناسيبت بيلديرمه ديگيمه گؤره، سؤزه هاردان باشلاماغي دا ياديرگاميشام.

اوميد ائديرم، تيتيره ين بارماقلاريمين آراسيندا اوينويان بو يالقيز قلم، ميللي معنافئيميزين يولوندان آزماز، چئشيتلي اويونلار مئيدانيندا چاش باش قالانلاريميزا گرچکلري آيدينلادار، اينامي آرتيرار.

سون زامانلار باش وئرن حاديثه لر، عرب اؤلکه لريني بوروموش دوروم و اونون بؤلگه ميزده کي تاثيري چئشيتلي فيکيرداشلاريميز طرفيندن تحليل ائديلميش و تاثير درجه سي اؤلچولموشدور. بو تحليللرله حقيقي دورومو ترزي نين گؤزونه قويدوغوموز زامان، بؤيوک بؤلومونون آرزولار گؤزونده قانتارين ديلينده آغير باسديغي آنلاشيلماقدادير. اؤزلليکله " آزربایجان ميللي حرکاتي نين " گئتديکجه بؤيويوب گئنيشلنه رک ميلتيميزين حاضيرليق دؤورونه ياخينلاشديغيني هيسس ائدن آنتي-تورک، آنتي-آزربایجان قوووه لرين تاريخ بؤيو يوروتدويو هيلگرانه سيايستلري نين بوگونکو فورماسي نين تاثيرلريده اونودولماماقدادير. باشقا سؤزله، فارس ايرقچيلاري نين علئيهيميزه آپاردغي ديرئکت تبليقات و تخريباتين يانيندا، ايچيميزده کي دوشونورلر، يازارلار و فيکير بيلديرنلره دولايلي تاثيري ده دانيلماز بير گرچکدير. چونکي، آرزولار درياسيندا بوغولان بو آيدينلارين، اؤزلليکله ارکؤوونلري نين آغزينا سالينان سؤيلملر، ظاهيرده دوغرو و آلداتيجي اولسا دا، درينليکلرينه يئنديگينيز زامان " ميللي حرکاتيميزين " اوچوروما سوروتلنمه سينه آپاريلان يولون هامارلانماسيني گؤرمک، چتين اولماسا گرکدير. فارس راسيزمي نين بو فورمادا ميللي حرکاتيميزا نوفوزونون يانيندا، بؤلگه و اوزاق دؤولتلرين ماراقلاري، اونلارين چئشيتلي کاناللارلا فيکير دايره ميزه پوفله ديکلري تهريف ائديجي دوشونجه و داورانيشلاردا گؤزدن قاچماماليدير. شوبهه يوخدور کي، ايستر داخيلي، ايسترسه ده خاريجي ائتکيلرين تاثيري آلتيندا او اؤلکه نين بعضي چالخانتيلارا بويلو اولدوغو قاچينيلمازدير. اونون اوچون، هر هانسي بير سؤيله مي قوووق کيمي شيشيرديب، ميلتيميزي قرار وئرمه يه چاغيرانلارا اويماق، پرده آرخاسينداکي حدفلره قوربان اولماقلا نتيجلنر بيلر. مسله يه بو زاوييه دن ياناشاندا، ايراندا باشوئرنلري بوتون بؤيوتلاري ايله اؤلچمه يه اؤزن گؤسترمه لي و قرار وئمه ليگيک دييه دوشونورم.

شوبهه يوخدور کي، بوتون فيکير بيلديرنلري عئيني ترزيده اؤلچمک خطاسينا گيرمک دوغرو بير مودئل تشکيل ائتمز. آزربایجانين نجاتينا موثبت زاوييه دن باخانلارين آرزولاري دا موناسيبتلرده اؤزونو گؤسترمکده دير. بونون يانيندا، چئشيتلي دوشونجه لره ماليک اولان، آتئيست و آنتي-ايسلام گؤروشلر، اسکيدن گلن ايدئولوژيلرين تاثير دايره لري و فارسچيليق تبليقاتي باتلاغيندان چيخامييان بعضي سويداشلاريميزيندا توتومو دوزگون ديرلنديريلمه ليدير. سون جومله ده يازديغيم تفککورده، ايران آدي آلتيندا فارسچيليغين تمه لي اولان ايسلامدان اؤنجه کي دورومون ييخيلماسيندا، عرب-ايسلام عاميليني سوچلو گؤرنلر ده اؤزلرينه ياراتديقلاري خيالاتلا ياشايير و حاديثه لري تحليل ائدير.

منجه، بوتوتن وارليغي تالانميش، شيددتلي عاصيميلاسيونا تابي توتولموش گونئي آزربایجاني دوشدويو بو بلادن قورتاريب، ميللي-سيايسي، اياقتيسادي-ايجتيماعي مظلومييت ساجيندا قوورولماقدان نجات وئريب، اينکيشاف يولو بيرينجي حدف اولماليدير. اونا گؤره، آناليزلريميزده، يوخاريدا قئيد ائتديگيم آخساقليقلارا يول وئرمه دن فيکير سؤيله مک اوچون قورشاغيميزي دويونلمه ليگيک. اؤزلليکله، کومينيزم آدلي پرده آلتيندا روس امپيرياليزميندن قورتولان شومالي آزربایجان جومهورييتي نين موستقيلليگي نين تاثيري ايله ديرچلمکده اولان ميللي حرکاتيميزين بو کؤرپه چاغيندا، اونون آياقلاريني زويدوره جک، ييخيلماغا سوروتلنه جک فيکير و ساچماليقلاردان اوزاق دورولماليدير. دويگولاريميزا قاليب گليب، بئيين-اورک باغلانتيسي ايله گرچکچي زاوييه دن باخماغا چاليشمالي، حرکاتيميز يئتگينليک چاغينا چاتمادان، اونو بورولقانلاردا سرگردان ائتممه ليگيک.

تونسودان باشلاييب، میصرا، اوردان دا، بحرئين، عرب ياريماداسينا و نهايت ليبي و ايراق اؤلکه لرينه سيچيرايان خالق آياقلانمالاري ياييلديقجا، بونون باشقا ديکتاتور رئژيملره و اؤزلليکله ايران ايسلام جومهورييتينه تاثيري گوندمده دير. بيزي داها چوخ ايلگيلنديرن ميلتيميزين ياشاديغي اؤلکه اولسا دا بؤلگه ده کي سياسي، ايقتيصادي و ايجتيماعي چالخانتيلارين بير بيرينه تاثيري اينکار ائديلمزدير. آنجاق چئشيتلي تاريخي، مدني و ميللي گؤروش فرقليليکلري ايله بيرگه رئژيملرينده ماهييتي نظره آلينمادان اولگو بيچمگين خطالي اولاجاغي آيديندير. يوخاريدا آدي چکيلن عرب اؤلکه لري نين ديل باخيميندان بنزرليگي اولسا دا هر بيري نين اؤزونه خاص سيستئملرله يؤنلديگي آشيکاردير. بونلارين هاميسيندا ديکاتورلوقلارين وارليغي گؤزه چارپماقدا، آما، فرقلي اؤلکه لرده فرقلي مئتودلارلا حاکيمييتلريني سوردوکدورلري ده اينکار ائديلمزدير. اونون اوچونده بو اؤلکه لرده کي قيياملارين گئديشاتي و نتيجه لري فرقلي مودئللرله ايره ليله يير، اونو بوتون ديکاتورلوقلارا فورمولئ ائتمک دوزگون باخيش ساييلماماقدادير. بؤلگه ده بعضي دئموکراتيک عرب اؤلکه لرينده اوخشار حاديثه لرين باش وئره جگي سيگناللاري اولماديغي آيديندير. بونون يانيندا دونياداکي کوتلوي اينفورماسيون واسيطه لري نين گئنيشلنمه سي و سوسيوخبرلشمه ني دوزگون ديرلنديريرسک، بو آياقلانمالارين ائر-گئج بوتون ديکتاتور اؤلکه لره ده ياييلاجاغي اؤن گؤروله بيلر. چئشيتلي سببلر ، او جومله دن اهاليسي نين سايي، اراضيسي نين ووسعتي و تاريخي گئچميشيندن يولا چيخاراق، میصرده کي قييام فورماسي نين ايراندا باش وئره جگي، حتّي تهرانين آزادليق مئيدانيني تهرير مئيدانينا اوخشادانلاردا آز دئييل. فيکريمجه، حاديثه لرين ايرانا تاثيرينه و مرکزي حاکيمييتين خالقي سيخان دويونلري نين بوشالديغي زامان داها چوخ ساييلي و قاپساملي تظاهورتين باش توتاجاغينا اينانماقلا بيرليکده، آشاغيداکي تحليللره گؤره ايراندا دئييشيم مودئلي کيمي گئچرلي اولموياجاقدير. بو فيکيرلري بير آز داها درينليشديرمک اوچون اؤنجه ايران، سونرا گونئي آزربایجاندا دوروم ديرلنديرمه سي نين آردينجا، بيز نه ائتمه ليگيک سوالينا جاواب آخدارماغا چاليشاجاغام.

ايرانداکي دوروم:

آ- يرانداکي دؤولتچيليک ستراکتورو میصرده کي ندن تمامن فرقليدير. خالقين ديني اينانجلاريني سؤمورن حاکيمييت، فارسچيليق سيايستي ايله ده خال قازانير. 2

ب- يرانداکي اوردونون ماهييتي میصرده کي ندن تمامن فرقليدير. بو فرقلنمه ستراکتؤر باخيميندان اولدوغو کيمي، ايدئولوژيک جهتدن ده اؤزونو گؤسترمکده دير.

ج- يرانداکي ايقتيصادي دوروم میصرده کي ندن تمامن فرقليدير. هر هانسي بير سياسي حرکتين، جمعييتده کي ايقتيصادي باغلاري دوزگون اينجلنمه ديکجه، آزگين آناليزلر آزگين نتيجه لره گتيريب چيخارا بيلر. چونکي، اينسانلار هر شئيدن اؤنجه هاقلي اولاراق گئچيم قايناقلارين اؤلچر. ميللي گليرين %80- ني نفتن گلن گلير تشکيل ائتمکله بيرليکده، اؤزلليکله سوبسيت فورماسينداکي يارديملارين قالديريلماسيندان سونرا، بعضيلري نين خطالي تحليللري گرچگي اکس ائتديرمير. بونلارا گؤره، بو دولايلي يارديملارين قالخماسي ايله توکتيم مادده لري نين باهالاشاجاغي، ميلتين کوچه لره تؤکولمه سينه سبب اولاجاقدير. حالبو کي، اکثرييتي يوخسول اولان خالقين ديرئکت يارديم آلاجاغي و بونلاريندا %60- نين يوخسوللوق درجه سي نين آجيناجاقلي اولماسي، او ايددئاني ردد ائتمکدير. چونکي، جمعييتين بو قاتي نين بؤيوک توکتيم (مصرف) قابيلييتي اولماديغينا گؤره پارا شيشمه سي، يني انفلاسيوندان بؤيوک تاثير گؤرمه ديگي حالدا، 6 باش بير عاييله نين آيدا 240 مين تومن ديرئکت دؤولتدن آلماسي اونو ممنوعن ائده جکدير، رئژيمه قارشي چاغيريشلارا آغيز بوزه جکدير. همين عاييله اؤنجه کي سيستئمده ايشله ديگي گون 3-4 مين تومن آلديغي حالدا ايندي اونا علاوه تن، يارديملاردان دا قورصاغيني دولدوراجاق، قارين سانجيسيني آزالداجاقدير. اکينچيلرين هاميسي بو يارديملاردان فايدالانديغي حالدا، عاييله مصرفلري نين بؤيوک بؤلومونو، اؤزونون ايستيهسالي اولان اورونلردن قارشيلاياجاغينا گؤره انفلاسيوندان چوخ ائتکيلنمييه جکدير. ايشيق، بئنزين، سو، تئلئفون کيمي عومومي خيدمتلردن آز ايستيفاده ائدن بونلارين خيابانلارا تؤکولوب تظاهوراتا قوشولما فيکريلري دوغرو ساييلمييا بيلر. آيري ياندان ايسه بو پول پايلاماقلا اهالي نين بؤيوک اکثرييتي ديرئکت اولاراق دؤولت اورگانلاري نين کونترولو آلتينا گيره جکدير. بودا يديندير کي، او اؤلکه ده ايقتيصادي موناسيبتلرين ساغلام بينؤوره سي اولماديغينا گؤره، ليبئرال ايقتيصاديياتين گئچرسيزليگي، رقابت گوجونون قيسيتليغي، عوموم ميللي ايقتيصاديياتي اوزون مودتده اوچوروما آپاراجاقدير. اؤزلليکله صنايع سئکتؤرو بئينالخالق رقابته دؤزمييه جگينه گؤره ايفلاسا اوغروياجاق، ايشسيزليک آرتاجاق و عومومميللي گلير آشاغي دوشه جکدير. امته نين باهاليغي نتيجه سينده حسابلامالاردا آدام باشينا دوشن گلير يوکسک گؤرونسه ده گرچگي يانسيتميياجاقدير. آما، بوتون بونلاردان ان چوخ ائتکيلنن وارليلار اولاجاقدير، ثروتلري قالخانلاري اولان بو کسيم ايسه ياشاماغي، تظاهوراتدا قامچيلانماقدان اوستون توتاجاقدير. او اؤلکه نين اساس گلير قايناغي نين نفت قويولاري اولماسي سببي ايله بو ايقتيصادي گئريله مه دؤولتين آسدي-کسدي سيايستينه چوخدا تاثير ائتمييه جکدير.

د- میصردا بؤلونمه تهلوکه سي اولماديغينا گؤره، اهالي قوشقو دويمادان قوشولوب، دئموکراتيک هاقلاريني طلب ائمکدن چکينمه ميشدير. راسيزمين کؤک سالديغي ايراندا بو تهلوکه جيدي بير حاله گلديگينه گؤره، فارسچي قوووه لر ديکتاتورلوغو دئموکراسييه ترجيه ائده جکلر. اونون اوچوندور کي، دفعه رله دئييب و يازديغيم کيمي " ايراندا دئموکراسي نين " ان بؤيوک دوشمني 3 فارس شووينيزميدير. اونودا ييخا بيلن آنجاق " آزربایجان ميللي حرکاتي نين " بيرلشيب گوج مرکزينه دؤنوشمه سي ايله مومکوندور.

گونئي آزربایجانداکي دوروم :

آشاغيدا آنلاتديغيم داورانيشلار، بيله رک ويا بيلمييه رک، اصلينده ميللي حرکاتيميزي فارس شووينيزمي نين قويروغونا باغلاماقدان باشقا بير معنا ايفاده ائتمه مکده دير. آنجاق، بو قيل اينجه ليگينده آييريم چيزگيسيني ايليک بويا ايله چکمه ليگيک.

آ- يئشيللر حرکاتي نين باشلانگيجيندان بوگونه قدر الده ائتديگيميز تجروبه گؤستردي کي، او اؤلکه ده باش وئرن هر هانسي بير قيميلدامايا قوشولاراق فايدالانماغي اؤنه سورن سويداشلاريميز تاپيلماقدادير. عئيني دوشونجه يه صاحيب اولان سويداشلاريميزين، بؤلگه ده کي بوگونکو چالخانتيلاردان دا پاي اومماسي گؤرونمکده دير. هر هانسي بير دئييشيکليکده اورتايا چيخاجاق حاکيمييت بوشلوغوندان ايستيفاده ائتمک تئوريسيني اورتايا آتانلارين فيکيرلريني تکزيب ائتمک اولماز. آما هانکي شراييطده بيز بو بوشلوقدان فايدالانا بيلريک مفکوره سيده دوزگون ديرلنديريلمه ليدير. اوزاغا گئتمک لازيم دئييل، 32 ايل اؤنجه ايسلام اينقلابي اسناسيندا يارانان بوشلوقدان نييه فايدالاناماديق. بوگون چئشيتلي فيکيرلره صاحيب اولان بعضي سويداشلاريميز، بو و بونا بنزر دليللره سؤيکنه رک " آزربایجان ميللي حرکاتيني " خيابانلارا چاغيراراق، او زامانکي باشاريسيزليغي موختليف يوروملارلا يارگيلاماقداديرلار. آما بيز اونودماميشيق کي، او مقلوبييتلرين باشليجا سببلريندن، همين تودئيي و فدايلرين، ميللي حرکاتا اينامسيزيليغيندان ايره لي گلميشدير. قازئت و نشريياتلاريندا، آزربایجانداکي حرکاتي چئشيتلي مئتودلارلا وورانلار، آيتوللاه شرعيتمداري نين " ساواکداکي " سورقولانماسيني مينلر نوسخه چاپ ائديب، تهران -تبريز و باشقا شهرلرده دووارلارا ياپيشديرانلار، ميلتي اؤز يولوندان آزديرمادي مي؟ بوگون، اونلارين قالينتيسي ويا باشقا فارسچي قوروم و دوشونجه لرين يئني مئتودلارلا ميللي حرکاتيميزي دوز يولدان جايديرميياجاقلاري هاردان معلومدور. البتته بوگون او گون دئييل، آما، اوچونجو قوووه کيمي تظاهور ائتمگيميز هله مومکون دئييل، صبيرلي اولماليييق.

ب- ميللي موباريزه مئيدانيندا قارشيميزدا دوران فارس شووينيزميني بؤلمه لره آييراراق بيزيم دوشمنيميزين آنجاق بوگونکو رئژيم اولدوغونو چئشيتلي دليللرله ثوبوت ائتمه يه چاليشانلارين حدفي ندير. بعضي ساده ديل دوستلاريميزين بو تبليقاتين تاثيري آلتيندا " بو رئژيم گئتسه بيز قورتولاجاييق " سؤيلملرينه بير سورو وار. بو رئژيم گئتسه، يئرينه هانکي رئژيم گله جکدير کي، سيز قازاناجاقسينيز. بوگونکو دورومدا، اؤزلريني اوپوزيسيون آدلانديران قروپلارين فيکير و داورانيشلاريندان، هانسي ايرقچي رئژيمين گله جگيني سئچمک چوخ مو چتيندير. شوبهه يوخدور کي، مرکزي حاکيمييتين ضعيفله مه سي، بيزيم مئيدانيميزين گنيشله مه سينه سبب اولاجاقدير. آنجاق، بيزيم آزادليغيميزين سيرلاري رئژيم داواسيندا دئييل، فارس دؤولتچيليگي نين ييخيلماسي ايله مومکون اولاجاقدير، اوسانمادان اورايا دوغرو ايره ليلمه ليگيک.

ج- بزيلري بيلينميين، بلکه ده بيلينن سببلر اوزوندن تلسه رک خاريجده کي اوپوزيسيونلا علاقه يه گيرمگي دوشونور. سون زامانلار بونا مئييل 4 گؤسترنلرين آچيقجا بو ديالوگو ديله گتيرمه سي ائشيديلمکده دير. بعضيلري ده اونلارين پارتييالاريندا عوضو اولاراق گويا آزربایجانين معنافئي نين قوروياجاقلاريني ديله گتيريرلر. ميلتيميزين اويالانماسي ايله نتيجلنن بو فيکير ساهيپلري اساسن ميللي تفککورو اولمويان، آما اؤزونو ميللي قوووه سايان شخصلر طرفيندن سؤيلنمه سي ده دوشوندوروجودور. بعضي دوستلاريميزيندا بونا دستک وئرمه سي نين سببي، تاريخي بير گرچک اولان " بوتون پروبلملرين نهايت موزاکيره يولو ايله هلل اولونماسي " پرئنسيپيدير. بو ساده منطيقين فلسفي آنلاييشي هاميميزا معلومدور، آما هانکي موزاکيره نين آرخاسيندا بؤيوک گوج اولمادان باشارييا اولاشميش سوالي جاوابسيز قالديغي کيمي، کيمله موزاکيره ائتمک مواديله سي نين ده چوخ مجهوللو اولدوغو بيلينمکده دير. ميللي حرکته هئچ بير دخلي اولمويان بو اينسانلارين " باشقالاري يئدي من قالديم " دوشونجه سي ايله حرکت ائتديگيني، کيمين قوللوقچوسو اولدوقلاريني سئچمک ده چتين دئييل. بو خاريج نيشينلرده صميمييت اولسا، موزاکيره قاپلاريني داخيلده کي موباريزلرين اوزونه آچارلار، نه اينکي اونلاري رئژيم يانليسي گؤسترمکله قيرتاقلاريني اوزمه يه چاليشارلار. خاريجده کي آلتئرناتيولرين الينده نه وارکي سنه ده پاي وئرسينلر، داخيلده کي لرين آرخاسيندا مؤحکم دورولورسا، ميللي حرکته حاکيمييته باسقيلاريني آرتيرماقلا، هئچ بير قانادي مودافيعه خطاسينا دوشمه دن، گئچيجي اولاراق کيچيک قازانجلارين الده اولونماسي " دوه دن بير توک " ميثالي قنيمتدير.

بيز نه ائتمه ليگيک؟

بو سوالا جاواب وئرمه دن اؤنجه، بؤلگه ده کي چالخانتيلاردان " آزربایجان ميللي حرکاتي نين " آلاجاغي ايکي درسي وورقولامادان گئچمک دوغرو ساييلماز.

ـ حرکاتيميزدا سؤزو گئچن، ديرلي ميللي فعاللاريميز بو حاديثه لردن عيبرت درسي آلاراق باشا دوشمه ليديرلر کي، ايستر موباريزه سورجينده ايسترسه ده اسارت زنجيرلري قيريلديقدان سونرا، ديکتاتورلوغون، هئچ بير يئري و فايداسي اولموياجاقدير. بؤلگه ده کي حاديثه لر بونو ثوبوت ائده رک گؤستردي کي، ميلتيميزين خوشباختليغي، پارلاق گله جگي يولوندا دئموکراسي کؤرپوسوندن گئچمه سي قاچينيلمازدير. مودئرن دوشونجه ايله ايلريله مک مومکون اولدوغو حالدا، ديژيتال تئکنولوژي نين بؤيوک اينکيشاف ائتديگي بير زمانه ده، ميلتي، اؤزلليکله گنجليگي آلداداراق باسقي آلتينا سخالاماق مومکون دئييل.

ـ بوتون موباريزه سورجيميزيده و هر حالدا هانکي شراييط آلتيندا اولورسا اولسون، سانجيلانميش او اؤلکه ده باش وئره جک گؤزله نيلمز حاديثه وئ دئييشيم زامانينا، مووجود گوجوموزله حاضير اولماليييق. " اونوتماماليييق کي، بوگون فارس بؤلگه لرينده باش وئرن کيچيک چاپلي تظاهورات، بللي شرطلر آلتيندا، خالقي سيخان بو ايپين دوواناغي آزجاجيق بوشاليرسا، اؤزلليکله تهرانين شوماليندا بؤيوک بير ديره نيشه دؤنوشه بيلر. بونودا اونوتماماليييق کي، اؤلکه نين گله جگي داها زيياده تهرانين دوروموندان آسيليدير. اونا گؤره ده اوراداکي سويداشلاريميزا داها چوخ اؤنم و اؤزن گؤسترمه ليگيک. او شهرده، 2-3 ميليون اينسانين خيابانلارا تؤکولمه سي، حتّي رئژيم دئييشيکليگينه ده گتيريب چيخارا بيلر. بئيين ياريقلاريميزين بير بؤلومونده و فعالييتلريميزين بير بوجاغيندا او پلاني يئرلشديرمگيميز گرکمکده دير " .

نه ائتمه ليگيک سوروسونا توخونارکن، ميللي حرکاتيميزا گئنيش بير زاوييه دن باخيب، تکليفلر وئريلمه سي گرچگينه گؤز يومولماسي خطادير. قيسا اولاراق دئمک اولار کي، ميللي حرکاتيميزين ساغلام بير يولدا يئريگيب نتيجه يه چاتماسي اوچون اوچ يؤنلو پلان اؤن گؤرمک اولار.

آ- قيسا واده لي موباريزه تاکتيکلري !

- بيلينديگي و گؤروندويو کيمي کؤر طبيعتلي خالق حرکاتي دوشمن ويا پاي اومان قووه لر طرفيندن يؤنلنديريله بيلير. ميللي حرکتچيلريميز معلوماتلاريني گئنيشلنديرمه لي، چوخ شاخه لي آناليز گوجونه صاحيب اولمالي، بو بيلگيلري ميلتيميزين ايچينه داشيماليدير.

- اينديکي شراييطده، داخيلده کي دوستلاريميز اؤزلرينه زييان گتيرمييه جک شکيلده، الده اولان بوتون واسيطه لردن ايستيفاده ائده رک، يئري گلنده ميللي حرکتين شوارلاري ايله خالقين ايچينه گيرمه ليدير.

- ميللي سؤيلملريميزي اورتا مکتبلره داشيمالي، ميللي سياسي فيکيرلري داها گنج نسيللره اينتيقال ائتديرمه لي. - بوتون واسيطه لردن ايستيفاده ائديب، ميلتيميزين اويانماسينا زمين ياراديلمالي.

- تک تک هر فرد نه ائدبيله جگيني يئرينه يئتيرمکله بيرليکده، 3-5 نفرليک قروپلار حالينده بيانييه لر يازيب، ميللي، ايقتيصادي، مدني پروبلملريميزي خالقا ، اؤزلليکله بازار جاميه سينه چاتديرماليييق.

- حاکمیت قوووه لري نين ايچينده کي سويداشلاريميزدان، ميللي مسله ميزه موثبت باخانلارا داها چوخ ياناشمالي، ايستعدادي اولانلارين اويانماسينا يارديم ائديلمه لي.

- حرکاتيميزين داخيل و خاريج قولونو ايکي قاناد کيمي تعريف ائده رک، بير بيرلري ايله داها سيخ باغلانماسي تمين ائديلمه يه چاليشيلمالديدر.

- داخيلده بوگونکو شرطلر آلتيندا تشکيلاتلانمانين چتين اولدوغونو نظرده آلاراق خاريجده کي لر مومکون قدر لئگيتيم اولان، بئينالخالق حوقوقا اويگون تشکيلات ياراديب، داخيلده ده سيستئملشديرمه چاباسينا گيريلمه ليدير. بو مودئل تشکيلاتدا ان دوغرو سئچنک " ميللي موقددراتين " تعييني و آذربايجنين تاريخي توپراقلارينداکي اراضي بؤلگوسونه داياناراق هر بؤلگه ده آز ساييلي تشکيلات عوضولري نين ييغيلماسينا چابا گؤستريلمه ليدير. بونا اؤرنک " گونئي آزربایجان ميللي بيرليک شوراسي نين " مرام و نيظامنامه سيني گؤسترمک اولار.

- داخيلين سسيني بوتون گوجله بئينالخالق تشکيلاتلارا، دونيا افکاري عوموميسينه داها گئنيش چاتديرماغا چاليشيلماليدير.

ب- اورتا واده لي موباريزه يول خريته سي (وچونجو قووو) !

" آزربایجان ميللي حرکاتي " او اؤلکه ده " اوچونجو قوووه " کيمي تظاهور ائتمگي اؤزونون اورتا مودتلي يول خريته سي کيمي قبول ائتمه ليدير. بو سيايسي تئرمي نين تعريفيني، 1998- جي ايل يازديغيم " ايراندا دئموکراسي و گونئي 6 آزربایجان " آدي آلتينداکي سيلسيله مقاله لرده آچيقلاميشديم. او يازيلار، او زامان، باکيدا موساوات قازئتي و گونئيده کي چوخ تيراژلي قازئتلرده درج ائديلديگينه گؤره دوستلاريميزين بو فيکيرلرله تانيشليغي مووجوتدور. دئييشن دوروم، او گون ايصلاحاتچيلار آدلانديريلان رئژيم داخيلي قوووه، بوگون " يئشيل " آدي آلتيندا داها گئنيش بير دايره ني اؤز ايچينه آلميشدير. ماهييت اعتيباري ايله فرقلي دوشوجه لري چمبرينه آلان بو حرکت، اؤلکه ده فارسچيليق سيايستيني و فارس محورلي دؤولتچيليک سيستميني داها قاتي ايرقچي شوارلارلا سووونماغيدير، يني، حقيقي اوزونو گؤسترمه سيدير. اونون اوچوندور کي، بوگون " اوچونجو قوووه " آدي آلتيندا اورتايا چيخماغيميزدان مقصد " ايراندا فاشيست حاکيمييتله شؤوينسيت موخاليفت پارالئلليگيني، آزربایجان ميللي حرکاتيني گوجلنديرمکله، ائشيت بويوتلو اوچگنه دؤندرمکدن عيبارتدير " . باشقا سؤزله " آزربایجان ميللي حرکاتي " اؤز ايستيقلالييتيني تام معنادا قوروياراق، سياسي گليشمه لره دخالت ائديب، ميللي معنافئيميزي بوتون ساحه لرده تمثيل ائتمه ليدير. بونون معناسي، خيابانلاردا، ماسا باشيندا و بئينالخالق قوقروملاردا " گونئي آزربایجان " آدينا يوموروغوموزون داها مؤحکم دويونلنمه سيدير. بو اينکيشاف، سون زامانلار بعضي چوره و شخصلرين ديللنديرديکلري فارسچي آلتئرناتيولرله موزاکيره تبليقاتي ويا بؤيوک قودرتلرله ال سيخيشما طلبلري، فورصت طلب قوووه لر ويا غئيري ميللي دوشونجه لرين اليني باغلاييب، ميللي قوووه لري اؤنه چيخاراجاقدير.

ايستکلي سويداشلار!

سؤزو بوندان آرتيق اوزاتماماق اوچون گلن يازيمدا " اوچونجو قووه " اولماق يولوندا عملي تکليفلريمي تقديم ائتمک و " ج " بؤلومو اولان " اوزون واده لي استراتئژي " ايله باغلي نظري باخيشي آناليز ائتمک سؤزونو وئرمکله اينديليک، سيزلرله ساغ اوللاشيرام.

بؤيوک رسول اوغو