رئژیم میللی مسئلهلره قارشی قددارلاشیر- سیامک بابانژاد
ایران ایسلام رئژیمی یاشیل حرکت اؤنجهسی میللی مسئلهلره باشدا آذربایجان میللی مسئلهسی اولماق اوزره چوخ سرتجه داورانیردی. یاشیل حرکت اولایی اورتایا چیخدیقدان سونرا رئژیم دونیادا و اؤلکهده بؤیوک ایماژ ایتیریمینه اوغرامیشدیر. بو ایماژ ایتیریمینین بیلینجینده اولان رئژیم، اؤزللیکله اؤلکهده ان جدی سورون اولان میللی سورونلاری داها دا سرتجه باسدیرماغا چالیشماقدادیر. چونکو، اؤزللیکله ده آذربایجان میللی مسئلهسیندن چکینن رئژیم، آذربایجان تورکلرینین یاشیل حرکتدن اسینلنهرک آیاغا قالخماسیندان جدی بیچیمده اندیشه دویماقدادیر.
بو اندیشهسینی ده آذربایجان میللی مسئلهسینه چوخ دا عایید اولمایان ساده میللی اینسانلاری گؤز آلتینا آلماسی ایله گئدرمهیه چالیشماقدادیر. یعنی یاشیل حرکت سونراسی ایران گئنلینده آنا دیلینده تحصیل حاقیندان یانا اولاراق ایران آنایاساسینین 15 و 19-جو ماددهلرینین اویقولانیمیندان یانا اولان اینسانلار دا تعقیب آلتینا آلینماغا باشلامیشلار. اقتدارین اؤز ایچینده چلیشکیلر درینلشدیکجه، ایسلام رئژیمی قددارلیغینی آذربایجان میللی مسئلهسی اوزرینده دئنمهیه چالیشماقدادیر. آنلاشیلان بودور کی، ایران ایسلام رئژیمی یاشیل حرکتدن داها چوخ آذربایجان میللی مسئلهسیندن قورخماقدادیر.
خامنه اینین یاشیل حرکتین اؤندرلرینی سیستئمین اؤز ایچیندن چیخان اینسانلار اولاراق تانیملاماسی بیر شکیلده اونلارین تهدید اولمایاجاغینا ایشاره ایدی. آنجاق رئژیمین آشیری ایستیبدادینا قارشی یاشیل حرکت اونلارین خیال ائتدیکلری ایستیقامتدن چیخیب و دئموکراسی ایستکلیسی حرکته دؤنوشدوکجه، رئژیم قورخماغا باشلامیشدیر. چونکو یاشیل حرکتین بؤیومهسی اؤلکهده سیاسی موحیطی گئنیشلدجیی تقدیرده آذربایجان میللی مسئلهسینین آچیقجا، میدانلارا داشیب داشینماسینا اولاناق ساغلانا بیلر.
بو اندیشهلردن یولا چیخان ایسلام رئژیمی تهلوکنی اورتایا چیخمادان بوغماق ایستدیگیندن آذربایجان میللی مسئلهسینه عایید اولان ان ایبتیدای ایستکلری ده واهشی بیر بیچیمده بوغوب یوخ ائتمهیه چالیشیر. اؤلکهده تورکچه چیخان قزئت و درگیلره یاساق گتیریب اونلارین یاییمینی دوردورور، مدنی فالیتده بولونان سویداشلاریمیزی توتوقلاییب زیندانلارا آتیر.بئله لیکله اسلام رئژیمی بوتون گوجو ایله سون زامانلاردا آذربایجان میللی مسئلهسینه قارشی داها چوخ تعقیبات و تخریبات آپارماقدادیر.