علوم اجتماعی! بو نه دیر! گؤتورون ییغیشدیرین آتین او یانا، بئله شیئلر هامیسی کفرین گئتیردیکلری دیر. بیزیم مدرسه لریمیزده، اونیورسیته لریمیزده بئلیه شئیلره گرک یوخدور. بیزیم جوانلاریمیزی علوم اجتماعی آدی آلتیندا اؤیرتدیکلرینیز ایله اغفال ائله ییب، بیلمیرم حق دن، حقوق دان، اجتماعی حقوقدان فیلاندان دانیشماغا جایدیرمایین. هه! بوگون علوم اجتماعی ایله بیزیم جوانلاریمیزی دوغرو یولدان جایدیریرسیز، ساباح دا هله گلیب علوم جنسی دن دانیشاجاقسیز حتماً. مدرسه لریمیزده تربیت امور جنسی قویولمالی دیر. کافرلردن آنجاق بو قدر اؤیگرنه بیلرسیز. بیزیم توپلوموموزدا بئله شئیلره یئر یوخدور. بیزه نه علوم اجتماعی لازیم دیر، نه ده علوم جنسی. آتامین آناما نه ائله دیگینی بیلمه گیمه گرک یوخدور. آلله منی آنامین بطنیدنه یاراتدی. بیزیم جوانلاریمیزا بوندان آرتیغی گرک دگیل. علوم اجتماعی اوخویان بیر جوان ساباح دا قالخیب، منیم بیر نفر وطنداش اولاراق فیلان حقیم، بهمان حقیم وار دئیه جک! یوخ، بیلمیرم مملکتین بودجه مدیریتینه فیلانا قاریشماغا چالیشاجاق. "بو مملکتین ثروتی خسته خانالاردا میلتین اوشاغینین یاراسینی بخیه لمک اوچون صرف اولوناجاغی یئرده نئیه سوریه ده اوتا چکیلیر" دئیه جک.  بئله  سؤزلر بو قودوقلارین آغزیندان دا بؤیوکدور. بئله شیلری آنجاق بو مملکتین باشیندا اوتورانلار بیلر والسلام. مملکتین باشیندا اوتوران بیلر بودجه نه دیر، هاردا خرجلنمه لی دیر. آتا – آناسینین یوخسوللوغوندان بیر اوشاغین یاراسینا وورولان بخیه لر تازادان سؤکوب. نه اولاجاق. دونیا ییخیلمادی کی. قوی او اوشاقدا او یاشلاریندان آنلاسین، بیلسین کی بو مملکتده سؤزو کئچنلر وار. بو مملکتین پولو هر قورمامقودوغون بخیه سینی تیکمک اوچون دگیل، داها اؤنملی ایشلریمیز وار. دینیمیزی، مذهبیمیزی، شرفیمیزی قورومالییق. آهان گؤرمورسوز غرب بیزیم دین قارداشیمیز اولان اسدی حکومتدن سالماغا چالیشیر! بیز بوتون مالیمیز و جانیمیز ایله اسدین حکومتینی قورومالییق. بیر اوشاغین یاراسینی بخیه لمگه پول قویابیلمریک.

مدرسه لریمیزده، اونیورسیته لریمیزده علوم اجتماعی نی حذف ائتدیکدن سونرا دا حقوق بؤلومونو حذف ائتمه لییک. حقوق اونیورسیته ده اوخوناجاق بیر شئ دگیل. حقوقو مملکتین باشینداکیلار تعیین ائدر. میلت ده اونا اویمالی دیر. بیز شیعه یک. بیزیم اعتقادیمیزین اساسی تقلید دیر. مرجع شرع حکم وئرر، مقلد ده تقلید ائدر. حقوق نه یه لازیم دیر؟

اوندان سونرا دا اقتصاد بؤلومونو اونیورسته لریمیزدن حذف ائتملییک. اقتصاد بیلیمی دینین مذهبین دوشمنی دیر. ساباح هر قورماقودوغون چیخیب دا "من اونیورسیته ده اقتصاد اوخوموشام، بیلدیکلریمه گؤره بو مملکتین بودجه سی خسته خانالاردا صرف اولسا میللت اوچون داها یاخچی دیر" دئیه دانقازلیق ائتمه سینه یول وئرمه ملییک. مگر بو مملکت بی صاحب دیر، هر قورمماقودوق گلیب امور مملکته دخالت ائله سین؟

اونیورسته لریمزدن سیاسی بیلیملری ده حذف ائتمه لییک. سیاست بیر بیلیم دگیل. اونیورسته ده اوخونولماسی دینه، شریعته، مذهبه آیقری دیر. غرب ده کی دؤلتلره لازیم دیر بئله شیلر. اونلار کافر دیر. کافرلر اؤز مملکتلرینده، اونیورسیته لرینده نه پوخ یئییرلرسه یئسینلر. بیز بئیله شیلر ایله اغفال اولوناجاق بیر میلت دگیلیک. اوینورسیته ده سیاست اوخویان جوان صاباح دا چیخیب، یوخ بیلمیرم، "دولتی تشکیل وئرن اورگانلار میللت طرفیندن سئچیلمه لی دیر" فیلان کیمی سؤزلر دئیه جک. یوخ سئچیم، فیلان، سئچیملرده کاندیدلریمیزی بیز سئچمه لییک، کاندیدلر بیزیم دیلیمزده پلاکارت چیخارتمالی دیرلار، کاندیدلر بیزه میتینک قویارکن بیزیم دیلیمزده دانیشمالی دیرلار" کیمین سؤزلر. بونلار هر قورماقودوغون قاریشاجاغی ایشلر دگیل. بیز شهید پرور میلتیک. بیزیم سئچیملریمیزده، کاندیدلر مملکتین باشیندا اوتوران عالم لر طرفیندن سئچیلر. میلت ده اونلارا سس وئرمه لی دیر. آیری یولو یوخدور بو ایشین. میللتین عاغلی هاردادیر بیلسین اونو کیم نماینده لیک ائتمه لیدیر. بئله ایشلری بؤیوکلر بیلر. بئله شئلر هامیسی بو غربین گتیردیگی آخماقجا، دینه مذهبه آیقیری شئلردیر. اونا گؤره اونیورسیته لریمزدن سیاست بؤلوملرینی ده حذف ائتمه لییک.

اونیورسیته لردن بو بؤلوملری حذف ائتدیکدن سونرا یاواش یاواش آرتیق اونیوزسیته یه فیلانا دا احتیاجیمیز قالمایاجاق. اصولا اونیورسیته کیمی بیر شئی غربین محصولودور دینه مذهبه آیقیری دیر. اونیورسته لری بوتونلوگو ایله تعطیل ائدیب هر بیرینده بیر شریعت مدرسه سی آچمالییق.

بیزه تک لازیم اولان ایکی کلمه دیر. ایثار و شهادت. بیز شهید پرور میلتیک.