1) گئنه

گئنه دولاشاریق شهناز خیاوانیندا

یئتر کی ساچلارینین هامیسینی

گیزلتمه مغنه آلتیندا

قوی ایکی تئلی قالسین فقط

گیزلی دویغولاریمیزین ائشیگینده

قوی انسینلر آشاغی یا

اوزانسینلار چنه نین چوخورونا

دولاشسینلار گله جه ییمیزین قوللارینا

چکسینلر ایتگین دوشن اؤزگورلوکلریمیزی یوخاری یا

نه اولار آرخانا دؤن

سیخیشدیر گئنه آلت دوداغینین قورخوسونو

دیشلرینین جسارتی آراسیندا

قوی گویرتسین گله جه ییمیزین ایسلاغی

گئچمیشیلرین چاتلاق قیرمیزیسینی

گولومسه بیر داها

منیم پر- پر اولان اومیدلریمه

قوی جانلانسین گئنه

سولموش اوره گیمین چیرپینان قیزیل گوللری

2)سن اولماسان

سن اولماسان کیم قوخلار بو شهرین ساچلارینی؟

کیم سالار قوللاینی ارک'ین بوینونا

اؤپر تبریزین دوداقلارینی؟

سن اولماسان کیم

بو شهرین دینلر دلی هاواسینی؟

کیم دولایار قولونو

ائینالی'نین خومار باخیشلارینا

دانس ائدر بو شهره ین دار کوچه لریله؟

گل

گل ائی منیم شهریمین چیلقین تانگوسو

گل دوداقلاریمدان آل

سئودالاریمین قیرمیزی گولونو

محمد احمدی زاده