آذوح: با رای کمیته ناظر بر نشربات دانشگاه اورمیه، نشریه دنیز به مدت 6 ماه تعلیق شد. با این تصمیم کمیته، نشریه دنیز در نیمه دوم سال تحصیلی 94-95 از انتشار منع شد.

دنیز درگیسی‌نین يايیمی دۇردورولدو

دنیز درگیسی دۆنن اۇرمو بیلیم‌يوردونون «درگی‌لره باخان کوْمیته‌سی»نین اوْيو ایله 6 آي بوْيونجا يايیمدان دۇردورولدو. بۇ کوْمیته‌نین سسی ایله دنیز درگیسی‌نین 94-95 اؤيره‌دیم ایلینین ایکینجی ياریسیندا يايیملانماسی ياساقلاندی. اۇرمو بیلیم‌يوردونون «درگی‌لره باخان کوْمیته‌سی» هر آي ياخلاشیق اۆچ- دؤرد اوْتوروم کئچیریر. اۇرمو بیلیم‌يوردو درگی‌لری‌نین سوْروملو يؤنلتمن‌لری‌نین ایکی تمثیلچی‌سیندن بیری اوْلاراق بۇ اوْتوروم‌لارا قاتیلیردیم. بۇندان اؤنجه‌کی اوْتوروم‌لاردا باشقا بیر درگینی اینجله‌يرکن اوْرداکی يئتکیلی‌لردن ایکیسی «دنیزی ده 6 آي يايیمدان دۇردوراق» سؤزونو اوْرتايا آتدیلار. بۇنلاری دۇيونجا؛ اؤنجه‌لیکله دنیز درگیسینی کیمسه بۇ کوْمیته‌يه شیکايت ائتمه‌میشدیر، اوْنسوزدا دنیز درگیسی بۇ کوْمیته‌ده اینجه‌لنمه‌دن، نه‌يین اۆزويله «دنیز درگیسینی 6 آي يايیمدان دۇردورماق» سؤزونو آچیرسینیز؟ دئيه تپکی گؤستردیم. بئله‌لیکله دنیز درگیسی‌نین اینجه‌لنمه‌سی سوْنراکی اوْتوروماجان ائرته‌لندی. سوْنراکی اوْتورومدا دیلچی دئيه بیرینی قوْناق چاغیریب اوْندان دنیز درگیسی‌نین سون ایکی سایی‌سینداکی(11- جی ایله 12-جی) تۆرکجه يازی‌لارین اینجه‌لنمه‌سی ایسته‌نیلدی. بۇنون يانی‌سیرا باشقا يازی‌لار، ائله‌جه درگی‌نین قاپاغینداکی «آتاتورک»ون رسمی ده دارتیشیلدی. کومیته`نین بۇ اوْتوروموندان سوْنرا آشاغیداکی سۇچلامالار دنیز درگیسینه گؤندریلمیشدیر.

«آذربایجان تاریخی‌نین تحریفی»، «ائتنیک و میللییت سؤزجوک‌لری‌نین آنلام‌لاری‌نین تحریفی»، «يابانچی‌لارین لاتین الیفباسی کیمی کۆلتور بلیرتیسینی قۇللانماق»، «يابانچی‌لارین منفعت و يارارلارینی قوْروماق»، «پیشه وری کیمی اؤزگه و باغیملی شخصیيت‌لری گئنیش و قاپساملی تبلیغ ائتمک»، «فردوسی کیمی ایران- ایسلام شخصیيت‌لرینه قارشی بیلیمسل اوْلمايان اتمسفر(جَو) ياراتماق»، «يازینسال و مدنی شخصیيت‌لردن يابانچی‌لارین ماراق‌لاری اۇغروندا يارارلانماق».

دنیز درگیسی‌نی قارشی سۇچلامالاردان ساوونماق اۆچون سوْنراکی(دۆننکی) اوْتوروما چاغیریلدیم. سۇچلامالار سێراسیندا آچیقجا يازیلماماسینا باخماياراق، ایکی قوْنو دؤنه‌لرجه وۇرغولانیردی؛ 1- جی‌سی «آتاتورک»ون رسمی‌نین قاپاقدا وۇرولماسی، 2- جی‌سی پیشه وریدن يازماق.

آيریجا بۇنو دا آرتیرمالیيام، دنیز درگیسی‌نین 11- جی سايی‌سی 1394 ایلی‌نین يازیندا يايیملانمیشدیر، دئمک بیر تئرم بۇندان قاباق! اوْگوندن بری «درگی‌لره باخان کوْمیته‌سی» دؤنه‌لرجه اوْتورومونو قۇروب، دنیزی ده اینجله‌میشدیر. بیزسه 11- جی سايیدان سوْنرا بیر اؤزل عاشورا سايیسی ایله 12- جی سايینی دا يايیملامیشدیق.

میللت وکیلی سئچکی‌لری‌نین ياخینلاشماسیندا دنیز درگیسینی يايیمدان دۇردورماق چوْخ دۆشوندوروجودور. اۇرمو بیلیم‌يوردونون اوْخويوجو باخیمیندان بیرینجی درگیسی اوْلان «دنیز» درگیسی 1389`دان بری تۆرکجه- فارسجا دیل‌لرینده توْپلوم، يازین، بیلیم، کۆلتور و ایدمان ایله ایلگیلی آلان‌لاردا 12 سايی يايیملامیشدیر. اۇرمو بیلیم‌يوردو اؤيرنچی‌لری‌نین چالیشماسی سوْنوجوندا، بۇنجا ایل ياسالی بیچیمده آذربایجان تۆرکلويو ایله ایلگیلی بیرچوْخ يازی يايیملایان دنیز درگی‌سی آذربایجان اؤيرنچی توْپلومونون تانینمیش درگی‌لریندن بیرینه چئوریلمه‌يی باشارمیشدیر. بو درگی‌نین سئچکی‌لر دؤنمی و دۆنيالیق «آنا دیلی گۆنو» کیمی اؤنملی گۆن‌لرین ياخینلاشماسیندا يايیمدان دۇردورولماسی، ان آزی اۇرمو بیلیم‌يوردوندا سئچکی‌لر دؤنمی بیزیم سسیمیزی بوْغماق ایسته‌يیرلر دئمکدیر.

آيریجا بۇ ترم اۇرمو بیلیم‌يوردوندا «آراز» آدلی باشقا بیر تۆرک دیللی درگی‌نین مجوزینی آلمايا چالیشان يوْلداش‌لار دا، سوْروملولاردان «يوْخ» جاوابینی آلمیشدیرلار. بۇنون يانی‌سێرا ياخلاشیق ایکی ایل اؤنجه‌دن دیلکچه‌سینی ایلیشکین سوْروملولارا سۇندوغوموز «آذربایجان تانیتیمی» آدلی اوْجاغین مجوزی هله ده وئریلمه‌میشدیر. اؤيرنچی‌لرین باش‌وورو و ایستک‌لرینه باخماياراق بۇ اوْجاغین مجوزی آسیلی ساخلانماقدادیر.

بۆتون بۇنلارا باخماياراق بیز آذربایجان تۆرک میللتی‌نین اؤيرنچی توْپلومونون کیچیک بیر پارچاسی اوْلاراق يوْلوموزون آردینی تۇتاجاغیق.

سوْنوندا دنیز درگیسی‌نین ایلک سايی‌سیندان بری اوْنون يايیملانماسیندا ياردیمچی اوْلان بۆتون يوْلداش‌لاریما اؤزللیکله ایندیکی و اؤنجه‌کی سوْروملولارینا امه‌یینیزه ساغلیق دئيیرم.

سايغی‌لاریملا

دنیز درگیسی‌نین سوْروملو يؤنلدیجیسی

یاسر رنجبری

https://www.facebook.com/deniz.dergisi/posts/581147972041145