حورمتلی اولکه داشلار

اوزون ایللردیر ایران دئییلن اولکه ده دوزولمز بیر آیری سئچگیلیک اویقولانماقدادیر ؛ ایران دا نئچه میللت یاشادیغی حالدا یالنیز بیر میللتین دیلی رسمی دیل اعلان اولوب و قالان میللت لر اوز آنا دیللرینده تحصیل آلماقدان محروم ائدیلیب لر.

عدالت ، دئموکراسی و بشر حاقلارینا آچیقجا حایقیری اولان بو اویقولامایا قارشی دونه لرله چئشیتلی میللت لر آیاغا قالخمیش ، آنجاق غئیر دئموکراتیکجه سینه باسدیریلمیشدیر. تاسسوف له بوتون بو باسدیرمالارا قارشی فارس دیللی لر تکجه توتولماقلا قالمامیش دیر، اوسته لیک یئری گلدیک ده حاکیمیت لری بو حاقدا آلقیشلامیشلار .

فارس دیللی لر ایرانین اراضی بوتوولویون مقدس سانیب بو اولکه ده یاشایان میللت لرین اوز دیلینده تحصیل آلماق ایسته مه سین بئله بو بوتولویو تهلوکه سانمیشلار. بونونلا یاناشی حاققی آیاقلانان همین میللت لردن ایرانین بوتوولویونو قوروماق اوچون همیشه قهرمانلیق دیله میش لر.بوچلیشگی طبیعی کی اوزون سوره بیلمه دی.

سون ایللرده ایسه بولگه میزده باش وئره ن ساواشلاری اورنک گوستررک هر هانسی میللی ایسته یین اورتایا گلمه سی داخیلی ساواشین باشلاماسی کیمی حساب ائتمیش لر اونلار بئله جه باریش اولسون دئیه میللتلری اوز حاق ایستک لرین دن چکیندیریبرلر.

عدالتسیز باریشی داها دوغروسو اعتیراض سیز ظولمو ده یر کیمی ایره لی سوره ن بو اینسانلار ، آنجاق اوز قارداشلیقلارینی ایثبات ائتمک اوچون بیر آددیم دا آتمامیشلار . بیر حالدا کی دونیادا داخیلی ساواش ایسته مه ین باریش لا عدالتی بیرگه ایسته ین میللت لرین ده اورنه یی وار . آمریکا دا و گونئی آمریکا دا آغ دریلی لرین قارا دریلی لره قوشولوب اونلارین حاق ایستک لرینه دستک اولمالاری بو حاقدا ان گوزل اورنک دیر. طبیعی اولاراق قارا دریلی لرین آغ دریلی لره گوره اولان اون یارقی لاری بو فداکار اینسانلارین ائتدیکلری له ائتگی لنمیش و اونلارا اولان نیفرت سونوکموشدور . نه یازیق کی بئله ده یرلی ایشه ایراندا قوشولانلارین سایی چوخ آزدیر. البتته بو آزاراق تاپیلان ده یرلی اینسانلار، او جومله دن دکتر آرش نراقی و خانیم شادی صدر کیمی جسارتلی اینسانلارین آتدیغی آددیملاری ده یر لندیر مک گره کیر .

حورمتلی فارس دیللی اولکه داشلار :

اگر ایرانی بوتون گورمک ایستییر سینیز سه ، اگر بو اولکه ده فارس دیللی اولمایانلاری دا قارداش و اولکه داش گورورسونوز سه ، اگر اوزونوزو مدنی میلللت حساب ائدیرسینیزسه و اگر هر هانسی گله جک ساواشلاری اونله مک ایستییرسینیزسه بو آچیقجا ظولمون قاباغین آلماغا سیز ده چالیشمالیسیز.

بو گونلر 21 فئوریه آنا دیلی گونو موناسیبتیله غیر فارس لار او جومله دن آزربایجانلی لار چئشیتلی ائیله م لر یاپماق ایسته ییرلر . اونلارین بیر سیراسی حاکیمیت دن آنا دیلی گونون ده یر لندیرمک ایسته مه یه موجوویز آلماق ایسته دیی حالدا باشقالاریدا مدنی اعتیراضلارا دوشونورلر .آنجاق من سیزلریده بو حاق اعتیراضلارا آیریجا قوشولماغا دعوت ائدیرم .

سیزلرین فارس دیللی اولاراق آنا دیلی گونونه آیری جا بیر کامپانیا یاپماق و بو کامپانی یادا غیری فارسلارا اوز آنا دیللرینده تحصیل حاققی ایسته مه نیز ایران تاریخینده بویوک بیر آددیم اولار.

بو چوخ بویوک بیر ایستک دئییل .اومورام گئری قایتارمایاسیز.

دوکتور لطیف حسنی

فعال سیاسی آذربایجان و دبیر حزب نو بیداری ملی آذربایجان جنوبی

زندان رجایی شهر کرج