قونشو تورکييه ده هفته لردير گوندم آرد-آردا گلن قادين جينايتي خبرلرييله مشغولدور. آيشه پاشالي، سکينه آککوش، آرزو ييلديريم، صاليحه ائردم و آرزو اوداباشي، سون آيلاردا موخته ليف تاريخلرده ا...يستانبولون موخته ليف يئرلرينده، داها اول آيريلديقلاري و يا بوشانماق ايسته ديکلري يولداشلاري طرفيندن قتله يئتيريلديلر. سون قادين جينايتي خبري ايسه ايستانبولدا يوخ مئرسين شهريندن گلميشدير کي، 20 ياشلي خديجه نين اؤز قارداشي طرفيندن ائودن قاچماسي بهانه سييله وحشيجه قتله يئتيريلمه سينه دايردير. آمارلار گؤرسه دير کي، تورکييه ده هر گون 3 قادين، يولداشلاري، آتالاري، قارداشلاري، و يا ياخينلاري اولان ديگر شخصلر طرفيندن موخته ليف بهانه لرله قتل ائديليرلر. قادين حاقلاري فعاللاري، تورکييه نين قادين و عائله دن مسئول نازيرليغي نين و

"آ ک پ" حؤکومتي نين بو جينايتلر فونوسوندا لازيم اولان آدديملاري آتماديقلارينا اينانيرلار. اونلار اؤز اعتيراض سسلريني پروتئستولار و مطبوعات يولو ايله دويورماغا چاليشيرلار. (قايناق: http://bianet.org/kadin(

بيز گونئي آذربايجانلي تورک قادينلاري اوچون ايسه، هم تورکييه و يوردوموز آراسينداکي کولتورئل (مدني) ياخينليق هم ده قادين مسئله سي نين بين الخالق بير پروبلئم اولدوغو حقيقتي (گئرچگي) نظره آليناندا بو گون تورکييه لي قادينلارلا و قادين قوروملارييلا علاقه و همريليک ايچينده اولماق شرطدير. تورکجه ياييلان فئمينيست ژورناللاري، وئبسيته و ائمیل قروپلاريني تعقيب ائتمک هم اؤز دوروموموزلا، هم ده قونشو اؤلکه ده اولانلارلا باغلي داها گئنيش معلومات و فيکير وئرمه سي باخيميندان فايداليدير. منه ائله گلير کي بو گون تورکييه ده ياشانانلاردان آلا بيله جگيميز ان اساس درس، تکچه قانوني دييشيکليکلرله قادين حاقلاري مسئله سي نين حل اولماديغي، بونون سيستئمده درين شکيلده يئرلشميش کيشي-حاکيميتي (پاترييارکال سيستئم، آتائرکي) ايله بير باشا علاقه لي اولدوغو و بو سيستئم آرادان قالخماديقجا بو نوع حاق تاپدالانمالاري نين (تورکييه کيمي) قانونلاري دونيوي (سئکولار، لايئک) اولان بير اؤلکه ده بئله داوام ائده جگيدير. بو دورومو دييشمک اوچون قانوني ايصلاحاتلارين چاتماديغي بو نوقته ده، ديگر دئموکراتيک موباريزه لرله بيرگه يورودوله جک سيستئماتيک بير قادين قورتولوش موباريزه سي وئرمه نين اؤنمي (اهميتي) داها آچيق گؤرونور.

يئنه تورکييه يه دؤنوب باخديغيميزدا بورداکي قادين فعاللاري " قادين جينايتلري پوليتيکتير " شعاريندان ايستيفاده ائتديکلريني گؤروروک، بو شعار فئمينيست نظريييه ده (تئوريده) مؤوجود اولان " کيشيسئل (شخسي) اولان پوليتيکتير (سيياسيدير) " (اينگيليس ديلينده کي اصلي: The personal is political) سؤزوندن حرکتله ياراديليب. بو نظريييه يه (تئورييه) گؤره، قادينلارين شخصي حياتيندا عاييله لرينده کي ، مکتب و اونيوئرسيته لرينده کي و يا ايش يئرلرينده کي شخصلر طرفيندن معروض قالديقلاري هر نوع باسقي و زوراکيليق (خشونت)، بير شخصي مسله دئييل بلکه پاترييارکال (کيشي حاکيمييئتلي) سيستئمله و بو سيستئمين دؤولتده، مطبوعاتادا، تحصيل قوروملاريندا يعني حياتين هر ساحه سينده کي نتيجه لري ايلئ % 100 علاقئلي بير دورومدير. ياني بيزيم " شخصي بير مسله " اولاراق گؤردوغوموز هرشئي (مسلن حيات يولداشيميز طرفيندن زوراکيليقا معروض قالماميز ) عئيني زاماندا " سياسي بير مسله " دير، چونکو توپلومداکي (جمعيتده کي ) تحککوم علاقه لرييله بير باشا ايرتيباطي واردير و تحککوم (ايقتيدار) علاقه لري ده اؤزونده سياسي خوصوصيتده ديرلر.

دوغرودان دا هاميميز، گونده ليک حياتيميزا باخاندا قادين کيمليغيميز سببييله قارشيلاشديغيميز بير چوخ باسقي نين، پئسيخولوژيک، گيزلي يا دا آچيق فيزيکي زوراکيليغين تک، ايستيثنا، شخصلره مخصوص حاديثه لر يوخ، بلکه کيشي حاکيمييتلي (پاترييارکال) ايقتيدارا باغلي اولاراق قادينلاري تحککوم آلتينا آلماقلا باغلي اولدوقلاريني گؤره بيلريک و سؤز مؤوزوسو موباريزئنی بو شعور و بيلينجله گليشديره بيلريک.

ياخينلاشان 8 مارت دونيا قادينلار گونونون بو يولدا هاميميزا گوج قاتماسيني و آزاد بير ياشام اوغروندا وئرمه يه مجبور اولدوغوموز بو موباريزئده هدفه چاتماميزي آرزولاییرام.