AZOH: İstanbulda dünən keçirilən Liviya Koordinasiya Qrupunun toplantısı başa çatıb. Toplantıda çıxış edən Türkiyənin xarici işlər naziri Əhməd Davudoğlu Qəddafiyə təzyiqlərin artırılmasını istəyib.

Toplantının sonunda Liviya Koordinasiya Qrupu Milli Keçid Şurasını legitim hökumət kimi tanıyıb. "Qəddafi mütləq getməlidir" sözlərinə yer verilən açıqlamada NATO-nun əməliyyatlarının daha 90 gün uzadılması qərarı da dəstəklənib.

Türkiyənin təklif etdiyi yol xəritəsinə paralel olaraq formalaşan açıqlamada Liviyada atəşkəsin dərhal təmin olunmasının vacibliyi vurğulanıb.

Koordinasiya Qrupu BMT-nin Liviya üzrə xüsusi nümayəndəsi Əl Hatibə böhranın həlli ilə bağlı təşəbbüs göstərməsi üçün tam dəstək verib. Açıqlamada eyni zamanda dünya ölkələrinə Qəddafi iqtidarına təzyiqləri artırma və yaxınlaşan Ramazan ayı səbəbilə xalqa təcili maddi yardım etmə çağırışı edilib.

Liviya Koordinasiya Qrupunun növbəti toplantısı isə Nyu-Yorkda keçiriləcək.

TRT