آدیم، تبریز ین دَمیرآشیغینین پاسلی دوداغیندادیر

مصلّیدا یاندیریلان ساز چاناغیندا

ببك ده منم، بئیرك ده منم

قانلی بایراقلی بابك ده منم

دده م قورقودون قوپوزلو دیلی

آدیم تومروسون قانلی الیدیر

آت اوستو یاشایان آتیلایام

دؤیوشده قاراقاشقا، قیرآت، بوزآتیلایام

دونیانی ایكییه بؤلن بیر اوخام

یانی؛ اوختایام

دَلی كورم، قالابالیغام

آرازام

یانی؛ قارابالیغام

گؤیده سس گلسه موسلوم ماقومایئوین گوموشو سسی

یئرده اوزئییر كوراوغلوسونون اوتوز یئددیسی

شاه ایسماییلین ساز قیلینجییام

مؤذّن عمینین آذان شارقیسی

بورلا خاتینام،

چیچه یم،

یانی، گؤیچه یم

بولبولون نغمه سی یم

خانین سسی یم

تاریخ منده نفس آلیب وئریر

آزیغ ماغاراسیندا

توركون قیزیل كیتابییام

قاراباغ شیكسته سینده های- های آغلایان دیلسیز چنه یم

قوزو تك مله ین قاراباغام

قارا باختام

قورد تك اولایان چئچئنیستان

اورخون یازیلاری اللرینده گؤیه رن توركوستان

قار كیمی آیدینام

هاوا تك یایغین

تانرییام، یارادان منم، یارانیش منم، یارانمیش منم

گونش رسولویام، آی ایمامییام، آینایام، آیسودایام

معجزه م قارماندیر

و عشق ایلاهه سی شاماندیر

گوجوم دَده قورقوددور

بوز قورددور

چین دیوارلاری قورخوسوندان تیكیلن دؤیوشچو منم

قولدور آللاهلارین، قوتور شئیطانلارین، قودوق شاعیرلرین

یالانچی شاهنامه لرینده كی توركم

توی دویونلو تورانام

قارا دئو ده منم

قارا ائو ده منم

كوروش شاهین قاتیلییم، هله ده كی وار

اؤكوز روستمین ساققالیندان توخونموش

یاساق مفتیلی وار دوداغیمدا

دلی دومرولم ا ....ئی

اوغوزدور بابام

- سنی نئجه باشا سالیم

من افراسیابام

اَرگـَنه قوندان باشلانان یازام

و اشهدی قاراباغ شیكسته سینده

اوخونان نامازام

یانی؛ تبریز ده ناماز اوسته یاندیریلان سازام

قوبانین آغ آلماسییام

موغانین اوزوم شارابی

اورالام، آلتایام، گؤی گؤلم

یانی ائل گؤلویم

اورمو گؤلونده عوثمان یومروغویام

عوصیان یومروغو

و تورك دونیاسی كیمی بؤلؤك - بؤلوك بؤلونن

خزرم

تورك تاریخلی توپراغی آت اوستو گزه رم

دئدیم كی ستارخانام، همن عوصیانام

صفرخانام، خان كندینده خانام، آغری داغیندا پاشا

سانجی درهسینده پئسیان

ائلاوغلویام- عموغلویام- كوراوغلویام....

چالاندا اوركئسترا "وطن¬اوغلو چوبان قارا"، رشید بهبوداووام

و شاققیلدایاندا كلاشینكوفلا....... رشید دوستومام

حیدربابادا سؤنوك وولقانام

سهل¬سونباطین، یئپریم!مانین، كاریك ملیكیانین

جیلولارین، خوجالینین خییانت سندییم

ائرمنی دیغالارینین جینایت سندی

بابكین قوللاریندا گؤیه ریب، ستارخانین دیزلرینه سؤیكه نیب

پیشه ورینین قافاسیندا چیچكله نیرم

دورنا لـَلهیندن آی كورهسینه یوللانان ائپیك موغامام

امیرووون شورویام، عالیمین موغامی، بابكین اینامی

دلی دومرولون یاشامییلا یاشامیشام

قازانخانین قیلینجیلا قوشامیشام

كوراوغلونون دَلیلرینه هایدی دئمیشم

بوتون اینسانلارا بالام سؤیله ییب

قافقاز داغلاریندا آغلایان منم

كؤرپه بئشیكلرینی نازلایان منم.

...آمما سادهیم

كئچل حمزهیه ده آلدانان منم

واقفین قوشمالاریندا یاللی گئتمیشم

جاوادخانین قانلی كؤینه یینه «كلمه» دئمیشم

بوتون كائیناتا حیات وئرمیشم

بیرگون جان وئرمیشم، بیر گون یاشامیشام

دئمك سورگون یاشامیشام

رسولزاده نین غریب دوشونجه سییم

پیشه ورینین جسارتی

قاس پیرالینین بوتونلوگویم

- «بن مملكتیمی سئوییوروم»

دئین ناظیم حیكمتین صبیرداشییام

یانی؛ یاشام یولداشی

(من بیر جویز آغاجییام گولحانه پاركیندا

نه سن بونون فرقینده سن نه پولیس فرقینده)

منی آشیق خانلارین آشیق علسگرین

توی هاوالاریندا آختار

منی آشیق وئیسَلین گؤز یاشلاریندا

آراز ائل¬سسین یومروقلاریندا

ماراغادان وارنایا سپهلهنن قیزیل آلمالاردا

شرفخانادان توركمن لیمانینا

دوزلاقلاردا الی قابارلی ایشچیلرین دوز چؤرگییم

مئیدانلاردا سیتیلده ین ایشسیزلرین چؤرك نیسگیلی

یئتیم كؤرپه لرین یاشام گوناهی

آختار تاپارسان!

چنگیز آیتماتووون الویداع رومانیندا

یاشار كامالین اینجه مَمَّدینی

قوچاق نبینی

میرزه جلیلین كئفلی اسكندرینی

داناباش كندینی

آختار «یانارداغ، یانار» آختار

مضطرین مرثیه سینده، معجزین آجی سؤیوشو

صابیرین سئوگی قوشو

یانی؛ مختومقولو، فضولینین ائكیز قارداشی

دئمك: «دَلی كور»و بایراق كیمی قالدیرماق اولار

و صمد بهرنگه وطن بویدا مزار قازدیرماق اولار

آرازی دا بو آرالیقدان آزدیرماق اولار

آراز آراز، خان آراز

ممّد آراز، ائل¬سس آراز

..................................

بیر دردیمی قان آراز

آختار تاپارسان!

آخی من شهید حسینجاوانین

كؤرپه قیزینین دیدرگین¬لییییم

گؤزل سارایین گلینلییی

چالدیران دؤیوشونون قارداش اؤلومو

دموكرات فداییلرینین آیریلیق نیسگیلی

آیریلیق ماهنیسییام

آیریلیق كؤرپوسو

(من همن سیفالاسلام¬آم

عاشورا گونو داردان آسیلان ثقةالسلام

كربلا چؤلونده حسینین(ع) تورك دؤیوشچوسویم

آرژانتینده چه¬گووارا / توركوستاندا امیر¬تئیمور / ایستانبولدا فاتحم، انورپاشا / آنا دولودا آتاتورك / چئچئنده شامیل / هیندوستاندا گاندی/ ویتنامدا دؤیوشورم / كوبادا اؤلورم/ موغاندا نادیرشاهام / باكیدا ائلچیبَیم / اردبیلده شاه ایسماییل / تبریز ده ستارخانام، چؤهره¬قانلییام / عرب چؤللرینده مالك اشترم / مظلوم خیابانییم، آخوندزاده یم.)

زنجان پیچاغیندان ایتی گولگون

حیدربابانین شهریارییام،

تومروس آنانین بختیاری.

بیر یومروق كیمی سیخیلمیشام

و نیفرت یاغیر گؤزلریمدن

ایمپریالیزمه قارشی، شوونیزمه قارشی، كمونیزمه قارشی

مَشدی عیباد تاماشاسینداكی حاققام!!!

آجی روشوه لرله آلینا بیللم

وطن- وطن- وطن دئین اوغوللارین آناسییام

پیشه وری فداییلرینین قاچقین بالاسی

و سئودیییم قیزلارین آغ آت رؤیاسی...

گؤزلریمده خزر بویدا ائلچیبَیین مزاری وار

آلتای داغلاری بویدا جؤهر دودایئف یاراسی

سهند بویدا سهند آغریسی،

و ساوالان بویدا چؤهره، قانلیسی

بیرگون كؤپك لنینین استالین آدلی كوچویونه گولـله لنمیشم

بیر گون قاتیر داریوشون، قودوق قوامینا

فارسلارا، روسلارا، ائرمنی دیغالارینا

جسد تپه لری قورموش كورد سیمیتقو

20 یانوار یاراتمیش قوتور گورباچف

21 آذر بویدا خییانت سندییم

25 مین مزارین جینایت سندی

21 آذر بویدا اعتراض سسی

اؤزگورلوك هَوَسی

استقلال آرزیسی!..

دونیا بویدا وطنم

گئجه یاتماغا یئریم یوخدور

دئمك غریبسه ییرم اؤزوم- اؤزومده

آشیق قریبین غوربت ماهنیسییام

توفارقانلینین هیجران یاراسی

منه درد اولوب نادیرشاهین، نیظامیلرین، خاقانیلرین، اعتصامیلرین، لاپ بئله شهریارلارین اؤزگه هاواسی

یانیق كرمی هاواسیندا سویولان نسیمییم

شاققا- شاققا شاققالانان بابك

عرب حاكیملرینین قویون قوربانلیغییام

روس ایمپریاسینین قوزو خوره یی

فارس جمهوریتینین دَده دوستاغی

آوروپانین ساری تیكانی.

نانكور اوغوللاریم دا وار،

باغیراوف، كسروی، ذكا

و یوز بئله- بئله اؤز قاپی كؤپكلریمیز

ساتقین كوچوكلریمیز.

تورك تورپاغی بویدا كوره یم

یئر كوره سی بویدا تورك...

وطن بویدا مزارام

و قاراباغ

و قاراباغ

و قاراباغ، جسدیمدن قوپاریلمیش

بیر تیكه اتدیر

غئیرتدیر، جسارتدیر.

( ............ قاراباغ

قارا طالع قارا باخت

جنته دؤنسم یئنه

یاددان چیخماز قاراباغ)

...- اوجال ائی قاراباغ شیكسته سی اوجال

اوجال ائی موغام هارایی

اعتراض سسی

سنی ساتان اوغولجوقلار قارا باخت اولسون

- قویون رامیزین شعیرلرینده یاشاییم،

كسمنلینین آغیلاریندا

قویون ماناس حیماسه سینی تیكرار ائتسین

آتیلا اورخان، ساهیر- سحر

نئجه باغیرماسین باریش¬مانچو، آشیق سافایی

نئجه آغلاماسین جاواد خان هئیت

و نئجه پارتلاماسین اوریی تبریز لی¬علینین

و نئجه شامانیزمه قنیم اولماسین گؤی تانری

نئجه یاشاسین توركمن باشی...

بو گون چین دیوارلارینین دیبیندن اویانیرام

و قیلینجیم آغ دنیزه اوزانیر

اورخون داشلارینا، كركوكون نفتلی داغلارینا

تبریز ین ارك سارایینا، بَذ قالاسینا، قیزقالاسینا

بو منم كؤنول بویدا وطنم، من سنم، سن منم،

وطن آدلی تورك كوره سییم ...

دیلیم، قاراباغ آتلارینین كیشنرتیسی¬یله

قاراداغ قوردلارینین اولاما سسی

و خان شوشینسكینین قاراباغ شیكسته سینین،

اورتاق سسیدیر.

عرب چؤللرینده بئرنو تك آچیلان كركوكام

فارس بؤیرونه سانجیلان قاشقای

كورد آلنیندا چیبان سولدوز

یئر كوره سینده بیر اولدوز

روس گؤزونده تیر-كامانام

همی چئچنیستانام، همی داغیستانام

و دونقوز گؤزَتچیسی قابان كمونیستلره باش قوردام

بئش یوز میلیون دَلی توركه آنا یوردام

بیر میلیارد دار باخیشلی چینلیلره

فیشنگ بویدا سین کیانگام

و آوروپا اوریینده قاه- قاه گولن ایستانبول...

... هر یازیلی تاریخ¬لرین واراغیندا

گونش كیمی، هاوا كیمی، قورشون كیمی،

قوشون كیمی دول¬ها-دولام

سو تك بولام

اووف ..... آه .... ائی قارداش ......

سان وئردیییم اؤگئیلرین،

بوغازیندا قالان بال بلله سییم

«نه اودا بیلیرلر، نه آتا بیلیرلر»

من تانرینی كاشیلاریمدا گؤیرتمیش گؤی مچیدم

بیر كرپیج آرا مین دؤیوشچو اكمیش اركم

بوسبوتون تاریخم

بوسبوتون توركم...

تورك منم، توركمنم

اؤزبهیم، باش قوردام

قیرخ قیزام، آنا دولویام، بوز قوردام

یانوارین ایگیرمیسییم، آذرین ایگیرمی بیری

بهمنین ایگیرمی دوققوزو

یانی قریب بیر قوزو

آدیم آنا¬جاندیر

جان- جان دئینلره، جانیم جاندیر

آدیم هیجاندیر، آدیم آذربایجاندیر