بورا بیر شهر یوخ بلکه بیر سئوگیلر اوجاغی، بوردا سئوگی وطن سئوگیسی. لیلی توپراق، مجنون دا تبریزین او توپراقلی کوچه لرینده دولانیب اوز لیلی سین آختاریب و تاپان بیر اینسان، بیر دویوشجو، بلکه ده بیر تورک ایگید اولا بیلسه، داها نه دئمک اولار؟!

تبریزین هر بیر کوچه سی تبریز دیر و تبریز ده ائله هر بیر کوچه دیر. تبریز، بیر شهردیر، یوخسا بیر سئوگی، بیلمیرم نه دیر، آمما سئوگی اولسادا بیر گوزل نیسگیللی سئوگی دیر، و بیر شهر اولسادا بیر گوزل نیسگیللی شهر!!

شاعیرین دئدیگی بوردا بلکه ده داها گوزلدی:

گینه بو تبریز ده اوز اوزه گلدیک

نئینمک  آیری تبریزیمیز یوخ

بلکه خوشبخت اولا بیلدیک

بلکه ده خوشبخت ایک خبریمیز یوخ

بونلاری اوخویا اوخویا، تبریزین بازاریندان چیخیب او قدیم کوچه لرینده دولانیب بو اصیل تبریز ماهنی سی تبریزین کئچمیشین نه گوزل اونه گه تیریر:

تبریزین کوچه لرین دولان با دولان

اگر منی سئومه سن گئت آیری دولان

نه منه قیز قحط دیر نه سنه اوغلان

تبریزین مارالی، کونلوم یارالی

قدیم آدام لار دئییرلر، سون ایللرده تبریزین توپراقلی کوچه لرینده او سوواخ دووارلارین و او تخته قاپی لارین بیرلیغیندا، آخشاملار تبریز قادینلاری، هر گون بیرینین ائوینه ییغیشیب تبریز ائولرینین اورتاسیندا اولان بویوک گولون کناریندا دوزولن شمعدانی لار گول آچاندا قاوالی چالیب، تبریز کوچه لرین اوخویاردیلار. اونلارین دئدیگینه گوره، تبریز حیاطلاریندا و کوچه لریندن سو سپیلنن سونرا بیر توپراق قوخوسو و بیرده یاسمن گوللرینین گوزل ایی، قاوالین سسیله قاریشیب، تازا گلین اوردا اوتوروب اوز سئوگی سین گوزلردی:

کوچه لره سو سه پ میشم      یار گلنده توز اولماسین

ائله گلسین بئله گئت سین       آرامیزدا توز اولماسین

بئله بیر توپراقلی کوچه لرده، قاپیسی آچیق حیاط لاردا کی ساماوار قئینییب چای حاضیر اولوب، محله نین قیزلاری گولدن آلمالاری ییغماقدا او یازیق اوغلان نیه او کوچه یه گله بیلمیردی کی هم توز اولماسی هم ده سوز اولماسین؟!!

تبریزین او قدیم کوچه لری آدامین گویلونه دوشورقارداش. آمما نه ایسه، او کوچه لرده سئوگیسیز او ایگید اوغوللاری بیرده گورمک اولار؟

تبریزین قارا آغاج محله سینه گئدیب اوردا قاراآغاج لاری آختاریرام کی بیرده سویودون آلتاندا اوتوروب قوجالاردان کئچمیشلری دینله یم. غلامحسین ساعدی ائله بوردا دوغولوب او سویودلرین کولگه سی آلتیندا اوز تورکلوگون اینانمیشدی. ایندی او فرانسادا یاتیب. قاراآغاج دا پاریسا نه قدر یول؟!!

اوردان چیخیب گئری دوندوم، غلامحسین نین اوشاغلیق دوستو، باهار آغزی ورجی باشی بیر قوجا کیشی تبریزین قدیم لرینن دئییر دی. او دوقتور ریضا براهنی دن دانیشیردی. او دئییر براهنی کی ایندی (کل محافل روشنفکری دونیا) دونیانین ضیالی لار اوجاغلاری اونو تانییر. کوچه باغ محله سینده قد آتیب بوردا درس اوخویوب. آتاسی حسن آقا بوردا حامام چیدی و رضا دا بوردا درس اوخوردو. اوایندی تبریز بیلیم یوردوندا یوخ، ایئله تبریز کوچه لرینده ده یوخ بلکه کانادادا دیر. تبریز دن تورونتوا نه قدر یول؟!! اوردان قالخیب تبریزین ان قدیمی محله لریندن بیریسی حکم آوارا ( هامی کاوار و یا حکم آباد) گئدیرم. ائله او قدیم کوچه لری ایندی ده قالیر، کسروی، محمد پسندی، مناف ملکی، ماشالله و ... . بونلار هامی سی بو قدیم کوچه لرین اوشاقلاریدیلر.

اوردان قاییدیب چرندابا گئدیرم، بهروز دهقانی و هامیدان اوستون صمد گوزوموزون اونونده دایانیر. چرندابدا بیر بالاجا قهوه خانا وار، قدیم کیلر دئیرلر صمد دوستلارینان اورا گئدردی. ( صمد، علیرضا نابدل، بهروز دهقانی و ...) تبریزین هر بیر کوچه سی و هر بیر دوواری و هر بیر تاختا قاپیسی، اوزونه بیر تاریخ دیر، بیر تبریز دیر، بیر آذربایجاندیر.

تبریزین کوچه لریندن چیخیب و ائله تبریزه گیرماق ایستیرم. بو تاختا قاپی لاردان و سوواخ دووارلاردان و بو بویوک و گوزل ائولردن، اوزومدن چیخیب اوزومو تاپماق ایستیرم. بو بویوک حیاطلارین آغاجلاریندا یا کریم لرینین اوچماقی و او تب تمیز گوللرین سویوندا سولاشدی اویناماق!

تبریز دئییلر سوسوب، او اوجا سهندین اته گینده ائله یوخویا گئدیب کی ائله بیر اویانماق ایستمیر. بلکه ده بو یاخجیدی. من تبریزی اینانیرام. تبریزین یاتماقیدا ائله اویانماقدان باشدی. مشرطه دورونده تبریزین بیر نئچه محله سی، مشروطه چیلیغینان موخالیفیدی. ایندیسه باخیرام، بلکه ده اولار دوز دوشونوردی. او زامان ستارخان اگر راضیلاشیب ائله تبریزده قالسایدی بلکه ده تبریز بو گوندن یاخجیدی.

من تبریزی اینانیرام. تبریز داها سهو ائتمز او زامانلار کیمی، تبریز یاتمالیدیر کی یاتیب، بو یاتماقدا سوزلر وار. تبریزلی لرین بیر آتا بابا سوزو وار دئییر: یاتانی ایاتماق اولار، آمما اوزون یوخویا وورانی یوخ.

بلکه ده بو شهر اوزونو یوخویا وروب؟!!