آذوح: کئچن هفته سونو ساولان داغی یوروشو 200 یاخین میللی فعال و آذربایجان سئورین حضورو ایله قورولدو. بو برنامه ده آذربایجان میللی فعالی، عباس بی لیسانی نین دانیشیقلارینین بیر بؤلومو "میللی بیرلیک" قونوسوندا ایدی. قونویا گیریش اوچون عباس بی "ساوالاندان دومان اؤزباشینا کوچمه¬ییب؛ اونو کوچورتمک اوچون بیر گوج لازیم دیر" دئییب و میللی بیرلیک ایلینین شوعاری اولان، "گوج بیرلیکده دیر" پارچایازیسینا ایشاره ائدیب ساوالانین سهندسیز، اورمو گؤلوسوز گوجسوز اولدوغونو دئیه¬رک بوتون میللی حرکتین بیرلیکده حرکت ائتمه گرکلیلیگینی ایماء ائتدی.

عباس بی "تبریز، اورمو، زنجان، همدان، تهران، کرج، .... بیر یومروق اولمالی دیر" دئیه¬رک تمام شهرلرده چالیشان فعاللاری بیر یول و بیر هدف یعنی آذربایجان آزادلیغی اوغروندا چالیشماغی ایسته¬دی. بو یوروشون بیلدیریسینده هابئله ایختیلاف یارادان مسئله¬لردن اوزاق دورماق و بیرلیگین یارنماسینا ایشاره اولونوب دور.

ساوالان قورولتاییندا دانیشیلانلار و بیلدیریسنده یازیلانلار و اورادا سرگیله¬نن پارچایازیلارینا بئله یانسیان بیرلیگین یارانماسینا یؤنه¬لیک آددیملاما گره¬گی گئت-گئده آرتیق اؤزونو گؤسته¬ریر. بعضن بیرلیک مسئله سیندن سؤز گئدنده "میللی حرکت ایچینده آیریلیق یوخدور" سؤزو ایله بو مسئله¬نی اؤرت-باس ائدیب و یا "هامی بیر جوره اولانماز" دئمکله مسئله¬یه چوخ سطحی باخیلیر. آنجاق بو مسئله¬یه گرچکچی، منطیقی و درین باخماق لازیم دیر.

1390 ایلین "میللی بیرلیک ایلی" آدلانما اؤنریسی، آذربایجان اؤیرنجی فعاللاری طرفیندن اؤنریلمیش دیر. بو اؤنری 1390 ایلینین ایلک گون لرینده بیر چوخ میللی فعال طرفیندن مثبت قارشیلاندی. طبیعت گونونده اورمو گؤلوندن حیمایت آکسیالاریندا اولان هماهنگسیزلیک مسئله سی بئله میللی بیرلیک آدینا چؤزولدو. آنجاق بیرلیک مسئله¬سینین چئشیدلی و گئنیش بویوتلاری اولدوغو اوچون بو قونو محدود شکلینده آچیخلانیب اؤنه چیخمیش دیر و بو قونودا تارتیشیلمامیش بیر چوخ سؤز اوستو آچیلمامیش قالیب دیر. بوتون میللی فعاللار، میللی حرکت ایچینده اولان چئشیدلیلیک لرین دوغرو یؤنلندیریلمه¬مگی صورتینده بیر تهدید اولابیله¬جه¬گینی دوشونورلر؛ بو قونو سون ایللرده میللی حرکت ایچینده اصلی تارتیشما قونولاریندان بیرینه چئویریلیب دیر. بونلارا باخاراق عباس بی لیسانی نین ساوالان یوروشونده دانیشیدیقلارینین نه قدر اؤنملی اولدوغو داها آرتیق بللی اولور.

ایلقار گونئیلی

آذوح