استوکهولم شهرینده “آذربایجان-ائرمنیستان - تورکییه، باریشمامیش فرق‌لی‌لیک‌لر ” آدلی سئمیناری کئچیریلدی
آذوح: مارت آیی‌نین 11 ایسوئچین استوکهولم شهرینده آفی- آذربایجان فئدئراسیونو ایسوئچ و ایسوئچ‌دکی تورک فئدئراسیون‌لار بیرلیگی طرفین‌دن حاضرلانان “آذربایجان-ائرمنیستان- تورکییه ، باریشمامیش فرق‌لی‌لیک‌لر ” آدلی سئمینار کئچیریلدی.
سئمینارین قوناغی و باش چیخیشچی‌سی کانادا‌لی مشهور ژورنالیست جناب اسكات تایلور اولموش‌دور. اسكات تایلور ژورنالیست کیمی بیر چوخ ساواش‌لاردا ایشتیراک ائتمیش مشهور غرب‌لی شخصیت‌دیر.
سئمینارین باشلانغیجیندا ایلک اولا‌راق اسكات تایلورون عراق، افغانیستان ، یوگوسلاویا و آفریقا‌داکی چکدیگی بلگسل فیلم‌لردن 10 دقیقه اؤزت اولا‌راق گؤستریلدی.
فیلمین آردینجا “ آذربایجان – ائرمنیستان و تورکییه ، باریشمامیش فرق‌لی‌لیک‌لر “ آدلی کیتاب باره‌ده گئنیش بیلگی‌لر وئریلدی. جناب تایلور سؤزلری‌نین داوامیندا بو کیتابی یازدیغینا گؤره چئشیدلی چتین‌لیک‌لرله اوز اوزه گلدیگینی ده بیان ائتدی، او بیلدیردی کی کیتابدا سؤزده ائرمنی سویقیریمی سؤزونو ایشلتممه‌سی ائرمنی ایجما‌لارینی قزبلندیریب و اونون عونوانینا تهدید ائدیجی سؤزلری یازماغا وادار ائدیب‌دیر. حتی ایش او یئره چاتیب‌دیر کی اونون عائله‌سینی ده تهدید ائدیب‌لر اؤزونه گلنده ایسه ایلک ائتاپدا ایشدن چیخارت‌دیرماق ایله سونرا اخلاقی شانتاژلار ایله سوندا ایسه اؤلوم تهدیدی ایله حدلییبلرمیش.
اونون سؤزلرینه گؤره کانادا و ایسوئچ پارلامئنت‌لری‌نین قوندارما ائرمنی سویقیریمینی قبول ائتمه‌لری ساده‌جه ایچ پولیتیکا‌لار ایله ایضاح ائدیله بیلر و باشقا یورومو یوخ‌دور.
جناب تایلور علاوه ائتدی : بیر حال‌داکی کانادانین فرانسیز میللتی 1837.جی ایلده اینگیلیس‌لر طرفین‌دن سویقیریم ائدیلمیش‌دیر و مین‌لرله گوناه‌سیز اینسان قتله یئتیریلمیش‌دیر هله‌ده کانادادا اینگیلیس ادبیاتی و منبع‌لرینده بو سویقیریم سانسور(سئنزورا) ائدیلیر و اوندان سؤز آچماق قاداغان‌دیر ، کانادانین پارلامئنتی 95 ایل بون‌دان اؤنجه باش وئرمه‌سی هله‌ده تصدیق اولمایان و بیر چوخ عالیمین نظرینده شوبهه‌لی قالان قوندارما ائرمنی سویقیریمی مسئله‌سینی گوندمه گتیریر و تصدیق ائدیر. بو ایکی‌لی ایستاندارت‌دیر و قبول ائدیلمز.
اسكات تایلور همچینین دئدی : بیز قرب دونیاسیندا اسکی سووئت جومهوریت‌لرینی آراش‌دیرماق و اورا‌لاردا اولوب بیتنی بیلمک ایسته‌ینده موسکوانین آچدیغی پنجره‌دن مسئله‌لره باخیب تحلیل ائدردیک و بو بعضی مسئله‌لرین ائرمنی‌لر ایستدیگی کیمی گئتمه‌سینی گتیریب چیخاریردی، مسئلن من بوسنیادا ساواش موخبیری کیمی اولان زامان‌لار قاراباغدا گئدن ساواش‌دان هئچ خبریمده یوخ ایدی.
جناب تایلور دانیشیغی‌نین داوامیندا خاریجده یاشایان ائرمنی دیاسپوراسی‌نین حتی ائرمنیستاندا اولان ایجما‌لاردان داها دا چوخ فاناتیک میللیتچی اولدوغونو بیلدیردی.
همچینین اونون فیکرینجه ائرمنیستانین خاریج‌دکی دیاسپوراسی‌نین مادی یاردیم‌لاری باهاسینا‌دیر کی بو گون قاراباغ و اطراف رایون‌لاری هله‌ده ایشغال آلتیندا‌دیر و اگر بمت ائرمنیستانا خاریج‌دن مادی یاردیم‌لارا سانکسیا( تحریم ) قویسا بو ایشغال تئز زاماندا بیته بیلر.
سئمینارین سونوندا ایزلییجی‌لر طرفین‌دن بعضی سوال‌لار وئریلدی و جناب تایلور دا بو سورغولاری جاوابلاندیرماغا چالیشدی.
آفی-آذربایجان فئدئراسیونو ایسوئچ
مئدیا و علاقلندیرمه بوروسو
ایسوئچ-استوکهولم
