يئني گونئي آذربايجان ملّي اويانيش حركاتي (يئني گاموح) تشكيلاتي‌نين اورمو گؤلو ايله علاقه‌ده بيلديريشي
شرفلي و مبارز آذربايجان تورك ملّتي !
يوز ايله ياخين‌دير فارس شووونيزمي تام سيستئماتيك اولاراق گئنيش بير بيچيمده گونئي آذربايجان ملّتي‌نين بوتون سوسيال، كولتورَل و تاريخي دَيه‌رلريني محو ائتمه‌يه چاليشماقدادير. بير ياندان فرهنگي آسيميلاسيونو تحميل ائده‌رك باشقا ياندان دا طبيعي ثروت‌لريني تالان ائتمه‌يه ال آتميشدير. چاغداش دنيا دوزه‌نلرينده ان اؤنملي يئر آلميش " ساغلام ائكو سييستئم " هر بيرملّتين و هر بير اؤلكه‌نين سعادتلي گله‌جگي‌ني تأمين ائده‌ن تمل عنصر‌لردن ساييلير .
هر دوشونجه‌لي انسانا، اورمو گؤلونون آذربايجان و بؤلگه اوچون اهمّيتي ائكولوژيك، اقتصادي و اكينچيليك باخيميندان آيدين‌دير. سون ايللرده كوره‌سل اقليم دَييشيك‌ليكلري نظره آلاراق ايران اسلام حكومتي‌نين اهمال و بيلگي‌سيزليكلر اساسيندا اجرايا كئچيرديگي پروژه‌لر نتيجه‌سينده آذربايجانين ان اؤنملي طبيعي ثروتلريندن ساييلان بو گؤل، قوروماق حالينا گلميش و نتيجه‌ده بؤلگه‌‌سل ائكولوژيك بير فاجعه يارانماقدادير. بو فاجعه‌نين نتيجه‌لريندن اولان دوز سونامي‌سي توفانيندان ميليونلار آذربايجانلي انسان و سايرلري ائتگي‌لنه‌رك بير "ائكولوژيك جئنوسايد" - ا معروض قالماقدا‌دير. بو سورون صرف چئوره‌سل و اقتصادي – اجتماعي بير سورون اولسا دا "اورمو گؤلونو قوروما طرحي"نين ايران اسلام شورا مجلسي‌نين فارس شووونيزمينه باغلي اولان نوماينده‌لري طرفيندن، آماجلي اولاراق رد ائديلمه‌سي، بو سورونا آرتيق سياسي بير يؤن وئرميشدير.
بئله‌ليك‌له بيز يئني گاموح اولاراق بوسياسي و ضدّبشري تشبّثلري شدّت‌له محكوم ائديب و گونئي آذربايجان تورك ملّتينه مراجعت ائده‌رك بوتون آذربايجان ملّي فعّال‌لاريني، قوروم و تشكيلات‌لاريني بو تحميلي فاجعه‌نين قارشي‌سيني آلماق و اونو آذربايجان ملّتي خِيرينه يؤنلتمك اوچون ، ايش‌بيرليگينه چاغيريب و بو يولدا هر بير اولوملو تشبّثلري جدّي شكيلده دسته‌ك‌له‌ييب، او تشبّثلره قاتيلماغيميزي اعلان ائديريك!
ياشاسين اورمو گؤلو!
ياشاسين آذربايجان!
تبريز - يئني گونئي آذربايجان ملّي اويانيش حركاتي –
( يئني گاموح )- مركزي كوميته – 30/ 5 /1390
