عزيز ميلتيميز!

ايکي گون سونرا (پنشنبه 2011-08-25) آذربايجانين ايکي سئويملي فوتبول تاکيمي نين آراسيندا دربي اويون اولاجاقدير. هئچ شوبهه سيز کي، رئژيمين گؤزو بو دربي نين اؤزل دئتايللارينا ديکيله جک. رئژيمين ان بؤيوک ديلگيني ايکي تاکيم آدينا بؤلونمه لرده گؤرمک اولار. ايکي رقيب کيمي قارشيليقلي سلوقانلارين وئريلمه سي، تئهران دربيسينه بنزر قيميزي-گؤي فاناتليغي نين يارانماسي و بو کيمي بؤلونمه لرين گولن طرفي يالنيز فاشيست رئژيم اولاجاقدير. بيز، گنجلريميزين يوکسک وتن سئوگيسينه، اؤزگور ياشام ايراده سينه و فارس شووينيزمينه اولان درين نيفرتينه ايناناراق، تئهرانين بو پوسوسونون دا بوشا چيخماسينا امينيک.

فوتبول، بوتون ميللي-سياسي بويوتلارييلا ياناشي بير ده، هيجان قايناغيدير. هله ايران آدلانان دؤولتين سينير ايچينده ياشام آدييلا سوروکلنن گنجليگين اَيلنجه آلانلاري بوتونلوکله قاپالي اولونجا، فوتبولون اَيلنجه دن داها اؤتسي اولماسي دا قاچيريلمازدير.

تراکتور فوتبول تاکيمي هاقلي اولاراق ميلتيميزين چوخونلوغو طرفيندن بيه نيلير و سمپاتي قازانير. بونون باشليجا سببي ايسه، هئچ قوشقوسوز، ياساقلانميش ديليميزين تراکتور مئيدانلاريندا آچيلماسي و هارايا چئوريلمه سيدير. تورکلوگونو، آذربايجانيني سئون هر کس تراکتورونو دا سئوير، اونون يئنمه سيله قورورلانير، يئنيلمه سيله کدرله نير. تراکتور تاکيمي نين ميلتيميزين ايچينده اولان آنلاميني باجئلونانين کاتالان ميلتينه اولان آنلامينا بنزه ديرلر. بو چوخ دوغرو بنزتمه دير. لاکين، ايرانلا ايسپانييانين بير-بيرينه بنزه ين نيي واردير؟ حتّي کاتالانلا آذربايجان بئله!

بله دييه فوتبول تاکيمي دا، تراکتور کيمي آذربايجانين فوتبول سوپئر ليقاسينداکي تمثيلچيسيدير. بله دييه نين ده، يئنيب-يئنيلمه سي ميلتيميزين روحوندا چئشيدلي ائتگيلر بوراخير. بو ايکي تاکيمين بيرليکده آذربايجاني تمثيل ائتمه سي اونودولماماليدير.

آذربايجان، تئهرانا و باشقا فارسيستان شهرلرينه بنزه مز!  " آذربايجان تورک ميلتي "  آز قالا 100 ايلليک بير ايشغالين و ان آغير اولوسال ايشکنجه لرين سانجيسيني آتلاتماغا جان آتير. ميلتيميزين هر هانسي اولوسال ايره ليله مه سينه قارشين فارسچي رئژيمين قارشيليقلي آتاغينا تانيق اولماقداييق. رئژيم، بوتون گوجو ايله آذربايجانين وار-يوخونو تالاماقدادير. آذربايجانين يئرالتي و يئروستو خزينه سي چئشيدلي يوللارلا ياغمالانير. رئژيم، داشيديغيني داشييير، قوروتدوغونو قورودور، گنج بئيينلري ساتين آلماغا چاليشير، ايش آداملاري نين سرمايه سيني فارسيستانا کؤچوردور، کوتله ميزين اويدورولماسي اوچون اليندن گلن کؤتولوکلري ياپير. آذربايجانين ياشام آلانلارينا قارشي آجيماسيز هوجوما گيرير.

آذربايجانين اوزوک قاشي، طالعسيز گليني - اورمو گؤلو -  وحشي و آنتيبشري فارسچي رئژيمين نؤوبتي قوربانيدير. آنتيازربايجان رئژيمه گؤره،  " اورمو گؤلو " -نون اوزرينه سو يوللاري نين باغلانماسي  " تقديرئ ايلاهيدير! "  /تانري نين ايستگيدير!/ رئژيم، بو توتومويلا آذربايجانا قارشي آچيق ساواش ائلان ائدير.

بوگون، بوتون تراکتورچيلار، بله ديييه چيلر، ماشينچيلار، پولادچيلار، ايدمان کلوبلاري و فاناتلاري، اؤيرتمنلر، اؤيرنجيلر، کسبه لر، مأمورلار، ايشچيلر، امکليلر، ايشسيزلر، آذربايجان سيپاه پاسدارلاري، تورک سيلاهليلاريميز، سياسيلر، سياسي قوروملارين اورتاق دردي ياشامديرسا، فارسچي رئژيمين بو ياشاما ساواش آچماسي اورتادادير. فارس شووينيزمي، آراتتا، قوتتي، لوللوبي و ب. تورک اويقارليقلاري نين بئشيگيني قوروتماقلا بو اسکي و تاريخسل ميلتين اؤز ائوينده اؤلمه سينه قرارليدير.

عزيز ميلتيميز!

رئژيمين ايسلامي ماسکاسيني سالاراق، اصيل آنتيبشري قيليفيني دونيايا گؤسترمک اوچون 2-گون سونرا ان بؤيوک فورصتي ياخالاماغيميز گره کي ر. 100،000-لرجه آذربايجان تورکونون بير آرايا گلديگي آندا،

" اورمو گؤلو سوزوزدو،

فاشيست هله قودوزدو! "

ويا

" رئژيم قودسو آنير،

اورمو گؤلو يانير " !

کيمي سلوقونلارين بوتون فوتبول شوارلاري نين يئرينده اوتورماسي

رئژيمين اؤلومجول آنلار ياشاماسينا ندن اولاجاق.

بوگون، بوتون آذربايجانين سؤزونو  " اورمو گؤلو " نه چئويرمگيميز گره کي ر.

بوگون، تراکتور يوخ، بله دييه يوخ، يالنيز  " اورمو گؤلو "  وار !

بوگون، ياريشما دئييل، قارداشليق و دايانيشما گونودور.

بوگون، آذربايجانين ايکي تاکيمي نين دربيسي دئييل، ايکي تاکيمين بيرليکده تئهران فاشيزمينه قارشي نيفرت پوسگورمه گونودور.

بوگون، اورمونون کربلا احوالي نين آغريسيني سارماق گونودور!

بوگون آذربايجانين ايکي قارداش تاکيمي نين نه قدر توپو وارسا  " اورمو گؤلو " نون قاتيللرينه قارشي آتيلما گونودور.

بوگون اودوب-اودوزما گونو يوخ، آغيز-آغيزا  " اورمو گؤلو " اون بو باياتيسيني دونيايا دئمک گره کي ر:

گل ايناناق سئوگييه!

قارداشليغا، بيرلييه!

بيزدن يارديم ايسته يير،

آزئربايجان-اورمييه.

گونئي آذربايجان قورتولوش پارتيياسي-

يؤنتيم قورولو

2011-08-22