آذربایجان مدنیت اوجاغینین اورمو گؤلونون تهلوکهلی دورومو ایله باغلی بیانیهسی
آنا یوردوموز آذربایجانین بزهیی ،گؤز یاشی تک دورو سولو اورمو گؤلو، اؤلومآیاغیندادیر.بیر یاندان آذربایجانین غئیرتلی –ناموسلو بالالاری ، بوش الیله اونون نجاتی اوچون اؤزلرینی اودا – کؤزه وورورلار،باشقا طرفدن ایسه مسئول لار بوتون بودجه و ایمکان لاری ایله اونون ساغلاملیغی و قورونماسینا قئیدسیز قالیبلار.
ایرانین ان بؤیوک دریاچهسی- اورمو گؤلونون قوروماسی و اؤلمهسی ایله برابر،اؤلکهنین و دونیا طبیعتینین ان گؤزل اثرلرینین بیرینین آرادان گئتمهسی ،اوندا یئرلهشن ثروتلرین محو اولماسی ،میلیاردلار تون دوزلارینین گؤیه سوورولماسی ،نفس چکمهیین موشکول ونهایتده غیرمومکون اولماسی ،دوز یاغینتیلاری و اکین یئرلرینین اؤلومو کیمی عواقبی آذربایجان و منطقهیه گتیرهجکدیر.
طبیعت مینلر ایل ساخلاییب چاغیمیزا چاتدیریب امانت کیمی بیزلره تاپیشیردیغی بو بؤیوک نعمت ،دفعهلرله آغیر قوراقلیقلارین قارشیسیندا دایانیب اؤزونو،اؤز میلتی اوچون قوروموش ،ساخلامیش ،میلتینه یاشامیش و اونلاری یاشاتمیشدیر. ایندیایسه بو آرادان گئتمهیین دلیلی نه اولا بیلر؟ طبیعت و قوراقلیقدان اولموش اولسایدی ،نئچه مین ایلده دؤنه-دؤنه تکرار اولمالی ایدی.
شکسیز غلط سیاستلر،میلت نومایندهلرینین تعلل،ایجرا سیستملریندن سوستلوق و موشکولون حل اولماسی اوچون لازیم بودجهلرین اختصاص وئریلمهییب ، عملی آدیملارین گؤتورولمهمهسی ،بو فاجیعهنین عامیللری اولموشلار و سون گونلرده اسلامی شورا مجلیسی، اورمو گؤلونون نجات وئرمهسی اوچون ارائه اولان ایکی فوریتلی طرحه اؤز مخالیف رایینی وئرمکله ،اؤلکه تاریخینده ،آذربایجان تورپاغی - میلتینه قارشی نیسگیللی و اوتانمالی بیر سند ثبت ائتدی.
بئلهلیکله آذربایجانلی الیله قورولموش ،هابئله قانی ایله قورونموش پارلماندا ،آذربایجان میلّی ثروتی اولان ،اورمو گؤلونون یوخ اولماسینین قاباغینی آلماغا ال قالدیریلمادی . چوخ مارقلیدیر کی ،نومایندهلرین بعضیسیده توپوردوکلرین یالادیلار.
بیز اورمو گؤلونون نجاتی یولوندا مجلیس و دؤلتین وظیفهلرینی اونلارین یادینا سالیب ،ان آز مدتده اونا چاره قیلیب،لازیم بودجهلرین صرف ائتمکله ،اورمو گؤلونو قاباق کی دورومونا قایتاریلماسینی اونلاردان ایستهییریک.
بو ایش میلته قالارسا ،میلتین الی بوش اولدوغو اوچون ،تکجه یول آکسیالار کئچیرمک و هابئله اولوسلار آراسی تشکیلاتلارا باش وورماق اولاجاقدیر.
آذربایجان مدنیت اوجاغی