باهارا دوغرو... – سابينا گؤنيلي
اوغوزلارین باهار بایرامی قیشین بیتمه‌سی، یازین گلمه‌سی‌دیر. بو مراسیم اینسان‌لارا سئوینج گتیریر.چونکی قیش سویوق‌دور، جان‌سیزدیر، شاختا‌دیر. قیشدا حیات یوخ‌دور، ائله بیل بوتون جان‌لی عالم یوخودا‌دیر. یازین گلیشی ایسه بوتون جان‌لی عالمه خصوصی گؤزل‌لیک، خوشبخت‌لیک گتیریر.بوتون بو خصوصیت‌لر یاز بایرامینی شرطلن‌دیرن عامل‌لردیر. قئید ائتدیگیمیز اوغوز –تورک بایرامی‌نین تاریخی چوخ قدیم‌دیر. زامان-زامان بو بایرامی دینی بایرام کیمی، آتش‌پرست‌لردن قالما عنعنه کیمی قلمه وئریلسه‌ده بو اؤز تصدیقینی تاپمامیش‌دیر. حتی ن. گنجوی “ایسگندرنامه” اثرینده نوشابه ایله ایسگندری بایرام گونو گؤروشدورور. ایسگندر سوفره‌یه دوزولموش قوغال، قاتلاما، فسه‌لی و. س شیرنیات‌لار و مئیوه خوروش‌لارینی چوخ بینیر. کوچه‌لرده یان‌دیریلان تونقال‌لار ایسگندری حیرته گتیریر. عادتیمیزه گؤره یانان اودون اوزرین‌دن هر کس آتیلا‌راق آشاغی‌داکی ایفاده‌لر دئییلیر. آتش‌پرست‌لر ایسه اودا سیتاییش ائتدیگین‌دن، اودا ، اوجاغا قارشی بئله کوفر ائتمزلر. بو دا نووروزو-یئنی ایل بایرامینی آتش‌پرست‌لردن قالدیغینی تکزیب ائدن دلیل‌لردن‌دیر.
آغیرلیغیم، اوغورلوغوم اودلارا
یازدا بیزدن توللانمایان یادلارا
بایراما حاضرلیق بیر آی اول‌دن باشلانار. بئله کی، هله فئورال آیی‌نین سونونجو هفته‌سین‌دن چرشنبه‌لر قئید اولونماغا باش‌لانیر. بون‌لاردا ایلاخیر چرشنبه‌لر آدلانیر. ایلاخیر چرشنبه‌لریمیز بون‌لاردیر سو، اود، یئل، و تورپاق. بون‌لار یادداشدا اینسانا اوغور و خوشبخت‌لیک گتیرن رمزلر کیمی گئنیش معنا داشیییر.
مراسیم فولکلوروندا چرشنبه‌لرین سایی 5-7-12 آراسیندا گؤستریلیر. بو ایسه نووروز مراسیمی، اونون کئچیریلمه‌سی واخت و اؤلچولرینه اویغون گلمیر.
بوز آیین دؤرد مقدس چرشنبه‌سین‌دن بیرینجی‌سی ازل چرشنبه‌دیر. خالق آراسیندا بونا “اول چرشنبه”، “گؤزل چرشنبه”، “سو چرشنبه‌سی”، “سولار نووروزو” و.س کیمی تانینیر. اسکی اینانج‌لارا گؤره ازل چرشنبه‌ده تزه ایلین گلمه‌سی ایله ان اول سو تزه‌لنیر.
ازه‌لی اینام‌لاردا سو ساغلاملیغین رهنی‌دیر. سو چرشنبه‌سی گونو سودان کئچن‌لر آزارینی-بئزارینی اورادا قویوب گئدیرلر. بو چرشنبه ایله باغلی خالق آراسیندا موختلیف آیین‌لر، عئتیقادلار کئچیریلیر.
ایکینجی چرشنبه “اود چرشنبه‌سی”دیر. بونا خالق آراسیندا “اوسکو”، ”اولکو”، “ایکینجی چرشنبه” دئییرلر.
اود چرشنبه‌سی گونشه، اودا اودو قورویوب ساخلاما اینامی ایله یارانمیش‌دیر. عئتیقادلارا گؤره بو چرشنبه گونو هر تتفده تونقال‌لار قالانار. بو چرشنبه ایله باغلی قودو (هودو) نغمه‌لری خالق آراسیندا مشهوردور.
اوچونجو چرشنبه یئل چرشنبه‌سی‌دیر کی، خالق آرایندا “کولک اویا‌دان چرشنبه”، “یئل‌لی چرشنبه”، “کولک‌لی چرشنبه” آدلانیر. اسکی عئتیقادلارا گؤره بو یئل گزه‌رک اودو، سویو حرکته گتیریر. اسن ایستی و سویوق کولک‌لر یازین گلیشین‌دن خبر وئریر. گون عرضینده کولک بیر نئچه دفعه ایستیقامتینی دییشیر و بو دا یئلین اؤزونو تزه‌لنمه‌سی کیمی قبول اولونور.
چرشنبه‌لردن سونونجوسو-آخیر چرشنبه‌دیر. خالق آرسیندا تورپاق، یئر، چرشنبسوری آدلاری ایله تانینیر. بو چرشنبه‌ده تورپاق اویانیر و شوخ، شن مراسیم‌لر باش‌لانا‌راق بوتون ائولرده بؤیوک بایرام کیمی قئید اولونور. اینسان‌لار سوسیال وضعیتین‌دن آسلی اولمایا‌راق بایرامی یاخشی کئچیرمه‌یه چالیشیر. هر کس یئنی لیباس‌لار گئیینیر، کیچیک‌لر بؤیوک‌لری زیارته گئدیر، ائولرده بیر-بیرین‌دن دادلی تام‌لار حاضيرلانیر. حاضیرانمیش یئمک‌لردن، شیرنی و مئیوه‌لردن قونوم-قونشویا بایرام پایی وئری‌لر.
