۲۰ ژانویه ایلدغنومو موناسیبتیله گونئی آذربایجان قورتولوش پارتیسی‌نین بیلدیریشی
روس اوردوسونون آذربایجانا قارشی ساواش یوروشونون ۲۲-جی ایلدؤنوموندییک!
گونئی آذربایجان قورتولوش پارتیسی‌نین بیلدیریشی
عزیز میللتیمیز!
روس اوردوسونون و دؤولتی‌نین آذربایجان تورک میللتینه قارشی تؤرتدیگی “قارا ژانویه”-دان ۲۲ ایل اؤتمکده‌دیر.
۱۹۹۰-جی ایلین ژانویه آیی‌نین ۱۹-دان ۲۰-ا گئچن گئجه، بیر باشا سئوئت کوممونیست رئژیمی‌نین و شخصاً قارباچووون امریله باکی ایشغال ائدیلدی. ۳۰،۰۰۰-دن آرتیق سئوئت اوردوسو ت-۷۲، ت-۸۰، بمپ-۳ تانق‌لاری و سای‌سیز زئرئه‌لی حربی ماشینلارییلا “قاراباغین و میللی تالئیین” هاواسییلا جسارتلنمیش کؤتله نی نیفرت آتشینه توتا‌راق قارشیسیندا اولان ۷-دن ۷۰-ی خزان یارپاغی کیمی یئره سردی. روس ایمپئراتورلوغونون دوشوندوگونه گؤره، ۱۸۱۳، ۱۸۲۸، ۱۹۳۷ و… کیمی جللادلیق‌لارلا بو میللتی بیر داها روح‌دان سالماق گرکیر! آنجاق، مسکو یانیلمیش‌دیر. چونکی، ۱۹۸۹-جو ایلین همین ژانویه سینده ایمپئراتورلوق مفتیل‌لرینی اودا چکن بو میللت، “یا آزادلیق-یا اؤلوم!” آندی ایله آیاغا قالخمیش‌دیر. ۲۰-ژانویه بو آندین قانیتلاما گونو ایدی. ۲۰ ژانویه نین صاباحی‌سی گونو باکیدا بیر میلیون‌دان آرتیق میتینقین باش توتماسی ساده‌جه بیر باشلانغیج اولدو. چوخ گئچمه‌دن قوندارما “لئنین” میدانی دوغما “آزادلیق” مئیدانینا چئوریلدی. آزادلیق میدانی، میلیون‌لار آزادلیق یانغی‌سی‌نین اؤزگورلوک ساواش مکانی اولدو. ۱۰۰-ایللرجه وهشت چنبرینده بوغولان باکی، دونیا گوندمینه گلدی. ۲۰ ژانویه سئوئتیزمین قبیر داش‌لاری‌نین بیری اولدو. شهیدلر خیاوانی روس سئوئت راسیست کوممونیزمی‌نین چؤکوشونون سون‌سوز موزئیینه چئوریلدی! باکی رسمی‌لرینه گؤره، روس اوردوسونون آذربایجانا قارشی اعلان اولونمامیش نؤوبتی ساواشی‌نین ایتگی‌سی ۱۳۱-نفر اولدو. جان‌لی شاهیدلرین گؤردوک‌لرینه دایانا‌راق ایسه، ۱۰۰۰-دن آرتیق روس تانق‌لارینا، آچیلان قورشون‌لارا توش گلن سویداشیمیز شهید اولدولار. بون‌لارین بیر چوخو گئجه بویونجا دنیزین درین‌لیگینه جومدورولدو. ۱۰۰۰-لرجه آغیر یارالاندی. ۱۰۰۰-لرجه ایسه، ایختیشاشچی کیمی ایشغالچی روس کقب-سینه اسیر دوشدو. ۲۰-ژانویه، تاریخده دفعه‌لرجه اوز وئرمیش “روس-تورک” و اؤزل اولا‌راق “روس-آذربایجان” ساواش‌لاری‌نین بیتمز سورجی‌دیر. ۲۰ ژانویه ساواشی‌نین کسین قالیبی بو دفعه آذربایجان اولدو! چونکی، بو ساواشین باش وئریب-بیتمه‌سی‌نین رسمی سورجی بیر نئچه ساعت‌دان اوزون سورمه‌سه ده، اونونلا بیرلیکده بؤلگه‌ده اوز وئرن آنتی سئوئت حرکاتی‌نین سونوجوندا ۱۴ یئنی باغیم‌سیز دؤولتین دوغوشو و بؤیوک بیر سومورگچی ایمپئراتورلوغون چؤکوشو گرچکلندی.
۲۰-ژانویه آیاقلانماسی‌نین مزلوم، الیالین، بیچاره آدلاندیریلماسی اولو میللتیمیزه قارشی بؤیوک بیر سایغی‌سیزلیق‌دیر. آذربایجان میللی آزادلیق حرکاتی‌نین یولبایی و چاغداش باغیم‌سیز دؤولتیمیزین سئچیلمیش ایلک جمهورباشخانی اؤلمز “ا.ائلچیبی”این دئدیگینه گؤره، “کؤله‌لیک دوشونجه‌سینی بئیی‌نین‌دن سیلمک اوغروندا دونیانین ان نهنگ دوشمنینی هئچه سایان بیر توپلوما کؤله دئمک اولماز آرتیق!”
۲۰-ژانویه، آذربایجان تورک میللتی‌نین، روس راسیزمینی هئچه سایان گونودور. تورک اولوسوموز وارکن ۲۰ ژانویه قلبه‌میز ده یاشایا‌جاق! اونودولماز اولسون قهرمان ۲۰ ژانویه گونو و اونون شهیدلری!
گونئی آذربایجان قورتولوش پارتیسی-یؤنتیم قورولو.
