ایسوچده کئچیریلن گونئی آذربایجان اجتماعی- اقتصادی دورومو سئمینارین‌دان راپور+ تصاویر+ ویدیو
آذوح: دونیا ایشچی گونو موناسیبتینه، ایسوئچین گوتنبورگ شهرینده سئمینار کئچیریلدی. جوما رتئسی/شنبه آپریل آیی‌نین 28-ده کئچیریلن سئمینارین مؤوضوسو گونئی آذربایجاندا اجتماعی- ایقتیصادی دوروم ایدی.
سئمینار گونئی آذربایجان میللی تشکیلات‌لاری او جمله‌دن آزوح، گادپ، اوغوزلار قروپو و یئنی گاموح ایشبیرلیگی ایله حایاتا کئچیریلیر و اونا گؤره ایجرایی کومیته یارانمیشدی.
سئمیناردا ایسوئچده یاشایان آذربایجان‌لی‌لار، الاهواز عرب فعال‌لاری و هابئله عیراق تورکمان جبهه‌سی طرفین‌دن ایشتیراک ائده‌رک، مؤوضو ایله باغلی اؤز فیکری‌لرینی پای‌لاشدی‌لار.
تدبیرین آپاریجی‌سی خانیم افسانه سولدوزلو ایدی و همین مسئله سئمینارین داها سانبال‌لی کئچیریلمه‌سینده یاردیمجی اولموشدو. سئمینار ساعت 19-دا گونئی آذربایجان مارشی ایله باشلایا‌راق، ساعت 22 –ده بیتمه‌سی گؤزلنیلیردی، آما موباحیثه‌لر اوزانینجا، بیر ساعت داها واقتا علاوه ائدیلدی. سئمینار ایکی بؤلوم‌دن اولوشوردو. ایلک بؤلومده اؤنجه‌دن حاضرلانان معروضه چی‌لر چیخیش ائتدی‌لر. استراحت آراسین‌دان سونرا، زالین دیگر بؤیوک اوتاغیندا سربست موباحیثه‌لره زامان آیریلدی.
ایلک یاری‌نین چیخیش‌لاریندا؛ بیرینجی گادپ سؤزچوسو محمود بیلگین، دؤولت طرفین‌دن آیریلان بودجه‌یه ایشاره ائده‌رک، گونئی آزربایجانین کئچمیش و ایندیکی دورومونو توتوش‌دوردو. گونئی آذربایجانین یئرآلتی قایناقلاریندان دانیشان محمود بیلگین، اورمو گؤلونون قورودولماسینا دا توخوندو.
آزوح نماینده‌سی، امیر مردانی ایکینجی چیخیشچی کیمی، ایرانین و هابئله گونئی آزربایجانین ایندیکی اقتصادی دورومونو آچیقلایا‌راق، گونئی آذربایجاندا اولان ایشسیزلیک و ایشچی حرکاتی حاقدا دانیشدی. او، ایسلاید واسطه‌سی ایله سوندوغو دیاقرام‌لارلا گ. آذربایجانا قارشی اقتصادی آیریسئچکی‌لیک‌دن سؤز ائده‌رک، ایشچی توتوق‌لانان‌لارین و اونلارین دورومو حاققیندا معلومات وئردی.
یئنی گاموح تمثیلچی‌سی، دومان ساوالان اوچونجو چیخیشچی ایدی. دومان ساوالان، سئمینارا گلن تپکی‌لره ایشاره ائده‌رک، میللی حرکاتدا سولچولارا قارشی آنتی‌پاتی‌نین تاریخی سبب‌لرینی آراشدیردی. دومان ساوالان اینسانین نئچه کیم‌لیک‌لی اولدوغو و اینتئرسئکشونالیسم نظریه‌سینی آچیقلایا‌راق، ایشچی حرکاتی‌نین میللیله شمه‌سی و میللی فعال‌لار طرفین‌دن منیمسنمه‌سی ضرورتینی وورغولادی.
ایلک یاری‌نین سون چیخیشچی‌سی، مئهدی هاشیمی الاهواز آکتیویستی ایدی. او، ایراندا عرب‌لرین دورومونو گئنیش آچیقلایا‌راق، سورییه شاعری‌نین تورک‌لره ایهانتینی قینادی. هاشیمی‌نین سؤزلرینه گؤره، عرب و تورک حرکاتی یالنیز اورتاق مسئله‌لرده یوخ، ساییر مسئله لر‌ده ده بیر بیری‌نین یانیندا اولمالی دیرلار.
ایکینجی یاری‌نین سربست چیخیش‌لاری، تانینیمیش یازار عآریف رحیم اوغلونون دانیشیغی ایله باشلادی. رحیم اوغلو موساواتچی‌لیق، خصوصیله محمد امین رسول‌زاده‌نین سوسیالیسم دیرلرینی منیمسدیگینه ایشاره ائده‌رک، هر تور ایفراطی سولچولوق و میللتچی‌لییه قارشی اولماغین ضرورتین‌دن سؤز آچدی.عآریف بیین دئدیگینه گؤره هر میللی دؤولت لابودن سوسیال دؤولت اولما‌لی‌دیر. او، عینی حالدا فیدرالچی‌لیغی، ایستئمارچیلیغین یئنی بیر اویونو کیمی قئید ائده‌رک، قوزئی آزربایجانین سوویئت‌لرده فیدرالیسم تجروبه‌سین‌دن سؤز آچدی.
سونراکی دانیشان قادین فعا‌لی خانیم آیدا بیلگین ایدی. قادین حاق‌لارینی مطرح ائتمکده هر فورصت‌دن ایستئفاده ائتمک لازیم‌دیر، دئین آیدا بیلگین سول دوشونجه‌سینده، قادین حاق‌لارینا اولان باخیش‌دان سؤز آچدی.
اوندان سونرا اوغوزلار قروپونون سؤزچوسو، جئیحون آوشارلی، گونئی حرکاتی‌نین قوزئیین تجروبه‌لرین‌دن ایستیفاده ائتمک اؤنمینی وورغولایا‌راق، هرکتچی‌لیکله سیاستچی‌لیک آراسیندا اولان فرقی آچیقلادی. آوشارلی‌نین نظرینه گؤره هرکاتچی‌لیق بیر سیرا ایده‌آل شعارلارا دایانا‌راق، مسئله‌لره رئال باخماق‌دان اوزاق اولور. بیر حالدا کی سیاستچی‌لر رئال شرط‌لره دایانا‌راق، آز هزینه‌لرله یوخاری قازانج‌لار الده ائتمک ایستییرلر.
آیدین تقی اوغلو، میللی حرکات آکتیویستی کیمی اؤز چیخیشیندا غربی آذربایجان بؤلگه‌سینده کورد سورونونا توخونا‌راق، قاچاق مسئله‌سی‌نین بو حاقدا رولونا آچیقلاما گتیردی. او اورمو شهریندن اولدوغوندان بو حاقدا گرچک اورنک لر گتیردی.
سونوندا دومان ساوالان ایشتیراکچی‌لاردان تشککور ائتدی و محمود بیلگین 22 مای میللی قیاملارین ایل دونومو ایله باغلی ایشتیراکچی‌لاری ایشبیرلییه چاغیردی. سئمینار ساعت 23-ده سونا چاتدی.
محمود بیلگین
امیر مردانی
دومان ساوالان
مهدی هاشمی
عاریف رحیم اوغلو
آیدا بیلگین
جئیهون آوشار
ائلدار قاراداغلی
آیدین تقی اوغلو
دومان ساوالان
محمود بیلگین
افسانه خانیم سولدوزلو
دیگر شکیللر:
