باهارین سسی: سایین قالالی موسیقیچی دن یاز تؤحفه سی
ان قدیم دؤورلردن بَری اینسانلار آراسیندا یاز مؤوصومو، قیشین چیله سینه سون قویدوغو اوچون دیگر مؤوصوملردن داها فرقلی و داها سئویملی اولوب . دوغادا بولونان بوتون وارلیق لار، یازین گلیشیندن دویدوغو سئوینجی دئییشیک یوللارلا بَللندیریب، بو سئوینجی یارادیجییا شوکران اولاراق گؤسترمه یه چالیشیرلار. اؤرنه یین: آغاجلار آل ـ الوان چیچک لرله سوسلَه نیر، بولبول لر یئنی یئنی نغمه لرله اؤتوشور.اینسانلار آراسیندا، سئوینج گؤستریلری بیرچوخ حاللاردا فرقینه وارمادیغیمیز و بیلینجینده اولمادیغیمز دوروملاردا آیاق توتور.هرکس باشقا اولماغا، بوی گؤسترمه یه قالخیشیر. بیر سؤزله هرکس اؤز گؤستریسینین فرقلی اولماسی پئشینده دیر.
* * *
اصلن سایین قالا(شاهین دژ) شهریندن اولان، روح و گؤنول گؤزه للیکدن هئچ اَکسیگی اولمایان، موسیقیچی و بسته کار "خسرو محمدزاده" جنابلاری سَسلندیردیگی سؤزسوز موسیقیلرله یازین گلیشینه و آنایوردو "سایین قالا "یا اولان سئوگیسینی، گؤزه ل بیر شکیلده هرکسه بَللندیریبدیر. دَیرلی صنعتچی " خسرو محمدزاده" یارادیب یایینلادیغی "باهارین سَسی" آدلی 8 سکگیز بؤلوکلو (تراک لی ) سی دیسینده همیده: ویولون،گیتار، باغلاما، فلوت، کلاریینت و کیبورد آلتلرینی تک باشینا و اؤزونه مخصوص مهارت له ایفاء ائدیب دیر.
منده بو گؤزل روحلو موسیقیچی یه توتدوغو یولدا اوغورلار و داهادا آرتیق باشاریلار دیله ییب، سی ـ دی ده کی موسیقی پارچالارینی سیرا ایله و سی ـ دی نین قابیغیندا یازیلدیغی کیمی آدلارینی سیزه تقدیم ائدیریم:
1. باهارین سَسی
2. آنا
3. تومورجوق
4. بیر یاغمورلی پنجره نین آرخاسیندان
5. اوچان قوشلار
6. قار یاغاندا
7. سایین قالا
8. یالان دونیا
اویرنجی