سوئد-ده آذربایجان قادین کونفرانسی کئچیریله‌جک
آذوح: دیرلی یوردداش‌لار ۲۰۱۱-جی ایلین آپريل آیی‌نین ۳۰-او ایله مای آیی‌نین ۱-ده ایسوئچین (سوئد) باش شهری ایستوکهولمدا دونیانین هر یئرین‌دن قاتیلما‌لاری گؤزلنیلن بؤیوک قادین کونفرانسی کئچیریله‌جک‌دیر.
کونفرانسدا گئنل اولا‌راق آذربایجان قادین‌لاری‌نین سیاسال، توپلومسال، ائکونومیک سورون‌لاری، اؤزل اولا‌راق گونئی آذربایجان قادین‌لاری‌نین اولوسال ،ائله‌جه ده قادین حاق‌لارینی ائلده ائتمک یولوندا وئردیک‌لری موجادیله ائله آلینا‌جاق‌دیر.
کونفرانس بوتون دونیادا یاشایان آذربایجان‌لی‌لارا ائله‌جه ده بو حاقدا فیکیر،دوشونجه ییه‌لری اولان باشقا تورک دیل‌لی سویداش‌لاریمیزا آچیق‌دیر. کونفرانسا آوروپا‌دان قاتیلماق ایسته‌ین یوردداش‌لاریمیز ان گئج آپرئل آیی‌نین ۱۵-ی، ویزا گرکن اؤلکه‌لردن قاتیلماق ایسته‌ین‌لر ایسه ان گئج مارت آیی‌نین ۳۰-نا کیمی بیلدیرمئلئری خاهیش ائدیلیر.
یئر و باشقا آیرینتی‌لاری ایسه یاخیندا بیل‌دیریله‌جک‌دیر. کونفرانسا قاتیلماق ائله‌جه ده ایش بیرلیگی ایسته‌ین یوردداش‌لاریمیز بیزیمله آشاغی‌داکی آدرئسله باغلانتی قورا بیلرلر.
سایغی‌لاریمیزلا
گونئی آذربایجان قادین کونفرانسی کومیته‌سی
