گلدی گئنه مهر آیی

مئشه لره بیر آیی

مدرسه ده اؤزگه دیل

قورخوسو یوخدور تایی

"نان" اولدولار لاواشلار

یازیق بیزیم اوشاقلار

چورک یئین "نان" یئسه

البت یولدا یاواشلار

آتلی کیشی یاغیشدا

جیم جیلاغ اولدو گلدی

اؤیرنمه دیم "اسبی" من

آردیندان "باران" گلدی

آتام وئرن شیرین سو

"آب" دا اونون یوخ دادی

چورک ده کی دادلا دوز

"نان"دا وئریر پوخ دادی

بیلدیگیمیز آلمایا

سارا خانیم "سیب" دئییر

بوندان سونرا دارا دا

"انار" یئییر نار یئمیر

مدرسه ده آتام دان

ایز قالمادی آنام دان

نه دوز قالدی نه دوزدان

دوزسوز اولدو"نمکدان"