آتاميز بابك حاقيندا- معصومه قربانی

او زامان كى ايشغالچى قوهَ لَر دين و تانرى ائسلوگانلاردان اورتادوغو خالقارين اوز قامچى لارى آلتيندا كوله ليغه آلميشديلار و اوز ايستثمار و ايستيمار زنجيرلرينين  چئوره سينه جنت، معنويت و سونونجو موتلولوق دان بير چَكيجى هاله چَكميشلر. او زامان كى اينسانلار كوله اولدوخلاري ايچون ممنوندولار و ايشغال آلتيندا اولانلار ايشغالچى ارباب لارى آز قالا تانرى گيبى سئويرديلر! او زامانى دير كى آتاميز بابك باش قالديردير، ايشغالچى لار كوله ليغى ارزش و دئه ر بيلديغى زامان و اونو دين و مذهب گوجوله بير ايدولوژى حالينا گتيرديغى زامانلار "آتاميز بابك" اينسانليغى، آزادليغى و عدالتى بير ايدولوژى حالينه گتيريب و آمانسيز اولاراق يئرمى بئش ايل ايشغالچى قوه لرين قاباغيندا مقاومت ائليب. تاريخ صحيفه لرين ورق وروندا، چوخلو عصيان لاردان قارشى- قارشى يا اولوروخ، اما آتاميز بابكين عصيانى فرقلى بير عصيان دير، آتاميز بابك سركردگى ليغينين يورودوغو عصياندا، اينسانليغ روحو وار، عدالت روحو وار، برابرليخ روحو وار، تك بو عصيان دير كى بير ازيلَن ميلتين ميلت لشمه يه اولان اوجا سئوگيلى روح دان اوز به اوز اولوروخ.

" آتاميز بابك" بير يوخسول و هر بير تيكه چورَك ايچون  اؤلومَ نن أل به ياخا اولان و چورك موجاديله سى وئرن عائله ده دونيايا گوز آچدى، ميلتى كيمى اودا ايشغال آلتيندا ياشاماغ موجاديله سى وئريب و حيات دا قالماق ايچون چوخلو چابا گوستريب! ايستيثمار و اينكار و ايسيتعمارا معروض قالديغى ميلتى كيمى، ياشام موجاديله سيراسيندا كوچوم سه نيب، تحقير اولونوب و وار اولان اينسانليغى ألينده ن آلينيب! چوخ اينسان " آتاميز بابكى" بير سر كرده كيمى يالنيز نظرده آلير! البته كى " آتاميز بابكين" سَركرده اولدوغوندا بير شبهه يوخ، اما منيم ايلگيمى چَكن " آتاميزين" يوخسولوغو دور، آتاميزين عائله سنين باشين ساخلاماغى ايچون ناخيرچى ليغا باخماغيدير، اونون نجور كاروانلردا و دميرچى لر يانيندا حيات مجاديله سى ويرمه سى دير، آتاميزين عائله سئورليغى دير، آتاميز اوشاقليغيندا عائله سينين دردين چكيب و اونلارا آتاليخ ائله دير و بويدوغو زامان خالقينين دَردين چكيب و اونلارا آتاليخ ائله دير. اونون كوچوك و گنجيكن سورملولوغو و چكديغى آجى لاردى كى اونا روح و اينانج باغيشلادى، ايشغالچيلار طرفيندن چكديغى آجى لار و كوچمسه مَخ لر اونون إيراده سين پولاد كيمى ائله دير، نجور اولسا روايت لرده وار كى نئچه ايل اوشاق ياشلارين دا دمير چى ده چاليشدى و گوردو كى دميرى ايستى وئريب و چالاندان سونرا بركييب و دواملى اولار. اما آتاميز بابكين اوزليغى نه دير؟ اصلينده چوخ اينسان آتاميز بابك گيبى كوچومسه نيب، ايستيثمارا معروض قاليب و ترسينه ايشغالچى لارا قارشى هيچ بير ايش گورمويوب و اونان چوخ ايشغالچى و ايستيثمارچى قوه لرين چكيجى هاله لرينه مجذوب اولوب و بير تيكه چوره ك ايچون شرف و اينسانليغين ايشغالچى قوه لره ايتحاف ائليب. تاريخ بويو ميلت لرده و هابله بيزيم ميلت ده بويلنچى اينسانلار چوخ اولوب و اولماغا دا دوام وئريلر، اما آتاميز بابكين اوزه ليغى بودور كى چكديغى آجى و يوخسول لوخلارينان بير تيكه أكلمك ايچون ديلنچى ليخ ائله مدى و بو پروسه ده آنلادى كى اونون حاقى نه ايشغالچى و اينكارچى لارا اينانيب و ياغچى ليخ ائلمَك، كى اونان زياده اونلارين خير- خيرالاريندان اوز حاقين چيخاردمالي دير. نه موتلو اونلارا كى ايشغالچى، اينكارچى و ظالم قاباغيندا بير تيكه أكلمك ايچون باش لارين أييب و ياغچى ليخ ائله ميرلر! نه موتلو اونلارا كى ظالم لرين قارشسيندا هر زاما باش قالديريلار.

روايت لرده وار كى جاويدان بير قارلى و سويوخ قيشدا يولونون اوستونده، آتاميز بابك گيلده قالماق مجبورييتنده اولدو. عينى روايت ده وار كى جاويدان آتاميز بابك و آناسينان دانيشديغيندا آتاميزين فرقلى اولدوغون دوشونوب و اونو بذ ده ياشيب و اونا چاليشماغين ايسته يب و البته  بونو قبول ائله ديغى تقديرده آنا و عايله سينين ياشام احتياج لارين قارشيلاياجاق سوز وئردى. تاريخ ده اونلارين گئجه اوزونلوغوندا نه دانيشديغى باره ده او قدر فاكت يوخدور، اما آيدين دير كى بابك دن جاويدان فرقلى طبقه يه عايد اولسالاردا، جاويدان آتاميز بابكين دانيشيق و سوزلرينده اوز ايتيرديغى آرزولارين تاپير، بلكه آتاميزين گوزلريندن عصيان آتشين گورور، البته آتاميز بابكين ديللى توتولورموش دييه ده باشقا بير ايدعا دا وار. بو ايدعا چوخلو ايدعا گيبى بلكه اونو كوچومسه مه غه چيخاريلا بيلسه ده، اما پيسخولوژى باخيميندان ازيلميش و انكار اولونان ميللت لرده ديللى توتولماق يايقين دير و حتى كوتلوى اولوراق دا بو ميلتلر بير سكون دوره سى كئچيره بيلرلر. بويوك احتيمالا آتاميزين كاروانلاردا چاليشيب و گزديغى زامان، ايشغالچى قوه لره عايد اولان توپلوم طرفيندَن عيرقچى تاويرلاردان كوچومسه نيب و حقارته معروض قاليب ( يئنى تاريخ ده مارتين لوتر كينگ، نلسون ماندلا و ماهاتما گاندى عينى عيرقچى تاويرا معروض قاليب و كوچومسه نيب و اونلارين سونراكى باخيش لاريندا بوراخديغى تاثيرلره فاكت لار وار) چوخلو اينسانلار عيرقچى تاوير و داورانيشلارا معروض قالاندا، بو داورانيشلارى هضم ائتمك يا اونون قاباغيندا اوزلرينى تسلى وئرمك ايچون، دونوب اوزلرين تحقير ائديب و يا اوچ شاهى پول ايچون دونوب اوز ويجدان و ومنسوب اولدوغو خالقلارين ساتارلار. اما آتاميز بابك باش قالديردى و ديره ندى، اونون يولوندا دواملى اولدوغونون سببى نه شخصى منفعت لرى بلكه اينسان ليغا و اوزونون و خالقينين  آزاد اينسان گيبى ياشاماق سئوداسى دير، چكديغى چتينليخ لر و معروض قالديغى حيقارتلر عمُر بويو اونون يولوندا دواملى اولماغيندا روح و ايمان يارادى. نئچه كى بوگون قويدوغو ميراث اولادلاريندا آزادليغا و اينسان گيبى ياشاماغا روح و ايمان يارادير. نه موتلو اونلارا كى  تحقير و اينكار قاباغيندا باش قالديريلار، نه موتلو اونلارا كى چكديغى آجى و محنت لرى اونودمورلار و او آجينى باشقاسى چكمه سين دييه باش قالديريلار، نه موتلو اونلارا كى چكديغى آجى لارين تلافى سى اولسون دييه، گوج صاحابى اولدوخلاريندا اوز شخصى منفعت لرينده جومورلار، نه موتلو اونلارا كى يئتَر آرتيق دئيللر.

و آتاميز بابك بذه سارى يولا توشدو، اوشاق ياشلاريندا عائله سينين  دردين چَكميشدى و ايندى گئدير كى بير اسير ميللتين دردلرين چكسين، اوشاق يكن عائله سينين قهرمانى اولموشدو و ايندى بذ قالاسينا يولانير تا اسير و تاپدالانميش بير خلقين قهرمانى اولسون. او قيشين سويوغوندا يولانير بير مجهول يولدا، بلكه يولدا قارشيلاديخلارى آدام و يا حتى جاويدان اونون سيما سيندا دونيانى دييشمه غه إيراده و جسارتى اولان بير روحلو باخيش گوروردولر. بير زامان اونون وار اولدوغو أونور غرور و غيرت له عائله سى اونا ايفتخار دويوردو، اينديسه بو قيش دا و بوزلو و قارلى يولدا گئدير كى بير ايفتيخارسيز ميلته ايفتيخار يارادسين. ايشغالچى و اينكارچى قوه لر، اينكار، آسيميلاسيون و ايستيثمار ياپديخلارى زامان، گوردوخلرين چوخ باها يا باخماسين دييه ايستيثمارى و آسيميلاسيونو چكيجى و گوز قاماشديران گوستريلر. ازيلن لر باش قالديرماسين دييه، اونلارى كوله اولدوخلاريندان ممنونيت قازانماغينا ايدولوژى ياراديلار، كوله له لرين، كوله اولدوخلاريندان حتى خبرلرى يوخدو! اونلارين كوله ليخ لريندن خبرلرى اولماديغى حالدا، اونلار نجور باش قالديرسينلار؟ اما آتاميز بابك گنج ياشلاريندان بو كوله لِيگى گوردو و اوزون قارلى يولدا دوشوندو كى قولونداكى قاندالارى شاقيلادسين، او قولونداكى قاندالارى قيرا بيلمه سه ييدى ده، اونلارى اوتانديردى. قاندالارى داشيما اونملى دييل، اولسون كى سرنوشت اينسانى قاندالا دوچار ائليْيه بيلَر، اما  اونملى اولان اونلارى قيرماغا چابا گوسترمك دير. اونملى اولان او قاندالارين اولدوغون آنلاماق دير، اونملى اولان اودور كى آتاميز بابك سهل بن سنبادا دئديغى كيمى شرفينى بير اؤوچ پول و ايشغالچى قوه لره ساتماماق دير. نه موتلو اونلارا كى قولاريندا كى زنجيرلرين اوتانديريلار، نه موتلو اونلارا كى گوردوخلرى ايش دن عائله لرينه، خالقلارينا و اينسانليغى ايفتيخار قازانيرلار، نه موتلو اونلارا كى باش قالديريب و باشى اوجا ياشيرلار!

و آتاميز اولدو بير خالقين اومود سيمگه سى، چوخلارى ليدر دئيب كئچيرلر، اما ليدرليخ آتاميز بابكين گوردوغو اَن كيچيك ايشيدير! تاريخ بويو بيز ليدرلردن اوز به اوز اولموشوخ،هر ليدر  بير ازيلميش خالقين اومود، باش اوجاليق و غرور سيمگه سى اولماز. تك آتاميز بابك دير كى نه فقط آذربايجان تورك خالقينين بلكه بوس بوتون اَزيلن لرين اومود و عصيان سيمگه سيدير. اينسانلارين گونلونه حوكمورانليغ ائله مك او قدر هاساد دئيل، سانيرام كى آتاميز حوكمورانليغ ائلمه دير، بلكه گونوللر بير اولدو، ميليونلارجا روح و بدن بير اولدو، بيرينين قولونا تيكان باتيرسا هاميسى آغري چكدى و بير تيكه أكلمك اولورسا هر كس پايلاشدى. توركلر و اوزليخله آذربايجان ليلار هر زامان اوزگه اولكه لر و  دينلره خيدمت ائليب و اونلارين چئوره سينده و منفعتلرى اساسيندا بيرله شيبلر، تك آتاميز بابك دير كى بو ميلته روح وئردى، باشى اوجا ياشاماق لارينا يول گوستردى و اونلارا اينسانليغ، آزادليغ و برابرليخ روحو باغيشلادى. و آتاميز بابك دير كى اينسانلارى اوزلرى اولماق دان غرورلو اولماق لارينا روح باغيشلادى. او زمانه كى انسانليغ سون نفسلرين چكيردى و ايشغالچى و اينكارچى قوه لر بيزيم نه فقط مال، توپراق و ناموس، بلكه اونلاردان برابر  اينسانليغي ميزى دا ايشغال و اينكار ائليرديلر و تاسوفله بيزيم ميلتين چوخودا آياق دا قالماق و يا بئش قوروش پول ايچون اينكارچى لاردان ايش بيرليغى ياپيرديلار، اما آتاميز بابكى دير كى بيزه  ديره نيش، اونور و اينسان اولماق روحو باغيشلادى. نه موتلو اونلارا كى حوكمورانليغ ايچون اينسالارى كوله ائله مير لر بلكه آزادليخ، عدالت و برابر ليغ ايچون اينسانليغى ارمغان گتيريلر. نه موتلو اونلارا كى آياق دا قالماق ايچون اوزلرين، ويجدانلارين و خالقارين ساتميرلار، بلكه خالقارينين آياق دا قالماغى ايچون اونلارين ويجدانلاري و اينسانليغ لارى أعاده اولسون ديه باش قالديريلار. نه موتلو اونلارا لوكس حياتا يئتيرنده اونا دالميب او كئچميشلرين اونودمورلار، بلكه داها هر كسين بو حيات حقيدير دييه باش قالديريلار. نه موتلو باش ايمييب، باش قالديرانلارا.

تاريخ هر زامان كى گيبى ظفر قازانان و حاكيم لر طرفيندن يازيليب، ايشغالچى و اينكارچى قوه لر بيزيم ميلتين حاقين دانماق ايچون هر زامان آتاميز بابكين تاريخين قاراليب و تحريفه معروض قويوبلار. مثلاً آتاميزي كوچومسه مك ايچون اونون آشاغى طبقه دن قالخديغين و او طبقه يه منصوب اولدوغون ذكر ائليرلر و اونون اوزوندَن آتاميزين يورودوغو ديره نيشي آشاغى طبقه نين ديره نيشى آدلانديريلار( يوخارى دان آشاغى يا باخماق). فئودال ايشغالچى و اينكارچى لار كى خالقى كوتلوى اولاراق قانين شوشه يه توتموشلار و اونلارى ايستيثمار ائليرلر، البته كى آتا بابكين برابرليخ و عدالت طلب مجادله سيندن راحاتسيز اولا بيلرلر، بللى آتاميز بابك يوخسول بير عائله دن قالخدى، هر بير تيكه أكمك ايچون موجاديله وئردى، او كاروانلاردا چاليشديغى زامانلار تاريخى آذربايجانى گزدى، اونلارين درد و كدرين گوردو و آنلادى كى هر كسين اونون گيبى درد و آجى سى وار. قوى يالانچى دينچى لر و دونياسينى بئش شاهى ساتانلار آتاميزي و ميلتيميزين عصيانين عاج و يوخسول كوتله يه نيسبت وئرمك دن اوز پيس و چيركين اوزلرين بيزلره گورسدسينلر، اونلار بيليرلر كى كوتله نين يوخسول و احتياجى اولماغى اونلارين تالان و حيرسيليخلارينين نتيجه سيدير، اونلار ايستيرلر كى بيز هر زامان بير تيكه چورك موحتاجى اولوب و گوجوموزو ساده جه بير تيكه چورك قازانماغ ايچون قولاناق و يا بير تيكه چورك ايچون اونلارين اَميرينين آلتيندا اولاق، او طرفده قالسين كى اونلار عدالت و يوخسول كيتله له لره برابرليخ شعارى لا ايشى استونه گَليب لر اما ايش لرينه گلمَديغى زامان اونلارى تحقير ائليب كوچومسه ييرلر. بو ساواش تاريخى بير ساواش دير، هله ايندى ده بيزيم حاقلارى دانيب و بيزيم انسانى حاقلاريميزى مشروعيت دن سالماق ايچون بيزى يوخسول، آشاغى طبقه و سوادسيز دييه آشاغيلايب و تحقير ائليب و بو يولدان بيزيم حاقسيز اولدوغوموزو ايدعا ائليرلر! اما اونلار بيلير و اوزلرين يوخويا ورورلار كى بيز آنلاميشيق كى بيزيم بير تيكه چورك ايچون محتاج اولماميز ، بيزيم يوخسولوغوموز و بيزيم هر بير نقصانيميز ايشغالچى و اينكارچى قوه لرين عملينده ن قايناخلانير. اونلارين ايستيثمارى و اينكارچى سياستى دير كى بيزيم يوخسول لوغا سبب اولور، بو اينكار دير كى بيزى ساوادسيزليغا معروض قويور بو ايشغالچى و اينكار چيلارديلار كى بيزيم محروميت سببيميزديلر. بيز دوشمنى تاپيميشيق، نئجه كى آتاميز بابك دردى تاپدى! درد ايسارت و عدالتسيزليغ دير، نئجه كى دوشمن اينكار و ايستيثمار قوه لرى دير. بو تاريخى دعوانين  زمانه ميزه گيبى اوزانماسي گوروشور، ايستيثمارچى لار ايستيثمار اولونان لارا يوخارى دان آشاغى يا باخيب و اونلارى تحقيردَن ياد ائليرلر، اينكارچى لار هر زامان اوزلرين يوخارى بيليب و اينكار اولونان لارى اينسانليغا لايق بيلميرلر. اما آتاميز بابك گورسه دي كى اينسانليغ داها اوستوندور، اونون ديره نيشينده اينسانلار دين، جنسيت و مال وارليق، عيارلارينان  سايقى و ديَر گورمولر، بلكه هر كس اوز اينسانليغى ايچون سايقى و ديَره ماليكدير. البته بو ايستيثمارچى خالقلارا و خصوصى له او ميلتلره كى حيات دوزنلرى " كاست و فره شاهى " و اونون ايدامه سينده نهايت "سيد" تقدوسوله قورولوب آنلاماغى بلكه هاساد اولمويا، اما تورك لر و خصوصى له آذربايجان توركلرينده هيچ زامان كاست و طبقه سيستمى اولمايب و هر زامان هر كس چاليشديغى و امَگينه گوره قدر گوروب نجور كى آتاميز بابك أمك وئرديغيى مقدس موجاديله ايچون سَركرده  و معنوى ليدر عنوان نيندا قبول اولدو  و بو گونده خالقينا روح باغيشلايير( آيرى بير نمونه كاست و طبقه و اينكارچى طرفلى يازارلارين " غلامان تُرك" كلمه سين تورك شاهلارا تحقير منظورونان ايشلدمه له ريدير، او حالدا كى بير غلام يا كوله شاه ليقا يئتيرديغى توپلوم  آراشديريليب و اونو اوتوپيا گيبى مكافات لانديرماق گرَكدير). نه موتلو اونلارا كى سوى يا طبقه دئيل بلكه اينسانلارين شخصى باجاريغى ايچون ليدر سئچيرلر، نه موتلو اونلارا كى يوخسولوق زامانى، اوز اينسانليغ لارين بئش شاهى پولا ساتميرلار، نه موتلو اونلارا كى آياقدا دورماق ايچون اينكارچيا باش اييب و اوزلري اوزلرين كيچيتميرلر تا اينكارچينين گوزونده خوش گوزوكسونلر، نه موتلو اونلارا كى آياغا قارخيب و گوزلرين اينكارچيلارين گوزلرينه توتوب و دئيللر:

- بللى كى من يوخسولام، بللى دير كى بير يئر تاپيب ياتيب و بير تيكه چورك يئمه غيمه پروبلم لريم وار، گورسه نير كى سن وارلى سان و البته بوش وقتين اولدوغو ايچون مندن چوخ كيتاب اوخويوبسان، بللى دير كى سن ارباب و من نوكرم، اما بونو بيلگينَن كى بيليرم منيم نقصان لاريمين سببى سن سن، قاباخجا سن آقا و من كوله يديم، اما ايندى يالنيز منيم دوشمنيمسن سن، سن ياخچى و ايفتيخارلى سوى و طبقه و عيرق دن اولدوغونو ايدعا ائليرسن، اولسون كى سنين قلبين سينماسين دييه سنى ياخچى سيلاح دان و ايفتيخارلى صورتده محو ائليه جه يم. نه موتلو اونلارا كى باش قالديريلار، نه موتلو اونلارا كى ميلت لرينه آزادليخ و ايستقلال روحو باغشيلاييرلار.

 آتاميزين إيسلاما قارشى اولدوغون و زنديق اولاراق تهمت وورولار( كافير و مسلمانلارين مقدس دعواسى). آتاميز بابكين ايسلاما قارشى اولماغيندا هيچ بير تاريخى فاكت يوخدور، البته بو وار كى هر زامان ايشغالچى و اينكارچى قوه لر، دين و مذهبى ازيلميش و سلطه آلتيندا اولان ميلت لرين هاسادجا ايستيثمار اولسون دييه قولانيلار، ايلگينج بودور كى حتى ايندى ده بو عملين ايدامه سى وار و حتى گونوموزده اولان زاماندا اينكارچى لار مذهبى و دينى اوز منفعت لرى اساسيندا تحريف ائليب و ايستيثمار اولونان ميلت لرى دين حربه سيله آرالاريندا تفرقه ساليرلار، بيز بونا فيرقه دموكرات زامانين دا گوردوخ كى معامله چى قم مولالارى آذربايجانا هجوم سيراسيندا شاه قوشونونا قران توتوب و اونلارين ساواشين اسلام و كفار ساواشى آدلانديريلار ، قُم و ارتجاعى هر زامان فارس ميليتچى ليغينين خيدمتينده اولوب و اولماغا دوام ائلير.ايندى ده دينچى و ميليتچى حكومتده ده شاهيديخ كى ميلت آتاسينين دوغوم گونون قوتلاديغى زامان تئز نئچه فتوا چيخارديلار كى آتاميز بابك دين دوشمانى دير! اونلار آتاميزين دين دوشمانى اولدوغونا بير فاكت گتيرميرلر، اونلار هر زامان حاكميتلردن اَل بير اولوب و كوتلوى خالقى ايستيثمار اولدوغونا يارديمجى اولوبلار، هر كس كى سوروشوب ميلتلري و  كوتله خالقى اينكار ائليب و ايستيثمار ائلمك دينه اويغون مودور و دين ده بويله بير آيه وارسا گورسه دين؟ جواب يئرينه اونا دين دوشمانى ماركى وروبلار و حاكميت دن اَل بير اولاراق اونو اولدوروبلر. بلى آتاميز بابك دينه قارشيدى، اما نه كوتله نين دينينه ، بلكه حاكم و اينكارچى و ايشغالچى لارين دينينه، او قارشيدى دير كى حاكيم لر اسلام و هر جوره دينى قولاناراق ، اينسانلارا هر جوره حاقسيزليغى روا گورسونلر. آتاميز بابك عصيانيندا كوتله خالقين دينه قاريشماسيندان هيچ بير فاكت يوخدور، اونون حوكمدار ائتديگى جغرافيادا هر مذهب دن ياشايان واريدى و اولومونوده ايلر سونرا دا موسلمان كيتله سيى طرفيندن سئويليردى و ايندى ده سئويلير، او يالنيز دين آديلا ميلتى ايستيثمار ائله مه غه قارشى دير. او دين آديلا قيزلارا و قادينلارا تجاوز ائله مه غه قارشى دير. آتاميز بابك عصيان و حوكمدارليغى سكولار بير باش قالديرماسى دير و دين و مذهبى دولت دن آيرى توتماق فلسفه سينين اوستونده قورلموشودور، البته كى بو دينه دوشمانليغ دئيل و ساده جه پاترون آقالاردان - مورتجع مولالارين دين آديلا و اوزه ليخله دين دن سواستفاده ائله مك له اينسانلارين قانين سومورماغين قارشسيندا بير عصيان دير، نئجه كى ايندى ده اگر آتاميز بابكين چراغ توتدوغو يولو اوزوموزه يول توتساق، بير اينسانين دينينه  و نه دوشونجه سينه توخونماق نه حاقى ميز وار و نه وظيفه ميز وار، آتاميز بيزه گورسديغي يولدا دين شخصى دوشونجه دير و هر كس نه ديل ده و نه دين ده اولدوغو دولتى ايلگيلنديرمز. اما آتاميز يولا توتدوغو فانوس بيزه گوستردي كى دين دولته قاريشاندا اينسانلارى تالاييب و قانلارينين سومورماغا  نظريه و ماتريال حاضيرليرلار، بو گونده بيز قم موللا و آيت الله لارى فارس ميليتچى ليغينين قولوغوندا گوروروخ، مسله شيعه يا سنى مولاسى دئيل، بونلار هر زامان ازيلن كيتله يى ايستثمار ائلمك ايچون دين مبين اسلامى تحريف ائليب و اوز دونيالارى ايچون آخيرتى نظرده آلميب و اوز ويجدان و شرف لرين ، ميلتلري له برابر وار اولان ايشغالچى و عيرقچى حاكميته ساتيب لار.كئچن سامرادا  اولوبلار و بو گونده قم دا! اما آتاميز بابك بو ويجدانسيزليغا قارشيدى، دين آديلا اينسانلارين اينسانليخدان چيخارماغا قارشى دى، دين آديلا ايشغالچى ليغا قارشى دى، دينى تحريف ائليب انسان لارين دونياسين يانديرماغا قارشى دير. سانكى زمانه ديشميب، سانكى عينى زاماندا ياشيريخ، نه غريب دونياميشسان  سن، حاكيم لر و مولالار سامرادان و بغدادان قم و تهرانا كوچوبلر. نه موتلو اونلارا كى بو اريتجاعنين قاباغيندا باش قالديريلار، نه موتلو اونلارا كى باش قالديريلار اما هيچ كيمه و دينه نفرت ياغديرماديلار، نه موتلو آتاميز بابكه كى مين ايل زمانه سيندن قاباخ دوغولدو، نه موتلو بيزه كى يولوموزا چيراق توتان آتاميز اولموش، نه موتلو اونلارا كى ميللتلرينين و توم آزادليخ سئون ميللت لره روح باغيشلاييرلار.

آتاميز بابكين عصيان لاريندا خشونت ايشلديغى دييه تهمت وورولار( امنيت سيزليغ يارادما).

آتاميزي شيدت و آجيماسيزليغا ايتهام لاييرلار، گولونج بير ايدعا، اما بو ايدعا نى ائلين لر كيم؟ همن او آدام لار كى اون مين ايليك مدنينتى و توپراقلارى قيلينج گوجوله آليب و اون مينلرجه اينسانى اولدروب و قادين و اوشاق لارين كوله اولاراق ساراي لارينا آپاريبلار، همان آداملار كى مينلر ايلدير بير خالقين ديلين و توپراقلارين ايشغال ائليبلر، سانكى قيرميزى قيزيل گول دن بوتوپراق لارى گليب ايشغال ائليب لر، سانكى دالارى جاق قيرميزى آلما گوندريلميشدى. گوبگى جينايت دن باغلانميش اينسانلار بوگون بيزى جينايته متهم ائليرلر، بيزه حيوان گيبى داورانان اينسان لار بيزه جينايت ايتهامين وورولار.  

آتاميز بابكين سون مقصدين قادين لارى اشتراكا قويماق منظورى وار دييه افترا ورولار( اخلاقى كوچومسه مك). آتاميز بابكين قادينلارا گتيرديغى آزادليغ و برابرليغى "بربر و وحشى" ميلت لرين كافاسينا سينماماغى ايچون اونا قادين لارى ايشتراكا قويماق ايفتراسى وردولار، اما كيملر بو ايفترانى ياپديلار؟ اونلار كى قادينا بير سكس ماكيناسى گيبى باخيرلار، اونلار كى قادينى ائو آدين قويدوخلارى زينداندا حبسه چكيرلر، اونلار كى ايندى ده وحشى جه سينه قادينى داش قالاق لا اولدورولر، اونلار كى حيوان گيبى شهوت ده بوغولما حالينداديلار و هر گوردوغو قادينان سكس لرى اولسون ايستيرلر، همان او عياش ديندارلار كى اوز اخلاق سيزليخلارينين آدين نئچه ده نه صيغه و آروادان شرعى پاپاق قويولار. اونلارين اوزانتيلارى ايندى ده عربستان دا، ايران دا، أفغانيستان دا و موصل ده و هابله باشقا يئرلرده ياپديقلارى حقسيزليخلرى قادينلارا گورونور. بو دين سيزلر و ايمانسيزلار ايندى ده قادين حقلرى مودافيعه ائده نلره دين سيز و بى غيرت دئيلر، اما آتاميز بابك تورك و آذربايجان قادينلارينا آزادليخ و برابرليخ گتيردى، او قادين و آزادليخ دوشمنلارين قوياق كنارا، اونلار نه بيلر لر كى قادين آزادليغى ندير، اونلار نه بيلر لر كى قادين نه دير؟ اونلار قادين دان بير سكس بيلر لر و بير اوشاق دوغما وظيفه سين! ياپيشاق آتاميز بابك دن، او كى قادينلاريميزا ، ائركك لريميزه و بوتون اينسانلاريميزا فرق قويمادان آزادليخ روحو وئردى، او كى دويوشدن دويوشه اونو يورودَن فقط آزادليخ عشقى دير. او كى آزادليخ روحودور، اوكى قادينلارين اينسانليغ قاليبينه قايديماق اونون آرزوسودور. نه موتلو اونلارا كى قادينا نه بير سكس آلتى كى بلكه بير اينسان گيبى باخيرلار، نه موتلو اونلارا كى آزادليغى تك اوزلرى ايچون دئيل بلكه بوتون اينسانلارا ايستيرلر.

طبرى تاريخنده وار كى آتاميز بابكين سون ساواشيندا، ايشغالچى قوه لر قلعه يه هجوم آپاراندا بير بَكلَنمييَن منظره نن اوز به اوز اولدولار. عسگر لر هره سى بير سازلا چيخيب و سازى چاليب - اوخوما باشلاييرلار. آيرى بير روايت ده وار كى شولن و شادليخ بيرگون ساواشدان قاباخ باشلانيب و گئجه بويو شراب قدح لرى قالخيب و ساز و زورنا چالينب و شادليخ ائليبلر. البته اولا بيلر دينچى روايتلر چون اسلام دان بو ايش لر ايغون دئيل بيراز شيشيرده بيلرلر، اما شخصيم روايتى دوغرو يونلرى اولدوغونا اينانيرام. نده ن كى اسكى تورك  لرده ساز چالماق و عاشيق بيزده مقدس بير آيين دير، دده قورقود داستانلاريندا دا ساواش لاردان قاباق شادليخ ائليب و ساز چالارميشلار. بونون آرخاسيندا درين فلسفه وار، ساواش دان قاباق ساز چالينير، شادليخ اولور، ندن كى بيز اؤلومو اوتانديرماق ايستيريخ، ندن كى بيز اولومه اينانميريق، ندَن كى آجى گونلرده حيات دان لذت آلماق اولا بيلر دييه اينانيريق، بو باشقالارينا توحاف گلسه ده بيزيم ميلى وارليغيميزدير، نيچه يونان افسانه سى دموكلوس باره سينده دئير كى: دامكلوس هيچ زامان او قدر موتلو اوينامادى كى باشينين اوستونده گوردو بير تك باش ساچى لا بير قيلينج آسيليب و هر زامان قيريليب  اونون باشينى ايكى يه يارا بيلر. بير ميلت كوتلوى اولاراق سون حالدا و سون نفس لرينده ساز چاليب، شادليخ ائله مه غه روح لازيم دير، او ميلت لشمه روحو دور كى اينسانلارى اوينادير، او آزادليخ روحودور سون اولسون دييه سازى سينه سينه آلير و دوشنمه باغيرير كى : سن منى اولدورمه غه گليبسن اما من اولومه اينانميرام، او روح دور كى يئنى دن كشف اولمالى دير، او روح دور كى بيزى آزادليخ موجاديله سينده بركيديب- بيرلَشديره بيلر. بيزيم ايتيرديغيميز مجهول او برابرليخ، آزادليخ و عدالت روحودور، بيزه آزادليخ باغيشلايا بيله جك تك شى او روح دور. نه موتلو اونلارا كى اؤلومه اينانميرلار، نه موتلو اونلارا كى اولوم لرى ياخين اولدوغون بيلسلر ده اؤلومو اوتانديرماق ايستيرلر، نه موتلو اونلارا كى سازى باغيرلارينا  باسيب و  قدح لرى بير بيرينه چاليب و باش لارى ديك اؤلومه ائلچى گئديرلر، نه موتلو اونلارا كى اؤلوملرين مقدارتلارى گيبى اوزلرى تعيين ائليرلر نه دوشمن لرى .

آتاميز بابك و افشينين ساواشى.

روايت لرده وار كى آتاميز بابكين قارشيسيندا ساواشان قوشون و خصوصى له سونونجو قوشون كى افشين نين سَركرده ليغيله اولدو چوخلو تورك واريدى و روايت لرده ده افشين بير تورك ژنرالى و سَركرده سى گيبى تانينير. ساواشين دتاى لارينا كئچمَدَن بو مسله له نين اوستونده بيراز دايانماق ايستيرم، بو مسله نين ايلگيمى چكمه غى بوندان عيبارت دير كى بو مسله تاريخى بير مسله دير، هله فرقلى بير آدلاردان اولسادا ايدامه سى وار، بابك و افيشنين ساواشى هله قورتولمويوب و بلكه هر گون بيز اونان اوز به اوز گَليريك. بو ساواش خالقينا و اينسانلارا آزادليخ طلبى اولان اينسان لار و او بيرى طرفدن ده خالقينين و بوتون اينسانليخلارى  عليه نه بئش شاهى پولا موزدور اولان اينسانلارين ساواشى دير. آدلارى چيخساق بو ساواش قارا ايرتيجاع ميلتچى لرينه موزدور اولانلاردان، آزادليخ و عدالت هوسى اولان لارين ساواشى دير. ايلگينج اولان بودور كى ندَن بيزيم خالقادا بو قدر اوز خالقينين زنجير ائله مه غينه بو قدر ايشغالچى لارا متفق تاپيلير؟ بو ساواش قارانليق دان ايشيق ساواشى كيمى دير و حيات بويو بيتمز اولدوغونا اينانيرام، اما بونا دا أينا نيرام كى اوزن زامان دا، آزادليخ و برابرليخ روحو اولان كيتله سونوندا ساواشى قازاناجاق. نئجه كى بو گون بابكين روحو بيزه  بير دويغو بوراخير. آتاميز بابكين حاقلى اولدوغو بوردان آيدين دير كى هله ايرتيجاع اونو قارالامايا چاليشير و او بيرى طرفدن دن اونو اوزلرينه عايد ائله مه غه چاليشيلار. باشقا بير قونو بوردا افشينين سونراكى سرنوشتى دير، بوردا آيدين دير كى افشينين سرنوشتى توم ميلتينين قاباغيندا دوران لارين و اونلارى ساتانلارين سرنوشتى دير، اونلارى قولانديخدان سونرا و ايشه گلمه ديخلرى صورتده بير دَيَرسيز اشيا كيمى كنارا آتارلار. نه موتلو اونلارا كى ميلتين قاباغيندا يوخ، كناريندا دوروبلار، نه موتلو اونلارا كى ميللتلرينين بنده اولماغى ايچون دئيل آزاد اولماغى ايچون ساواشيلار.

روايت لرده وار كى آتاميز بابكه ايشغالچى سلطان طرفيندن امان نامه گوندريلميشدى و بو امان نامه نى افشين، آتاميز بابكين اوغلونان كى افشينين حيمايه سى آلتينا گيرميش دى گوندرمه ايسته دى و ليكن سونوندا اوغلان راضى اولمايب و بير مكتوب يازاراق ايشغالچى سلطانين مكتوبونان برابر آيرى شخص لر توسوطوله امان نامه نى گوندرديلر. آتاميز بابك حتى ايشغالچى سلطان يا خليفه نين مكتوبون آچمير و اوغلونون جسارتسيزليغين گورونجه كى آتاسين تسليم اولماقا توصيه ائلير، قانى جوشا گلير و دئير كى منيم بوندان سونرا اوغلوم يوخدو، قيرخ ايل بويندوروخلو ياشاماقدان سارى بير گون آزاد ياشاماق ياخچى دير( البته ايرتيجاع تاريخچى لرى آزاد ياشاماغى درك ائله مه ديخلرى ايچون سَركرده كلمه سين ايشلديبلر). ساده جه بو سوز، فقط بو جمله نين اوستونده دايانماق لازيم دير، بو جمله بير خلقين آزادليغا اولان سئوگى سي دير، بير خلقين بويندوروخلو ياشاماقدان نيفرتي دير، بير خلقين اينسانليغ روحونا ماليك اولمالارينا بير تثبيت دير. آتاميز بابك دير كى هر زامان آزاد ياشادى، حتى اونون اعدام صحنه سينده كسيلميش اَلينين قانين اوزونه ياخير دييه بير مشهور روايت وار كى ايشغالچى سَركرده سى سورو نه دن اوزونه قان ياخيرسان و آتاميز بابك جواب وئرير كى اينسان اوله نده قان قايب ائتيغيندن دولايى رنگى ساراليلارا، ايستميرم كى دوشمن اولومدن قورخماغيمى سانسين! سارالا- سارالا ياشاماق دان سارى قيزارا قيزارا اؤلمك ياخشى دير. و گليب كى آتاميز بابك ايشكنجه نن اؤلدورولنده دئميش كى نه هاساديميش! نه موتلو اونلارا كى حياتلارينان و حتى اؤلومه لرينن بير خالقا روح باغيشلاييرلار، نه موتلو اونلارا سون نفسلرينده اولسون بئله قهرمانليخ ياراديلار. نه موتلو آزادليخ و عدالت جارچى لارينا، نه موتلو باش قالديرانلارا.

من آتاميز بابكين كسيلميش قولارين و بدنين سامرا دروازه سينده بوراخيرام، او قولار بيزيم آزادليخ و عدالته اولان سئوادميزدير، و بونا اينانيرام كى آتاميز بابكين روحو بوگون بيزه اورگتمه غه چوخ شى لرى وار، اصلينده زامان دئشيكليغى اولسادا، موقعيت او قدر فرقلى دئيل. من درين فيكيره جومورام و اوز خياليمدا آتاميز بابك دَن سوروشورام، آتا سن نجور قازاندين، بيزه نه توصيه ن وار؟ و آتاميز بابك جواب وئرير كى: من بلال آباد كندينده بير يوخسول عائله ده دوغولدوم، حيات آجى سى و سيخينتى سى چكديم اما باش اَيمه ديم، اوزومو او يئره يئتيرديم كى نه فقط بير ميلتين بلكه بوتون آزادليخ سئون ميلت لرين اوميد قايناغى اولدوم و دوشمن ده منه باش اَييدى، اما سن و سنين گيبى لرى نه منيم گيبى عاجليخ و يوخسولوق چكيب سيز و نه منيم گيبى آجى، سيز نَدَن مندَن ياخچى اولمورسوز؟ نَدَن سيزيليرسيز، نَدَن اوزويوزو منيم گيبى يوخارى چكميرسيز؟ بيزيم خالقدا صاليح اولاد آتادان ياخچى اولار دئرميشلر، اگرسه منيم اولاديمسيز، اگر اولادليق ايدعاسينا صاديق سيزسه، نَدَن منَدن ياخچى اولماغا چابا گوسترميرسيز؟ نَدَن آتا دئرسيزسه و آتانين ميراثينا صاحيب چيخميرسيز؟ و من اوتانديم گوز ياشى توكم اوتانج نشانه سى ايچون آتاميزين حضوروندا.

نه موتلو اونلارا كى آتا لارينين ميراثينا صاحيب چيخارلار، نه موتلو اونلارا كى آتالارى اونلارا ايفتخار ائلير و نه موتلو اونلارا كى آتالاريندان ياخچى اولماغا چاليشيلار.

معصومه قربانى.

Share/Save/Bookmark