گوج بیرلیکده دیر بیلدیریسینه اوتری باخیش
1389 ایلینین سون گونلرینده تئهران-دا اولان تورک اؤیرنجیلرین وریندن گوج بیرلیکدهدیر عونوانلی بیلدیریده 1390 ایلینین میللی بیرلیک ایلی آدلانماسی اؤنریلمیشدیر. چوخ قیسا زاماندا اؤیرنجی حرکتینینن آدین داشییان، اؤیرنجی سیته سی و سونرا دا آذوح (آذربایجان اؤیرنجی حرکتی) سیتهسی دستک بیلدیریلرینی یایدیلار. بو ایکی سیتهنین بیلدیریسی، گوج بیرلیکدهدیر آدلی بیلدیرینین ایلک باشاریسی کیمی گؤرونه بیلر.
بونلاردان علاوه بیر نئچه بیلیمیوردون(آذربایجان، زنجان و سون گونلرده اردبیل شهرلرینین اؤیرنجیلرینین) دستگی بو ایستگین تکجه تئهراندا اولان اؤیرنجیلر دئییل بلکه باشقا اؤیرنجیلرین وریندن ده وارلیغی و اولوملو قارشیلانماسینی گؤستریر.
اؤیرنجیلردن علاوه بیر چوخ ضیالی و میللی فعاللاریمیزدان دا شفاهی اولسا دا بو اؤنری اولوملو گؤرولوب و اوندان حمایه ائدیلمهسی ایستهنیلیب؛ نئجه کی اوراسیا ایستراتئژیک آراشدیرمالار مرکزینده چالیشان گونئیلی ایستراتئژیست، عاریف کسکین ده وئب صایفاسیندا بو اؤنرینی یئرینده و دوغرو زاماندا گلن بیر ایستراتئژیک تکلیف کیمی گؤروب و اؤنریدن حمایه ائدیلمه گرکلیگینی بیان ائدیب دیر.
اؤیرنجیلرین بیرلیک چاغیریشینا دستک بونلارا دا حصر اولونماییب. ایران-دان ائشیکده چالیشان بیر نئچه قوروپ و تشکیلاتلاریمیز دا اؤز بایرام قوتلاما مئساژلاریندا میللی بیرلیک ایلینه ایشاره ائدیب بو اؤنرییه قاتیلمالارینی بلیرلندیریبلر. آنجاق بو بیلدیرییه سیاسی اولمایان قوروپ و تشکیلاتلاریمیزین چوخوسو قاتیلسالار دا تاسوفله سیاسی تشکیلاتلاریمیزین بیر آزی مسافهلی داورانیب اؤز موناسیبتلرین آچیقجا اورتایا قویمادیلار.
بو بیلدیرییه ایندییه قدر یوزده یوز قاتیلیم اولماسا دا بئله گؤرونور کی بیر چوخ میللی فعالین اورک سؤزونو دئییب و میللی حرکتیمیزین بیر جدی سورونونو چؤزمه یه بیر آددیم ایرهلیلهیهجک، نئجه کی فروردینین 13-ونده اولان اعتراضا چئشیدلی قوروپلار طرفیندن اولان چاغیریشلاردا اوز وئرن هماهنگسیزلیک، میللی بیرلیگی قوروماق آدینا، قوروپلارین آنلاییشلا داورانیشی ایله چؤزولوب بوتون قوروپلار بیر یئر و بیر ساعتی رئکلام ائتمک قرارینا گلدیلر و بئلهجه گوج بیرلیکدهدیر سؤزونو شوعاردا دئییل عملده سرگیلهدیلر. بو و بونا بنزر داورانیشلار میللی بیرلیگی قوروماق اوچون چئشیدلی قوروپلارین داها تلورانسلی توتوملارینین شاهیدی اولا بیلهجهییک و آذربایجان میللی حرکتی ایچینده اولان قوروپلارین و تشکیلاتلارین اوزلاشی و آنلاییشلا داورانیشینین خبرچیسیدیر.
*گوج بیرلیکده دیر بیلدیری سینه بیر باخیش داها*
بو بیلدیرینین زامانلاماسی چوخ دقت چکیجیدیر. میللی حرکتده اولان چئشیدلیلیک هر نه قدر بو حرکتین دئموکراتیک اولماسینین گؤسترگهسی اولسا دا، گلهجکده نئچه سسلی حرکتی وعده ائتسه ده و هر نه قدر میللی حرکتیمیزین پوزیتیو یؤنلریندن اولسا دا، بوگونوموزده بو چئشیدلیلیگی مودیریت ائدیب بیر یؤنده قوللانماغی باشارا بیلمهسک، حرکتین ضعیفلنمهسینه سبب اولا بیلر. سون ایللرده بو ضعف آرتیق گؤزه وورور، ائله بو ندنله بو چئشیدلیلیگی حفظ ائدرک اولوملو و داواملی بیر بیرلیک یاراتما آماجی ایله چالیشمالار اولموشدور؛ آمستردام و اوندان سونراکی اوتوروملار و شورای هماهنگی فعالین حرکت ملی ده ائله بو چالیشمالاردان ساییلیر. بو چالیشمالار بیرلیک یاراتما آماجینا یؤنهلیک بیر آددیم ایرهلییه آتسا دا چئشیدلی ندنلره گؤره اؤز هدفینه تمامی ایله چاتا بیلمهدی.
اؤته یاندان اورتا دوغودا دئموکراتیک دئوریملرین آددیم-آددیم ایرهلیلهمهسی بو بؤلگهده اولان دئموکرات حرکتلره چکیجی اولوب اونلارا اؤرنک کیمی گؤرونور. اورتا دوغودا اولان دئموکراتیک دییشیکلیکلر و دئموکراسی اوغروندا قازانیلان اوغورلاردا، بیرلشمه گرَگی، آذربایجان میللی حرکتینین اؤیرنجی حرکتی طرفیندن چوخ دقتله ایزلنیلمیشدیر. بو دییشیکلیکلر، آذربایجان میللی حرکتینین ده بئلنچی بیر دییشیم گوجونه صاحیب اولما دوشونجهسینی یارادیب و بونا اولوملو، قاپساملی و اوزون سورهلی بیر بیرلیگین یارانیلما گرکلیگی حیس ائتدیرمیشدیر. اؤیرنجیلر بو بیلدیری واسطهسی ایله بو گرکلری بیر داها میللی حرکتین گوندمینه گتیریب و بو ایل ایچینده بیر آددیم بئله اولسا آتماغا چالیشمیشلاردیر. گوج بیرلیکدهدیر بیلدیریسینین ایلک پاراقرافیندا دا بو مسئلهیه توخونولوب بئله یازیلمیشدیر: "سون زامانلاردا اورتادوغودا باش وئرن حاديثهلر و بو بؤلگهده دئموکراسي اوغروندا اعتيراضلارين موثبت شکيلده سونوجلانماسي، بؤلگهدهکي دئموکراتيک حرکتلره بير اؤرنک اولاراق گؤرونمکدهدير. يقين کي بو حرکتلرين دوزگون سونوجا وارماسيندا، ايجتيماعيي گوجلرين بير يؤنده اولماسی ان ائتکين عاميل ساييلا بيلر. گونئي آذربايجان ميللي حرکتي ده بير دئموکراتيک حرکت اولاراق بو دييشيکليکلردن ائتکيلنمکده دير."
بو بیلدیرینین ایکینجی پاراقرافیندا ایسه ایران جومهور باشقانلیق سئچکیلر سونراسی یارانان و یاشیل حرکتی آدلانان اعتراضی حرکته ایشاره اولونوب "آيريجا ميللي حرکتين زامان سورجينده گليشيمي و يئتيشکينليگي، چئشيدلي حاديثهلره اؤز منفعتلري اساسيندا توتومو و داورانيشي، بير سيرا سياسي آخينلارين خوشونا گلمهييب و اونلاري ميللي حرکتين گوجونو اؤز منفعتلري يؤنونده قوللانماغا ماراقلانديريب" یازیلیر.
بو بیلدیریده ده گلدیگی کیمی آذربایجانین بو اعتراضلارا قاتیلماماسی و معنالی بایکوتو مرکزیتچی اعتیراضچیلارین خوشونا گلمهمیشدیر. بو اعتراضلارین ایلک گونلرینده آذربایجانلیلارین آکسیالارا قاتیلما اومودو وارسایدی دا گونلر سوردوکجه و آذربایجانین سوکوتو پوزولمادیقجا بو اومود سویا دوشوب یئرین منطیقسیز اؤفکهیه وئردی. کئچن ایکی ایله یاخین زامان سورجینده سورن بایکوت، مرکزیتچی گوجلر طرفیندن آذربایجان فعاللارینین قورخاقلیغی کیمی آشاغیلیجی سؤزلرله آلقیلانماسی، اونلارین اؤفکهسینین گؤستریجیسیدیر. البته کی آذربایجانین توپلومسال دییشیم گوجونو قازانماق و اونو اؤز منفعتلرینه قوللانماق اونلارا بیر آرزو کیمی اولوبدور، نئیه کی اونلار آذربایجانی چوخدان اوتوزوبلار. بیزیم اؤیرنجی فعالاریمیز دا بو قونویا چوخ یئرلی و ظرافتله توخونوبلار. اؤزللیکله بایرامدان اؤنجه اولان آتمسفره باخدیغیمیز زامان بو مسئلهنین گوج بیرلیکدهدیر بیلدیریسینده گلمهسی اؤیرنجیلریمیزین ذکاسی و دقتینی یانسیدیر.
هر زامان دوغرو ایشلرین اولوملو سونوجلانماسیندا زامانلامانین اؤنملی رولو وار؛ اوست سطیرلرده گلنلر بو بیلدیرینین تام زامانیندا یازیلیب و یاییلماسینی گؤستریر. بونا گؤره ده گوج بیرلیکدهدیر بیلدیریسینین یازیلیب یاییلماسیندا ایش بیرلیک ائدن و امگی کئچن بوتون اؤیرنجیلر و اؤیرنجیسل قوروپلاری تبریک ائتمک و بو سورجین دوزگون ایرهلیلهمهسینده هره اؤز گؤرهوینی یئرینه یئتیرمک گرکیر.
آیمان شانلی